കിടിലൻ ആക്ഷൻ സീക്വൻസുകൾ കോര്‍ത്തിണക്കി ദിലീപിൻ്റെ 'ജാക്ക് ഡാനിയൽ'; ടീസര്‍

'ശുഭരാത്രി' എന്ന ഹിറ്റ് ചിത്രത്തിന് ശേഷം ജനപ്രിയ നായകൻ ദിലീപ് നായകനായെത്തുന്ന ചിത്രം 'ജാക്ക് ഡാനിയൽ' ൻ്റെ ടീസര്‍ പുറത്ത് വിട്ടു. തമിഴിലെ ആക്ഷൻ ഹീറോ അർജുൻ ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്. എസ് എൽ പുരം ജയസൂര്യ ആണ് ചിത്രം സംവിധാനം ചെയ്യുന്നത്. ജാക്ക് എന്ന് പേരുള്ള മോഷ്ടാവായാണ് ദിലീപ് ചിത്രത്തിൽ പ്രത്യക്ഷപ്പെടുന്നത്.

അര്‍ജ്ജുനുമായുള്ള ദിലീപിൻ്റെ സംഘട്ടന രംഗങ്ങളും കോര്‍ത്തിണക്കിയാണ് ടീസര്‍ പുറത്ത് വിട്ടിരിക്കുന്നത്. അർജുൻ സർജയുടെ ആദ്യ മലയാള ചിത്രമാണ് ജാക്ക് ഡാനിയൽ. മോഹൻലാലിൽ നായകനാകുന്ന മരയ്ക്കാർ അറബിക്കടലിൻ്റെ സിംഹത്തിലും അര്‍ജുൻ അഭിനയിക്കുന്നുണ്ട്.

'ഞാൻ പ്രകാശനി'ലൂടെയും 'ഷിബു'വിലൂടെയും ശ്രദ്ധേയയായ അഞ്ചു കുര്യനാണ് ജാക്ക് ഡാനിയലിലെ നായിക. ദിലീപ് നായകനായ 'സ്പീഡ് ട്രാക്ക്' ഒരുക്കിയതും എസ് എൽ പുരം ജയസൂര്യയായിരുന്നു. മാർച്ച് മാസത്തിലായിരുന്നു ഈ ദിലീപ് ചിത്രത്തിൻ്റെ സ്വിച്ചോൺ കര്‍മ്മം നടന്നത്.


ഛായാഗ്രാഹകൻ രാമചന്ദ്ര ബാബുവിൻ്റെ ആദ്യ സംവിധാന ചിത്രമായ പ്രൊഫസർ ഡിങ്കൻ, റാഫി തിരക്കഥയൊരുക്കുന്ന പിക്‌പോക്കറ്റ്, ടു കണ്ട്രീസിൻ്റെ രണ്ടാം ഭാഗം, പറക്കും പപ്പൻ, എന്നീ ചിത്രങ്ങളാണ് ദിലീപിൻ്റേതായി അണിയറയിൽ ഒരുങ്ങുന്നത്. കൂടാതെ നാദിർഷ, അരുൺ ഗോപി തുടങ്ങിയവർക്കൊപ്പമുള്ള ചിത്രങ്ങളുടെയും ചർച്ച പുരോദമിക്കുന്നുണ്ട്. പ്രിയദർശൻ സമവിധാനം ചെയ്യുന്ന പുതിയ ചിത്രത്തിലും ദിലീപാണ് നായകൻ എന്നാണ് സ്ഥിരീകരിക്കാത്ത റിപ്പോര്‍ട്ടുകൾ.