ചോദ്യം ചെയ്യലിന് ഹാജരാകാൻ ആവശ്യപ്പെട്ടുകൊണ്ടുള്ള നോട്ടീസ് ലഭിച്ചില്ല: മുകേഷ്

കൊച്ചി: നടിയെ ആക്രമിച്ച കേസുമായി ബന്ധപ്പെട്ട് നടനും എംഎൽഎയുമായ മുകേഷിനെ ചോദ്യം ചെയ്യുമെന്ന് പോലീസ് അറിയിച്ചിരുന്നു. എന്നാൽ ചോദ്യം ചെയ്യലിനെത്താൻ ആവശ്യപ്പെട്ടുകൊണ്ടുള്ള നോട്ടീസ് കിട്ടിയിട്ടില്ലെന്ന് മുകേഷ് പ്രതികരിച്ചു. പൾസര്‍ സുനിയെ ദിലീപിന് പരിചയപ്പെടുത്തിയത് താനല്ലെന്നും മുകേഷ് പറഞ്ഞു. ​ കേസിലെ ഒന്നാം പ്രതിയായ പൾസർ സുനി മുകേഷിൻ്റെ ഡ്രൈവർ ആയി പ്രവർത്തിച്ചിട്ടുണ്ട്. ഈ സാഹചര്യത്തിലാണ് മുകേഷിനെ പൊലീസ് ചോദ്യം ചെയ്യുമെന്ന് അറിയുന്നത്.

മുകേഷിന്‍റെ ഡ്രൈവറായി ഒന്നര വര്‍ഷത്തോളം പള്‍സര്‍ സുനി പ്രവര്‍ത്തിച്ചിരുന്നു. എന്നാൽ, പിന്നീട് മുകേഷ് സുനിയെ ജോലിയിൽ നിന്ന് ഒഴിവാക്കിയിരുന്നു. ദിലീപ് നായകനായ 'സൌണ്ട് തോമ'യുടെ ഷൂട്ടിങ് സമയത്തും സുനി മുകേഷിൻ്റെ ഡ്രൈവർ ആയിരുന്നു. ഇതിനു പുറമേ അമ്മ ഷോയുടെ സമയത്തും സുനി മുകേഷിൻ്റെ ഡ്രൈവർ ആയിരുന്നു. സുനിക്ക് ക്രിമിനല്‍ പശ്ചാത്തലമുണ്ടെന്ന് അറിയില്ലായിരുന്നു എന്ന് കഴിഞ്ഞദിവസം മുകേഷ് മാധ്യമങ്ങളോട് പറഞ്ഞിരുന്നു. ​ അമിതവേഗതയില്‍ വാഹനം ഓടിക്കുന്നതിനാലാണ് പറഞ്ഞു വിട്ടതെന്നും മുകേഷ് പറഞ്ഞിരുന്നു.

അതേസമയം ദിലീപിനെ അങ്കമാലി ഒന്നാം ക്ലാസ് മജിസ്ട്രേറ്റ് കോടതിയിൽ നിന്ന് ആലുവ പോലീസ് ക്ലബ്ബിലേക്ക് കൊണ്ടുപോയി. രണ്ടുദിവസത്തെ പോലീസ് കസ്റ്റഡിയിൽ വിട്ടു നൽകിക്കൊണ്ട് കോടതി ഉത്തരവിട്ടതിന് പിന്നാലെയാണ് ദിലീപിനെ ആലുവ പോലീസ് ക്ലബ്ബിലേക്ക് കൊണ്ടുപോയത്. ദിലീപ് സമര്‍പ്പിച്ച ജാമ്യാപേക്ഷ തുറന്ന കോടതി പരിഗണിക്കുകയാണ്. അവിടെ നടന്ന വാദങ്ങൾക്കും പ്രതിവാദങ്ങൾക്കും ശേഷമാണ് ദിലീപിനെ പോലീസ് ക്ലബ്ബിലേക്ക് കൊണ്ടു പോയിരിക്കുന്നത്.

ദിലീപിനെതിരായ തെളിവുകളെല്ലാം കൃത്രിമമാണെന്നാണ് ജാമ്യാപേക്ഷയിൽ ദിലീപിന്‍റെ അഭിഭാഷകൻ അഡ്വ. രാംകുമാര്‍ വാദിച്ചു. താന്‍ നിരപരാധിയാണെന്നും കള്ളക്കേസില്‍ കുടുക്കുകയായിരുന്നുവെന്നും ദിലീപ് ജാമ്യാപേക്ഷയില്‍ ചൂണ്ടിക്കാട്ടുന്നു. അന്വേഷണത്തോട് പൂര്‍ണമായും സഹകരിച്ചിട്ടുണ്ടെന്നും ജാമ്യാപേക്ഷയില്‍ പറയുന്നുണ്ട്. നിരവധി ആരോപണങ്ങളാണ് ജാമ്യാപേക്ഷയില്‍ ഉന്നയിച്ചിരിക്കുന്നത്. പ്രതിയുടെ വിശ്വാസ യോഗ്യമല്ലാത്ത മൊഴിയിലാണ് തന്നെ അറസ്റ്റ് ചെയ്തതെന്നും ദിലീപ് ആരോപിക്കുന്നു.

ദിലീപിന്‍റെ അനുജന്‍ അനൂപിനേയും നാദിര്‍ഷയേയും ദിലീപുമായി അടുപ്പമുള്ള മറ്റു ചിലരെയും ഇന്ന് പൊലീസ് ചോദ്യം ചെയ്തേക്കുമെന്നാണ് റിപ്പോർട്ടുകൾ.


Didn't get a notice for Questioning: Mukesh MLA

Mukesh MLA informed that he didnt get any notice that demanding for attend Questioning regarding Actress Attack Case