ഗംഗേ വിളി ഇതിലുമുണ്ട്
ശോഭനയും സുരേഷ് ഗോപിയും ബസിലിരിക്കുന്ന ചിത്രമാണ് പോസ്റ്ററിലുൾപ്പെടുത്തിയിരിക്കുന്നത്. അവസാനം ബസിൽ കയറിയത് സത്യൻ അന്തിക്കാടിന്റെ സിനിമയിലാണെന്ന് ചിത്രത്തിൻ്റെ ഷൂട്ടിങ്ങിനിടെ ശോഭന പറഞ്ഞിരുന്നു. എന്നാൽ കഴിഞ്ഞ ദിവസം പുറത്തു വിട്ട ചിത്രത്തിൻ്റെ ട്രെയിലറിൽ ഗംഗേ എന്ന സുരേഷ്ഗോപിയുടെ ഹിറ്റ് ഡയലോഗ് റീക്രിയേറ്റ് ചെയ്തിട്ടുണ്ടെന്ന് വ്യക്തമാക്കിയിരുന്നു.
ഫെബ്രുവരി 7ന് തീയേറ്ററുകളിൽ
സത്യൻ അന്തിക്കാട് സംവിധാനം ചെയ്ത ടി.പി ബാലഗോപാലൻ എം.എ എന്ന ചിത്രത്തിൽ ശോഭന ബസിൽ യാത്ര ചെയ്യുന്ന രംഗമുണ്ട്. മോഹൻലാലിനൊപ്പമുള്ള ഒരു രംഗമായിരുന്നു അത്. എന്നാൽ ഇക്കാര്യത്തിൽ തിരുത്തലുമായി ആരാധകരും രംഗത്തെത്തിയിരുന്നു. ശോഭന അവസാനമായി ബസിൽ കയറിയത് 1997ൽ പുറത്തിറങ്ങിയ കളിയൂഞ്ഞാലിലാണെന്നാണ് ആരാധകരുടെ പക്ഷം.
ഗംഗയും നകുലനും?
അതിന് പിന്നാലെ പുറത്തു വന്ന പോസ്റ്ററിന് ലഭിക്കുന്ന കമൻ്റുകളാണ് ഏറെ രസകരം. ഗംഗയും നകുലനും തമ്മിൽ അക്കാര്യത്തിൽ ഒരു തീരുമാനമായോ എന്നും രണ്ടാളും കൂടി ബസിലൊക്കെ ഇതെങ്ങോട്ടാണെന്നും അല്ലിക്ക് ആഭരണമെടുക്കാനാണോ എന്നുമൊക്കെ കുറിച്ച് മണിച്ചിത്രത്താഴിൽ ഇരുവരും അവതരിപ്പിച്ച കഥാപാത്രങ്ങളെ ചൂണ്ടിക്കാട്ടുകയാണ് ആരാധകർ. ദുൽഖർ നായകനാകുന്ന ചിത്രത്തിൽ നായികയായി എത്തുന്നത് കല്യാണി പ്രിയദർശനാണ്. വരനെ ആവശ്യമുണ്ട് എന്ന് പേരിട്ടിരിക്കുന്ന ഈ ചിത്രം സംവിധാനം ചെയ്യുന്നത് സത്യൻ അന്തിക്കാടിൻ്റെ മകൻ അനൂപ് സത്യൻ അന്തിക്കാടാണ്
'തിര'യ്ക്ക് ശേഷം 'വരനെ' തേടി ശോഭന
ശോഭന ഇതിനുമുന്പ് അഭിനയിച്ച മലയാള ചിത്രം വിനീത് ശ്രീനിവാസന് സംവിധാനം ചെയ്ത് 2013ല് പുറത്തെത്തിയ 'തിര'യാണ്. അതിന് മുൻപ് ശോഭന അഭിനയിച്ച മകൾക്ക് എന്ന ചിത്രത്തിലായിരുന്നു സുരേഷ്ഗോപിയുമായി ശോഭന ഒന്നിച്ചഭിനയിച്ചിട്ടുള്ളത്. 2005ൽ പുറത്തിറങ്ങിയ ഈ ചിത്രം സംവിധാനം ചെയ്തത് ജയരാജ് ആയിരുന്നു.