പൃഥ്വിരാജ്
ഇന്ന് നടനെന്ന നിലയില്‍ മാത്രമല്ല, സംവിധായകനും നിര്‍മ്മാതാവുമൊക്കെയായി നിറഞ്ഞു നില്‍ക്കുന്ന മലയാളത്തിന്‍റെ യങ് സൂപ്പര്‍ സ്റ്റാര്‍ ആണ് പൃഥ്വിരാജ്. മലയാള സിനിമയിലെ അതുല്യ നടന്‍ സുകുമാരന്‍റേയും മല്ലികയുടേയും മകനാണ് പൃഥ്വിരാജ്. രഞ്ജിത്ത് ചിത്രം നന്ദനത്തിലൂടെയായിരുന്നു അരങ്ങേറ്റം.
ഇന്ദ്രജിത്ത്
സുകുമാരന്‍-മല്ലിക താര ദമ്പതികളുടെ മൂത്തമകന്‍. മലയാളത്തിലെ ഏറ്റവും മികച്ച നടന്മാരിലൊരാള്‍. നായകനും വില്ലനും സഹതാരവുമെല്ലാമായി പ്രേക്ഷകരുടെ ഹൃദയം ജയിച്ചു നില്‍ക്കുന്ന ഇന്ദ്രജിത്തിന്‍റെ അരങ്ങേറ്റം വിനയന്‍റെ ഊമപ്പെണ്ണിന് ഉരിയാടാ പയ്യന്‍ എന്ന ചിത്രത്തിലൂടെയായിരുന്നു.
ദുല്‍ഖര്‍ സല്‍മാന്‍
മലയാളത്തിന്‍റെ മെഗാ സ്റ്റാര്‍ മമ്മൂട്ടിയുടെ മകനായ ദുല്‍ഖര്‍ ഇന്ന് തെന്നിന്ത്യയിലെ ഏറ്റവും വലിയ താരങ്ങളിലൊരാളാണ്. സെക്കന്‍റ് ഷോയിലൂടെ അരങ്ങേറിയ ദുല്‍ഖര്‍ ബോളിവുഡിലും നായകനായി മാറി. മെഗാ സ്റ്റാറിന്‍റെ മകന്‍ എന്ന അഡ്രസ് ഇല്ലാതെ സ്വന്തം മേല്‍വിലാസം നേടിയെടുത്തിട്ടുണ്ട് ദുല്‍ഖര്‍ ഇന്ന്.
വിനീത് ശ്രീനിവാസന്‍
നടന്‍, തിരക്കഥാകൃത്ത്, സംവിധായകന്‍, നിര്‍മ്മാതാവ് എന്നിങ്ങനെ സിനിമയുടെ പല മേഖലകളില്‍ കഴിവ് തെളിയുക്കുകയും സ്വന്തം വ്യക്തി മുദ്ര പതിപ്പിക്കുകയും ചെയ്ത താരമാണ് ശ്രീനിവാസന്‍. അദ്ദേഹത്തിന്‍റെ മകനായ വിനീതും സിനിമയുടെ പല മേഖലകളില്‍ സ്വന്തം വ്യക്തിമുദ്ര പതിപ്പിച്ചു കഴിഞ്ഞിരിക്കുന്നു. ഗായകനായി തുടങ്ങിയ വിനീത് ഇന്ന് നടനും സംവിധായകനും തിരക്കഥാകൃത്തും നിര്‍മ്മാതാവുമൊക്കെയാണ്.
ഷെയ്ന്‍ നിഗം
ഇന്ന് മലയാള സിനിമയിലെ ഏറ്റവും ശ്രദ്ധേയനായ യുവതാരമാണ് ഷെയ്ന്‍. മിമിക്രിയിലൂടേയും സിനിമകളിലൂടേയും മലയാളികളുടെ പ്രിയങ്കരനായി മാറിയ അബിയുടെ മകനാണ് ഷെയ്ന്‍. കുട്ടിക്കാലം മുതലെ അഭിനയ രംഗത്തുള്ള ഷെയ്ന്‍ നായകനാകുന്നത് കിസ്മത്തിലൂടെയായിരുന്നു. പിന്നീട് താരത്തിന് തിരിഞ്ഞു നോക്കേണ്ടി വന്നിട്ടില്ല.
അര്‍ജുന്‍ അശോകന്‍
എല്ലാവരുടേയും പ്രിയങ്കരനായ ഹരിശ്രീ അശോകന്‍റെ മകന്‍. ഹാസ്യ കഥാപാത്രങ്ങളിലൂടെയായിരുന്നു ഹരിശ്രീ അശോകന്‍ ശ്രദ്ധ നേടിയതെങ്കിലും ക്യാരക്ടര്‍ റോളുകളിലൂടെയാണ് മകന്‍ അര്‍ജുന്‍ സ്വന്തമായ ഇടം നേടിയെടുക്കുന്നത്. പറവ, ജൂണ്‍, ബിടെക് തുടങ്ങിയ സിനിമകളിലൂടെ അര്‍ജുന്‍ പ്രേക്ഷകരുടെ പ്രിയങ്കരനായി മാറിയിരിക്കുകയാണ്.
കാളിദാസ് ജയറാം
മലയാളത്തിന്‍റെ പ്രിയപ്പെട്ട ജയറാം-പാര്‍വ്വതി താര ദമ്പതികളുടെ മകനാണ് കാളിദാസ്. എബ്രിഡ് ഷെെന്‍ സംവിധാനം ചെയ്ത പൂമരത്തിലൂടെയായിരുന്നു കാളിദാസിന‍്റെ അരങ്ങേറ്റം.
ഗോകുല്‍ സുരേഷ്
സൂപ്പര്‍ താരം സുരേഷ് ഗോപിയുടെ മകന്‍. അരങ്ങേറ്റ ചിത്രം മുത്തുഗൗ ആയിരുന്നു. ഇതിനോടകം നിരവധി ചിത്രങ്ങളില്‍ അഭിനയിച്ച് കഴിഞ്ഞ ഗോകുല്‍ മലയാള സിനിമ ഏറെ പ്രതീക്ഷയോടെ ഉറ്റു നോക്കുന്ന യുവതാരങ്ങളിലൊരാളാണ്.
പ്രണവ് മോഹന്‍ലാല്‍
മലയാളികളുടെ പ്രിയപ്പെട്ട ലാലേട്ടന്‍, സൂപ്പര്‍ സ്റ്റാര്‍ മോഹന്‍ലാലിന്‍റെ മകനാണ് പ്രണവ്. ജീത്തു ജോസഫ് സംവിധാനം ചെയ്ത ആദിയിലൂടെയായിരുന്നു അരങ്ങേറ്റം. രണ്ട് ചിത്രങ്ങള്‍ മാത്രമേ ചെയ്തിട്ടുള്ളുവെങ്കിലും സ്വന്തമായൊരു ആരാധകവൃന്ദം സൃഷ്ടിക്കാന്‍ പ്രണവിന് സാധിച്ചിരിക്കുന്നു.
ധ്യാന്‍ ശ്രീനിവാസന്‍
ശ്രീനിവാസന്‍റെ രണ്ടാമത്തെ മകന്‍. സഹോദരന്‍ വിനീതിന്‍റെ തിരയിലൂടെ അരങ്ങേറിയ ധ്യാന്‍ ഇന്ന് നടന്‍ മാത്രമല്ല ഹിറ്റ് സിനിമയുടെ സംവിധായകനുമാണ്.