51ാം വർഷത്തിലേക്ക് ചുവടുവെച്ച് ദിലീപ്; ഈ പിറന്നാളിന് ഇരട്ടി മധുരം

മലയാളികളുടെ ജനപ്രിയനായകൻ ദിലീപിന് ഇന്ന് അൻപത്തിയൊന്നാം പിറന്നാൾ. താരം അൻപത് വയസ് പൂർത്തിയാക്കി അൻപത്തിയൊന്നിലേക്ക് ചുവടുവെയ്ക്കുകയാണിന്ന്. ദിലീപ്-കാവ്യ ദമ്പതികൾക്ക് കുഞ്ഞു പിറന്നതിൻ്റെ സന്തോഷത്തിനിടെയാണ് ഇത്തവണത്തെ പിറന്നാൾ എത്തുന്നത്. അതിനാൽ തന്നെ താരത്തിൻ്റെ ഈ അൻപത്തിയൊന്നാം പിറന്നാളിന് ഇരട്ടി മധുരമുണ്ടാകും. താരത്തിൻ്റെ ആരാധകർ പിറന്നാൾ ആഘോഷമാക്കാനുള്ള ഒരുക്കത്തിലാണ്.

തൻ്റെ ഫേസ്ബുക്ക് പേജിലൂടെയാണ് താരം കുഞ്ഞ് ജനിച്ച വിവരം ആരാധകരെ അറിയിച്ചത്. ഇക്കഴിഞ്ഞ വിജയദശമി ദിനത്തിലാണ് താരത്തിന് രണ്ടാമത് കുഞ്ഞുണ്ടായത്.
മീനാക്ഷിക്ക്‌ ഒരു കുഞ്ഞനുജത്തികൂടി എത്തിയിരിക്കുന്നു എന്നും അമ്മയും കുഞ്ഞും സുഖമായിരിക്കുന്നുവെന്നും താരം ഫേസ്ബുക്കിൽ കുറിച്ചിരുന്നു. ആരാധകരുടെ സ്നേഹവും പ്രാർത്ഥനയും എന്നും ഞങ്ങൾക്കൊപ്പമുണ്ടാവണമെന്നും ദിലീപ് കുറിച്ചിരുന്നു. 2016 നവംബർ 25നാണ് ദിലീപ് നടി കാവ്യയെ രണ്ടാം വിവാഹം ചെയ്തത്. കാലങ്ങളായി ഇരുവരും നല്ല സുഹൃദ്ബന്ധത്തിലായിരുന്നു.



ദിലീപിനെ നായകനാക്കി ബി ഉണ്ണികൃഷ്ണൻ ഒരുക്കുന്ന ആദ്യ ചിത്രം പ്രഖ്യാപിച്ചത് അടുത്തിടെയാണ്. നീതി എന്ന് പേരിട്ടിരിക്കുന്ന ചിത്രത്തിൻ്റെ ടൈറ്റിൽ പുറത്തുവിടുന്നത് ദിലീപിൻ്റെ ജന്മദിനമായ ഇന്ന് രാവിലെയാണ്. ദിലീപിൻ്റെ ഔദ്യോഗിക ഫേസ്ബുക്ക് പേജിലൂടെയാണ് ഇത് പുറത്ത് വിടുക. നടി ആക്രമിക്കപ്പെട്ട കേസിൽ കുറ്റാരോപിതനായ നടനെ നായകനാക്കി ഒരുക്കുന്ന ചിത്രത്തിന് നീതി എന്ന് പേരിട്ടതിനെ ചൊല്ലിയുണ്ടായ ചില്ലറ വിവാദങ്ങൾക്കും മലയാള സിനിമാലോകം സാക്ഷിയായിരുന്നു. അതിനാൽ തന്നെ ചിത്രത്തിൻ്റെ പേരിൽ വ്യത്യാസം വരുത്തിയേക്കുമോ എന്നും ഏവരും കാത്തിരിക്കുകയാണ്.


മലയാള സിനിമാ ലോകത്ത് ദിലീപ് വിഷയം കൊടുംപിരി കൊണ്ട ചര്‍ച്ചയാകുമ്പോൾ എല്ലായിടത്തു നിന്നും വിട്ടു നിൽക്കാനാണ് താരത്തിന് താത്പര്യം. നടിയെ ആക്രമിച്ചതിൻ്റെ പേരിൽ കുറ്റാരോപിതനായ താരം എഎംഎംഎ സംഘടനയുടെ ഭാഗമായി തുടരുന്നതിനെ എതിര്‍ത്ത് ഡബ്ലുസിസി രംഗത്തെത്തി രൂക്ഷ വിമര്‍ശനങ്ങളാണ് സംഘടനയ്ക്കെതിരെ തൊടുത്തുവിട്ടത്.


എന്നാൽ താൻ സംഘടനയ്ക്കിടയിലെ പ്രശ്നത്തിൻ്റെ ഹേതു ആകേണ്ട എന്നതിനാൽ തന്നെ എഎംഎംഎ സംഘടനയ്ക്ക് ദിലീപ് മുൻകൂറായി രാജിക്കത്തും സമര്‍പ്പിച്ചിരുന്നു. എങ്കിലും, ദിലീപ് വിഷയം ഇനിയും കെട്ടടങ്ങിയിട്ടില്ല. ദിലീപ് സൃഷ്ടിച്ച, അല്ലെങ്കിൽ ദിലീപ് എന്ന വ്യക്തിയുടെ പേരിനാൽ ഉണ്ടായിട്ടുള്ള അലയൊലികൾ മലയാള സിനിമാലോകത്ത് ഇപ്പോഴും വീശിയടിച്ചു കൊണ്ടേയിരിക്കുകയാണ്.