മുസ്ലീമാണോ? എന്നാല്‍ ബുദ്ധിമുട്ടായിരിക്കും! കൊച്ചിയില്‍ ഫ്‌ളാറ്റ് കിട്ടുന്നില്ല, അനുഭവക്കുറിപ്പുമായി പുഴു സംവിധായിക

മമ്മൂട്ടിയുടേതായി നിരവധി സിനിമകളാണ് അണിയറയില്‍ ഒരുങ്ങുന്നത്. പ്രഖ്യാപനം മുതലേ തന്നെ വാര്‍ത്താപ്രാധാന്യം നേടിയ ചിത്രമാണ് പുഴു. കൊച്ചിയില്‍ ഫ്‌ളാറ്റ് അന്വേഷിച്ചപ്പോള്‍ തനിക്ക് നേരിടേണ്ടി വന്ന ദുരനുഭവത്തെക്കുറിച്ച് പറഞ്ഞെത്തിയിരിക്കുകയാണ് സംവിധായികയായ രതീന ഷെര്‍ഷാദ്. ഫേസ്ബുക്ക് കുറിപ്പിലൂടെയായാണ് ദുരനുഭവത്തെക്കുറിച്ച് വ്യക്തമാക്കിയത്.
റത്തീന ന്ന് പറയുമ്പോ? പറയുമ്പോ? മുസ്ലിം അല്ലല്ലോ ല്ലേ? യെസ് ആണ്. ഓ, അപ്പൊ ബുദ്ധിമുട്ടായിരിക്കും മാഡം. കൊച്ചിയിൽ വാടകയ്ക്കു ഫ്ലാറ്റ് അന്വേഷിച്ചു നടപ്പാണ്. മുൻപും ഇത് അനുഭവിച്ചിട്ടുള്ളതാണ്. ഒട്ടും പുതുമ തോന്നിയില്ല. ഇത്തവണ പുതുമ തോന്നിയത് ഏഴു വയസ്സിനു താഴെ പ്രായമുള്ള കുഞ്ഞുങ്ങൾ പാടില്ല എന്ന് പറഞ്ഞപ്പോഴാ. അവര് വീടിന്റെ കഴുക്കോൽ ഇളക്കുമാരിക്കും. പിന്നെ സ്ഥിരം ഫ്രഷ് ഐറ്റംസ്
ഭർത്താവ് കൂടെ ഇല്ലേൽ നഹി നഹി, സിനിമായോ, നോ നെവർ അപ്പോപിന്നെ മേൽ പറഞ്ഞ എല്ലാം കൃത്യമായി തികഞ്ഞ എനിക്കോ? ബാ.. പോവാം. നോട്ട് ആള്‍ മെന്‍ എന്നു പറയുന്നപോലെ നോട്ട് ആള്‍ ലാന്‍ഡ് ലോര്‍ഡ്സ് എന്ന് പറഞ്ഞു നമുക്ക് ആശ്വസിക്കാമെന്നുമായിരുന്നു രതീനയുടെ കുറിപ്പ്.
നേരത്തെയും ഇത്തരത്തിലുള്ള അനുഭവം ഉണ്ടായിട്ടുണ്ടെന്നും ഇത്തവണ അത് കൂടുതലായിരുന്നുവെന്നും രതീന കമന്റ് ചെയ്തിട്ടുണ്ട്. നിരവധി പേരാണ് പോസ്റ്റിന് താഴെയായി അഭിപ്രായങ്ങൾ പങ്കുവെച്ചിട്ടുള്ളത്.
3 വീട് വാടകയ്ക്ക് കൊടുത്തിട്ടുണ്ട്. ബ്രോക്കർസ് ആൾക്കാരെ കൊണ്ട് വരുമ്പോ പറയും " അവര് ഹിന്ദുക്കളാണ് ട്ടോ " "ബ്രാഹ്മിൻസാണ് ".. അയിന്? ന്നെ തിരിച്ചു ചോയ്ച്ചിട്ടുള്ളൂ. കുട്ടികൾ ഉണ്ടോ, ഓക്കേ... ചുമരിൽ വരച്ചോട്ടെ. പോവുമ്പോ പെയിന്റ് അടിച്ചു തന്നാൽ മതി. നായ ഉണ്ടോ. സന്തോഷം. ഇടക്ക് ഞങ്ങൾക്കും കളിക്കാല്ലോ. സിനിമാക്കാർ ആരും ഇന്നേവരെ വന്നിട്ടില്ല. വന്നാൽ വാടക ചിലപ്പോ കുറച്ചു കൊടുക്കും. ഇടക്ക് ചില മുസ്ലിം ബ്രോക്കർമാർ പറയും " പേടിക്കണ്ട ഞങ്ങളുടെ ആളുകൾ അല്ല ന്ന്‌ " അവരോട് മറുപടി ഒന്നും പറയില്ല. വീടിന്റെ ഒക്കെ പേര് കാണിച്ചു കൊടുക്കും "റസിയ" എന്റെ അമ്മയുടെ പേരാണ് എന്നായിരുന്നു ഒരാൾ കമന്റ് ചെയ്തത്.