ദുൽഖറിന്‍റെ കുഞ്ഞുമാലാഖയ്ക്ക് ഇന്ന് ഒന്നാം പിറന്നാൾ

ദുൽഖർ സൽമാന്‍റെയും അമാലിന്‍റെയും കുഞ്ഞുമാലാഖ മറിയം അമീറ സല്‍മാന്‍റെ ഒന്നാം പിറന്നാളാണ് ഇന്ന്. അമാലിനും കുഞ്ഞിനൊപ്പമുള്ള ചിത്രം പങ്കുവെച്ച് ദുൽഖർ തന്നെയാണ് ഇക്കാര്യം ആരാധകരുമായി പങ്കുവച്ചത്. ഇതാദ്യമായാണ് ദുൽഖർ മകളുടെ ചിത്രം ഫേസ്ബുക്കിൽ പങ്കുവയ്ക്കുന്നത് എന്ന പ്രത്യേകത കൂടിയുണ്ട് ഈ പിറന്നാൾ ദിനത്തിന്.

''ഞങ്ങളുടെ ജീവിതത്തിലെ സ്നേഹത്തിന് സന്തോഷം നിറഞ്ഞ നല്ലൊരു പിറന്നാൾ ദിനമാശംസിക്കുന്നു. നിനക്ക് ഒരു വയസ്സായെന്ന് വിശ്വസിക്കാൻ കഴിയുന്നില്ല. നീ ഞങ്ങൾക്ക് കിട്ടിയ ഏറ്റവും വലിയ അനുഗ്രഹമാണ്. ഇതിനോടകം തന്നെ നീ വലിയൊരു ആളായി മാറിയിരിക്കുന്നു. ഞങ്ങളുടെ ജീവിതത്തിലെ സന്തോഷവും സ്നേഹവുമെല്ലാം നീയാണ്''.... എന്ന കുറിപ്പോടെയാണ് ദുൽഖർ ചിത്രം പങ്കുവച്ചത്.




2011 ലായിരുന്നു അമാല്‍ സൂഫിയയെ താരം ജീവിതസഖിയാക്കിയത്. 2017 മെയ് അഞ്ചിനാണ് ഇവരുടെ ജീവിതത്തിലേക്ക് കുഞ്ഞതിഥിയായി മറിയം എത്തിയത്. അന്ന് തൊട്ട് ഇന്നുവരെ ആരാധകർക്കിടയിലെ താരമാണ് കുഞ്ഞ് മറിയവും. ദുൽഖറിന്‍റെ കുഞ്ഞ് മറിയത്തെ ഒരുനോക്ക് കാണാൻ ആരാധകര്‍ നിരവധി തവണ കാത്തിരുന്നുവെങ്കിലും താരം ചിത്രങ്ങളൊന്നും പങ്കുവച്ചിരുന്നില്ല. ഇതാദ്യമായാണ് താരം വ്യക്തമായൊരു ചിത്രം പങ്കുവയ്ക്കുന്നത്.