കേരളത്തിലെ ചലച്ചിത്ര മേള നിര്‍ത്തരുതെന്ന് കിം കി ഡുക്ക്

കേരളത്തിൽ നടക്കുന്ന അന്താരാഷ്ട്ര ചലച്ചിത്രമേള മാറ്റി വെയ്ക്കരുതെന്ന് കൊറിയന്‍ ചലച്ചിത്ര സംവിധായകന്‍ കിം കി ഡുക്ക്. കേരളത്തിലെ പ്രളയത്തില്‍ അകപ്പെട്ട ജനങ്ങളുടെ ദുഖത്തില്‍ പങ്കുചേരുന്നതായി പറഞ്ഞ അദ്ദേഹം കേരളത്തിലെ ചലച്ചിത്രോത്സവം ലോകമ്പാടുമുള്ള സിനിമാ സ്‌നേഹികള്‍ നോക്കി കാണുന്നത് ആണെന്നും അതിനാല്‍ അത് മാറ്റി വെയ്ക്കരുതെന്നും പറഞ്ഞു. കസാഖിസ്ഥാനിലെ അല്‍മാട്ടി ചലച്ചിത്ര മേളയില്‍ വെച്ച്‌ സംവിധായകന്‍ ഡോ. ബിജുവിൻ്റെയും നടന്‍ പ്രകാശ് ബാരെയുടെയും വഴിയാണ് കിം കിഡുക്ക് തൻ്റെ സന്ദേശം അറിയിച്ചിരിക്കുന്നത്. കേരള ചലച്ചിത്ര മേള ലോകമെമ്പാടുമുള്ള സിനിമാ സ്നേഹികള്‍ക്ക് പ്രിയപ്പെട്ടതാണെന്നും അതുകൊണ്ട് മേള നിര്‍ത്തരുതെന്നും കിം കി ഡുക്ക് കൊറിയന്‍ ഭാഷയിലെഴുതിയ കത്തിലൂടെ സര്‍ക്കാരിനോടും മലയാളികളോടും അഭ്യര്‍ത്ഥിച്ചു.


ഡോ. ബിജുവിൻ്റെ ഫേസ്ബുക്ക് പോസ്റ്റ്

കേരള ചലച്ചിത്ര മേള നിര്‍ത്തരുത് എന്ന് കിം കി ഡുക്ക് കേരളത്തിലെ പ്രളയത്തില്‍ പെട്ട ജനങ്ങളുടെ ദുരിതത്തില്‍ ഏറെ ദുഃഖം ഉ ണ്ടെന്നും മനസ്സ് കൊണ്ട് അവരോടൊപ്പം ഉണ്ടെന്നും കിം പറഞ്ഞു. കേരള ചലച്ചിത്ര മേള ലോകമെമ്പാടുമുള്ള സിനിമാ സ്‌നേഹികള്‍ നോക്കി കാണുന്ന ഒന്നാണെന്നും അത് നിര്‍ത്തിവെക്കരുത് എന്ന് സര്‍ക്കാറിനോടും കേരളത്തിലെ ജനങ്ങളോടും അഭ്യര്‍ത്ഥിക്കുന്നതായും കിം അറിയിച്ചു. അതിജീവനത്തില്‍ കലയ്ക്ക് വലിയൊരു പങ്ക് ഉണ്ടെന്നും അതുകൊണ്ടു തന്നെ കല ഒരിക്കലും മാറ്റി വെക്കരുത് എന്നും അദ്ദേഹം കൂട്ടിച്ചേര്‍ത്തു. കിമ്മിൻ്റെ ഏറ്റവും പുതിയ സിനിമയായ 'ഹ്യൂമന്‍, സ്പെയ്സ്, ടൈമ് , ഹ്യൂമന്‍' ൻ്റെ പ്രദര്‍ശനം അല്‍മാട്ടി ചലച്ചിത്ര മേളയില്‍ കണ്ടിറങ്ങിയപ്പോഴാണ് കേരള ചലച്ചിത്ര മേള നടത്തണം എന്ന് സര്‍ക്കാരിനോട് ആവശ്യപ്പെട്ടുകൊണ്ട് കിം കി ഡുക്ക് സ്വന്തം കൈപ്പടയില്‍ കൊറിയന്‍ ഭാഷയില്‍എഴുതിയ കത്ത് ഞങ്ങളെ ഏല്‍പ്പിച്ചത്.

നന്ദി പ്രിയ കിം..കേരളത്തിലെ ജനങ്ങളോടും കേരള ചലച്ചിത്ര മേളയോടും ഉള്ള സ്‌നേഹത്തിന്.. കലയുടെ മാനവികതയ്ക്ക്.
(കിം കി ഡുക്കിന് കൊറിയന്‍ ഭാഷ മാത്രമേ അറിയുള്ളൂ എന്ന കാര്യം ശ്രദ്ധിക്കുമല്ലോ)