തന്റെ വീടിന് സമീപം തണ്ടര്‍ഫോഴ്‌സ് എത്തിയതെന്തിന്? ബൈജു കൊട്ടാരക്കര

കൊച്ചി: ദിലീപിന് സംരക്ഷണം നല്‍കാനെത്തിയ തണ്ടര്‍ ഫോഴ്‌സ് കൊട്ടാരക്കരയിലെത്തിയത് എന്തിനെന്ന് ബൈജു കൊട്ടാരക്കര. നടിയെ ആക്രമിച്ച കേസില്‍ ദിലീപിനെതിരെ നിലപാട് എടുത്ത സംവിധായകൻ ബൈജുവിൻ്റെ വീട് കൊട്ടാരക്കരയിലാണ്. ഈ സാഹചര്യത്തില്‍ തണ്ടര്‍ ഫോഴ്സിന്റെ കൊട്ടാരക്കരയിലെ വരവിനെ പൊലീസ് കാര്യക്ഷമമായി അന്വേഷിക്കണമെന്ന് സംവിധായകനും നിര്‍മ്മാതാവുമായ ബൈജു കൊട്ടാരക്കര ആവശ്യപ്പെടുന്നു

നിലവില്‍ ദിലീപിന് ഇവിടെ സിനിമയുടെ ഷൂട്ടിങ് ഉള്ളതായി അറിയില്ല. കൊല്ലത്തോ കൊട്ടാരക്കരയിലോ എന്തെങ്കിലും പരിപാടി ഉണ്ടായിരുന്നതായും വിവരം ലഭിച്ചിട്ടില്ല. എന്റെയും സഹോദരിയുടെയും വീടുകളും കുടുംബ വീടുമെല്ലാം കൊട്ടാരക്കര ടൗണിലാണ്. വീട്ടില്‍ നിന്നും കഷ്ടി ഒരുകിലോമീറ്ററോളം അകലെ നിന്നാണ് പൊലീസ് തണ്ടര്‍ ഫോഴ്സിന്റെ വാഹനം കസ്റ്റഡിയില്‍ എടുത്തത്. ഞാന്‍ വീട്ടിലുണ്ടെന്ന് സുഹൃത്തുക്കളില്‍ പലര്‍ക്കും അറിയാമായിരുന്നു. ഈ ദിവസം തന്നെ തണ്ടര്‍ഫോഴ്സ് വാഹനം ഇവിടെ എത്തിയതിന്റെ കാരണം വ്യക്തമല്ല. ഇതേക്കുറിച്ച് പൊലീസ് അന്വേഷിച്ച് സത്യാവസ്ഥ പുറത്തുകൊണ്ടുവരണം- ബൈജു കൊട്ടാരക്കര ആവശ്യപ്പെട്ടു.

ദിലീപ് തണ്ടര്‍ഫോഴ്സിനെ ഉപയോഗിക്കുന്നതായി വാര്‍ത്ത കണ്ടു. ആയ്‌ക്കോട്ടെ, നല്ല കാര്യം. കാശുള്ള ആര്‍ക്കും എത്ര ഫോഴ്സിനെ വേണമെങ്കിലും ഉപയോഗിക്കാം. അതിലൊന്നും പരാതിയില്ല. ദിലീപിന് ഇപ്പോള്‍ ഇത്തരത്തില്‍ സുരക്ഷയൊരുക്കേണ്ടത് അത്യാവശ്യമാണ്. കാരണം നടിയെ ആക്രമിച്ച കേസില്‍ പിടിക്കപ്പെട്ട കൊട്ടേഷന്‍ സംഘാഗംങ്ങള്‍ ജയിലില്‍ തമ്മില്‍ തല്ലിയെന്നും പറഞ്ഞുറപ്പിച്ച പണം നല്‍കാതിരുന്നതാണ് ഇതിന് കാരണമെന്നും മറ്റും പറഞ്ഞുകേള്‍ക്കുന്നു. ഈ സാഹചര്യത്തില്‍ ഇത്തരക്കാരില്‍ നിന്നും സംരക്ഷണം കിട്ടാന്‍ ദിലീപ് തണ്ടര്‍ ഫോഴ്സിനെയൊക്കെ ഉപയോഗിക്കുന്നത് നല്ല കാര്യമാണെന്നും ബൈജു വിശദീകരിക്കുന്നു.

കൊല്ലത്ത് സിപിഐ പാര്‍ട്ടി കോണ്‍ഗ്രസുമായി ബന്ധപ്പെട്ടുള്ള യോഗത്തില്‍ പങ്കെടുക്കാന്‍ പോയിരുന്നു. എനിക്കൊപ്പം സംവിധായകന്‍ വിനയന്‍, എം എ നിഷാദ് എന്നിവരുമുണ്ടായിരുന്നു. തിരിച്ചുവന്ന് വീട്ടില്‍ വിശ്രമിക്കുമ്പോഴാണ് തണ്ടര്‍ ഫോഴ്സ് വാഹനം പൊലീസ് കസ്റ്റഡിയില്‍ എടുത്ത കാര്യം ബന്ധുക്കള്‍ അറിയിച്ചത്. നടിയെ ആക്രമിച്ച കേസിലെ മുഖ്യ അന്വേഷകനായ സി ഐ ബൈജു പൗലോസിനെ വിവരം ധരിപ്പിച്ചു. ഇതേക്കുറിച്ച് അന്വേഷിക്കണമെന്ന് ആവശ്യപ്പെട്ടിട്ടുമുണ്ട്-ബൈജു കൊട്ടാരക്കര പറഞ്ഞു.

Baiju kottarakkara says about Dileep's Security agency

Director Baiju Kottarakkara comments on Dileep's private security agency Thunder force