ആപ്പ്ജില്ല

'ഇതെൻ്റെ അവസാന ചിത്രമായിരിക്കും, ഇനി അഭിനയിക്കുന്നില്ല; മരിക്കുന്നതിന് തലേദിവസം സൗന്ദര്യ പറഞ്ഞു'

സൗന്ദര്യയെ ഞാനാണ് സിനിമയിലേക്ക് എത്തിച്ചത്. അണ്ണന്‍ എന്നായിരുന്നു അവര്‍ എന്നെ വിളിച്ചിരുന്നത്. എനിക്ക് അവള്‍ സഹോദരി ആയിരുന്നു. സൗന്ദര്യയ്ക്ക് തന്നോട് പ്രത്യേക സ്‌നേഹവും ആദരവുമുണ്ടായിരുന്നു എന്നും സംവിധായകൻ ഉദയകുമാര്‍

Samayam Malayalam 28 Aug 2019, 1:10 pm
മലയാളി പ്രേക്ഷകര്‍ അത്ര പെട്ടെന്നൊന്നും സൗന്ദര്യ എന്ന പേര് അന്വര്‍ത്ഥമാക്കുന്ന നടിയെ മറക്കാനിടയില്ല. യാത്രക്കാരുടെ ശ്രദ്ധയ്ക്ക്, കിളിച്ചുണ്ടൻ മാമ്പഴം എന്നീ രണ്ടു മലയാള ചിത്രങ്ങളിലെ ഗംഭീരപ്രകടനം മാത്രം മതി ഈ നടിയെ ഓര്‍ക്കാൻ. തെലുങ്കിലും കന്നഡയിലും തമിഴിലുമടക്കം നിരവധി ചിത്രങ്ങൾ ചെയ്ത് തിളങ്ങി നിൽക്കവേ സൗന്ദര്യ ഒരു വിമാനാപകടത്തിൽ മരണപ്പെട്ടത് ആരാധകരെ അക്ഷരാര്‍ത്ഥത്തിൽ ഞെട്ടിച്ചിരുന്നു.
Samayam Malayalam Soundarya_710x400xt


തിരഞ്ഞെടുപ്പ് പ്രചരണ റാലിക്കിടെ സൗന്ദര്യ സഞ്ചരിച്ചിരുന്ന വിമാനം അപകടത്തില്‍ പെടുകയും അവര്‍ മരണപ്പെടുകയുമായിരുന്നു. അതിന് മുമ്പ് സൗന്ദര്യ ചന്ദ്രമുഖിയുടെ കന്നഡ റീമേക്കിലായിരുന്നു അഭിനയിച്ചിരുന്നത്. തൻ്റെ അവസാന ചിത്രമായിരിക്കും അതെന്ന് സൗന്ദര്യ തന്നോട് പറഞ്ഞിരുന്നുവെന്ന് വെളിപ്പെടുത്തി രംഗത്തെത്തിയിരിക്കുകയാണ് സംവിധായകന്‍ ആര്‍വി ഉദയകുമാര്‍.

സൗന്ദര്യയെ താനാണ് സിനിമയിലേക്ക് കൊണ്ടു വന്നത്. അണ്ണന്‍ എന്നായിരുന്നു അവര്‍ തന്നെ വിളിച്ചിരുന്നത്. തനിക്ക് അവള്‍ സഹോദരിയായിരുന്നു. സൗന്ദര്യയ്ക്ക് തന്നോട് പ്രത്യേക സ്‌നേഹവും ആദരവുമുണ്ടായിരുന്നുവെന്നും ഉദയകുമാര്‍ പറഞ്ഞു. ആദ്യം അവര്‍ തന്നെ അണ്ണാ എന്ന് വിളിച്ചിരുന്നത് ഇഷ്ടപ്പെട്ടിരുന്നില്ലെന്നും സാര്‍ എന്ന് വിളിക്കണമെന്ന് ആവശ്യപ്പെട്ടിരുന്നതായും ഉദയകുമാര്‍ പറഞ്ഞു. എന്നാൽ അവര്‍ തന്നെ അണ്ണൻ എന്ന് തന്നെയാണ് വിളിച്ചിരുന്നത്. പിന്നെ അത് തനിക്ക് ശീലമായെന്നും അദ്ദേഹം വ്യക്തമാക്കി.

സൗന്ദര്യ വാഹനാപകടമുണ്ടായി മരണപ്പെടുന്നതിന് തലേന്ന് തന്നെ വിളിച്ച് സംസാരിച്ച കാര്യം ഇപ്പോൾ സംവിധായകൻ ഒരു പൊതുവേദിയിൽ വെച്ച് വെളിപ്പെടുത്തുകയുണ്ടായി. ചന്ദ്രമുഖിയുടെ കന്നഡ റീമേക്കില്‍ അഭിനയിച്ചിരുന്നു. സിനിമ കഴിഞ്ഞ് അവള്‍ എന്നെ വിളിച്ചു. ഇത് എൻ്റെ അവസാന ചിത്രമായിരിക്കും. ഇനി അഭിനയിക്കാൻ ഉണ്ടാവില്ല. രണ്ട് മാസം ഗര്‍ഭിണിയാണെന്നും അവര്‍ പറഞ്ഞു. തന്നോടും ഭാര്യയോടും അന്ന് സംസാരിച്ചിരുന്നെന്നും ഉദയകുമാര്‍ പറഞ്ഞു.

തണ്ടഗന്‍ എന്ന ചിത്രത്തിൻ്റെ ഓഡിയോ ലോഞ്ചിങ്ങിനിടെ സംസാരിക്കവേയാണ് ഉദയകുമാര്‍ ഇക്കാര്യം പറഞ്ഞത്. ജീവിച്ചിരുന്ന കാലത്ത് സൗന്ദര്യ ക്ഷണിച്ച ഒരു പരിപാടിക്കും പോകാന്‍ കഴിഞ്ഞിരുന്നില്ല. ഒടുവിൽ അവരുടെ സംസ്‌കാര ചടങ്ങിനായിരുന്നു താന്‍ പോയത്. സൗന്ദര്യയുടെ വീട്ടിലെ ഒരു ചുവരിൽ തൻ്റെ വലിയ ചിത്രം കണ്ടതും പൊട്ടിക്കരഞ്ഞു പോയെന്നും അദ്ദേഹം വിതുമ്പലടക്കിക്കൊണ്ട് പറഞ്ഞു.

ആര്‍ട്ടിക്കിള്‍ ഷോ

ട്രെൻഡിങ്