ജർമനിയിൽ പോകാൻ കോടതിയുടെ അനുമതി തേടി ദിലീപ്

കൊച്ചി: നടിയെ ആക്രമിച്ച കേസിൽ വിചാരണ തുടങ്ങാനിരിക്കെ ദിലീപ് വിദേശ യാത്രക്ക് കോടതിയിൽ അനുമതി തേടി. ജർമനിയിലെ ഫ്രാങ്ക്‍ഫർട്ടിൽ സിനിമാചിത്രീകരണത്തിനായി പോകാനാണ് ദിലീപ് അനുമതി തേടിയത്. ഡിസംബർ 15 മുതൽ ജനുവരി 30 വരെ ഫ്രാങ്ക്‍ഫർട്ടിൽ തങ്ങാനാണ് ദിലീപ് അനുമതി തേടിയിരിക്കുന്നത്. ഈ മാസം ഒമ്പതിന് കേസ് കോടതി പരിഗണിക്കും.

എന്നാൽ,ദിലീപിന്റെ അപേക്ഷ അനുവദിക്കരുതെന്ന് പ്രോസിക്യൂഷൻ കോടതിയെ അറിയിച്ചു. കഴിഞ്ഞ നവംബറിൽ നടിയെ ആക്രമിച്ച കേസിൽ കുറ്റപത്രം സമർപ്പിച്ചെങ്കിലും ഇത് വരെ വിചാരണ തുടങ്ങാൻ സാധിച്ചിരുന്നില്ല. ദിലീപും മറ്റും വിവിധ ആവശ്യങ്ങളുമായി കോടതിയെ സമീപിക്കുന്നത് വിചാരണ വൈകിപ്പിക്കുന്നുവെന്നും പ്രോസിക്യൂഷൻ ചൂണ്ടിക്കാട്ടി.

കേസിലെ സാക്ഷികളിൽ ഏറെ പേരും സിനിമാ മേഖലയിൽ നിന്നുള്ളവരാണ്. ദിലീപ് ഇപ്പോൾ രാജ്യത്തിന് പുറത്ത് ഇത്രയും ദിവസങ്ങൾ നീണ്ടു നിൽക്കുന്ന യാത്ര പോയാൽ സാക്ഷികളെ സ്വാധീനിക്കുമെന്നും പ്രോസിക്യൂഷൻ വ്യക്തമാക്കി. ആരോടൊപ്പമാണ് ജർമനിയിലേക്ക് പോകുന്നതെന്നും എവിടെയാണ് താമസമെന്നുമുള്ള വിവരങ്ങൾ ദിലീപ് അപേക്ഷയിൽ വെളിപ്പെടുത്താത്തതും പ്രോസിക്യൂഷൻ ചൂണ്ടിക്കാട്ടി. വിചാരണ വൈകിപ്പിക്കാൻ ദിലീപ് നടത്തുന്ന ആസൂത്രിത നീക്കമാണ് ഇതെന്നും പ്രോസിക്യൂഷൻ കോടതിയെ ബോധിപ്പിച്ചു.