തന്‍റെ ചിത്രം ഉപയോഗിച്ചുള്ള വ്യാജ പ്രൊഫൈലിനെതിരെ സജിത

സോഷ്യല്‍ മീഡിയയില്‍ ഫേക്ക് ഐഡികള്‍ ഉണ്ടാക്കുന്ന പൊല്ലാപ്പുകള്‍കൊണ്ട് സെലിബ്രിറ്റികള്‍ക്ക് പലപ്പോഴും തലവേദനയാണ്. പ്രമുഖ ചലച്ചിത്ര-നാടക നടി സജിതാ മഠത്തില്‍ ഇപ്പോള്‍ ഫേസ്‌ബുക്കില്‍ തന്റെ ചിത്രം ഉപയോഗിക്കുന്ന മറ്റൊരു പ്രൊഫൈല്‍ കണ്ട് ഞെട്ടിയിരിക്കുകയാണ്. ഫേക്ക് അക്കൌണ്ടിന്റെ അഭിപ്രായ പ്രകടനങ്ങളെക്കുറിച്ച് ആരാധകര്‍ നടിയോട് സംസാരിച്ചു തുടങ്ങിയതോടെയാണ് സംഭവം പുറത്തുവന്നത്.

'രശ്മി മഠത്തില്‍ ദിനേശന്‍' (Reshmi Madathil Dineshan) എന്ന പേരിലുള്ള ഐഡി ഉപയോഗിക്കുന്നത് സജിതാ മഠത്തിലിന്റെ ചിത്രമാണ്. പുറത്തിറങ്ങുന്ന സിനിമകള്‍, പൊതു വിഷയങ്ങള്‍ തുടങ്ങിയവയിലെല്ലാം ഈ ഐഡിയില്‍ നിന്ന് അഭിപ്രായ പ്രകടനം ഉണ്ടാകുന്നുണ്ട്. കമന്റുകള്‍ക്ക് മറുപടി നല്‍കാനും പ്രൊഫൈല്‍ സമയം കണ്ടെത്തുന്നു. സജിതാ മഠത്തിലിന്റെ നിരവധി ചിത്രങ്ങള്‍ പ്രൊഫൈലില്‍ ഉപയോഗിച്ചിരിക്കുന്നു. താന്‍ യാത്രയിലാണ് എന്നത് ഉള്‍പ്പെടെയുള്ള സ്വകാര്യ വിവരങ്ങളും പോസ്റ്റ് ചെയ്താണ് ഫേക്ക് പ്രൊഫൈല്‍ വിശ്വാസ്യത നേടിയിരിക്കുന്നത്.

രശ്മി മഠത്തില്‍ ദിനേശന്‍ എന്ന പ്രൊഫൈല്‍ 2500ഓളം പേര്‍ ഫോളോചെയ്യുന്നുണ്ട്. കൊച്ചിയില്‍ താമസിക്കുന്നു എന്നാണ് ഈ പ്രൊഫൈലും അവകാശപ്പെടുന്നത്. 'ചേച്ചി മേജര്‍ രവിയെ കുറിച്ച് എഴുതിയതൊക്കെ വായിച്ചു' എന്ന് തന്നോട് ഒരാള്‍ പറഞ്ഞതാണ് ഫേക്ക് ഐഡിയെ കണ്ടെത്താന്‍ വഴിയായതെന്ന് സജിതാ മഠത്തില്‍ പ്രതികരിച്ചു. ഈ പ്രൊഫൈലിന് പിന്നില്‍ ആരാണെന്ന് കണ്ടെത്താന്‍ സഹായിക്കണമെന്നും അഭ്യര്‍ഥിച്ചിട്ടുണ്ട്.

സജിതാ മഠത്തിലിന്റെ ഫേസ്‌ബുക്ക് പ്രതികരണം വായിക്കാം....



Sajitha Mdathil fb post
facebook fake account sajitha madathil.