ദിലീപിന്‍റെ ജാമ്യാപേക്ഷയില്‍ വാദം 3 മണിക്ക്

കൊച്ചി: കൊച്ചിയില്‍ നടിയെ ആക്രമിച്ച കേസില്‍ അറസ്റ്റിലായി ആലുവ സബ് ജയിലിൽ റിമാന്‍ഡില്‍ കഴിയുന്ന നടന്‍ ദിലീപിന്‍റെ ജാമ്യാപേക്ഷയില്‍ ഇന്ന് ഉച്ചക്ക് ശേഷം മൂന്ന് മണിയോടെ വാദം നടക്കും. അങ്കമാലി മജിസ്ടേറ്റ് കോടതിയാണ് ജാമ്യാപേക്ഷയിൽ വാദം കേള്‍ക്കുക. 60 ദിവസത്തെ ജുഡീഷ്യല്‍ കസ്റ്റഡി പൂര്‍ത്തിയായാല്‍ സ്വാഭാവിക ജാമ്യത്തിന് അര്‍ഹതയുണ്ടെന്ന് ചൂണ്ടികാട്ടിയാണ് ദിലീപ് ഇത്തവണ ജാമ്യാപേക്ഷ സമര്‍പ്പിച്ചിരിക്കുന്നത്.

കേസിലെ ആദ്യ കുറ്റപത്രത്തില്‍ ദിലീപിനെതിരെ ഇന്ത്യന്‍ ശിക്ഷാനിയമം 376 ഡി വകുപ്പ് അനുസരിച്ചുള്ള കുറ്റകൃത്യം ചുമത്തിയിട്ടില്ല. നടിക്കെതിരായ കുറ്റകൃത്യത്തില്‍ ദിലീപിനെതിരെ ഗൂഡാലോചനക്കുറ്റമാണ് ചുമത്തിയത്.അതിനാൽ തന്നെ ക്രിമിനല്‍ നടപടിചട്ടത്തിലെ 167 (2) വകുപ്പ് പ്രാകാരം ജാമ്യം കിട്ടാന്‍ താൻ അര്‍ഹനാണെന്നാണ് ദിലീപ് ജാമ്യാപേക്ഷയിൽ ചൂണ്ടികാട്ടിയിരിക്കുന്നത്.

രാകേഷ് കുമാര്‍ പോള്‍ വേഴ്‌സസ് സ്‌റ്റേറ്റ് ഓഫ് ആസാം കേസില്‍ ഓഗസ്റ്റ് 16ലെ വിധിയില്‍ പത്ത് വര്‍ഷം വരെ ശിക്ഷ ലഭിക്കാവുന്ന കുറ്റങ്ങളില്‍ 60 ദിവസം പൂര്‍ത്തിയായാല്‍ കുറ്റപത്രം സമര്‍പ്പിച്ചില്ലെങ്കില്‍ സ്വാഭാവിക ജാമ്യത്തിന് അര്‍ഹതയുണ്ടെന്ന് സുപ്രിംകോടതിയും വ്യക്തമാക്കിയിട്ടുണ്ട്. സുപ്രിംകോടതി വ്യക്തമാക്കിയ ഈ വിധി ചൂണ്ടിക്കാട്ടിയാണ് ദിലീപിന്‍റെ ജാമ്യാപേക്ഷ.

ജുഡീഷ്യല്‍ കസ്റ്റഡിയില്‍ ആയതിന് ശേഷം ദിലീപ് സമര്‍പ്പിച്ച നാലാമത്തെ ജാമ്യാപേക്ഷയിലാണ് ഇന്ന് വാദം കേൾക്കുക. രണ്ടാം തവണയാണ് അങ്കമാലി മജിസ്‌ട്രേറ്റ് കോടതിയെ തന്നെ സമീപിക്കുന്നതും. മുൻപ് രണ്ട് തവണ ഹൈക്കോടതിയെ സമീപിച്ചിരുന്നെങ്കിലും ജാമ്യാപേക്ഷ തള്ളുകയായിരുന്നു.

Dileep's Bail Plea to be consider today afternoon

Dileep's Bail Plea to be consider today afternoon by Ankamali Magistrate Court regarding Actress Attack Case