Also Read: നയന്താരയെ കാണാന് പോകാന് പോലും പേടിയായിരുന്നു, ഒരു നോക്ക് ദൂരെ നിന്ന് കാണാന് ആഗ്രഹിച്ച ആളാണ് വിഘ്നേശ് ശിവന്; മാഡം എന്ന് വിളിച്ച് കൊണ്ട് കാണാന് പോയ ആള് ഇന്ന് വിഘ്നേശിന്റെ ഭാര്യയായ കഥ
നയൻതാരയെ കുറിച്ച്
തൻ്റെ സിനിമാ ജീവിതത്തെക്കുറിച്ച് സത്യൻ അന്തിക്കാടെഴുതിയ ഓർമ്മക്കുറിപ്പുകളൊന്നിൽ അദ്ദേഹം നയൻതാരയെക്കുറിച്ച് പറയുന്നുണ്ട്. താൻ പ്രതീക്ഷിക്കുന്നതിനപ്പുറം പിന്നീട് വളർന്നു പന്തലിച്ച നയൻതാരയുടെ കരിയറിന് പിന്നിലെ രഹസ്യങ്ങളിലൊന്ന് വിവരിക്കുകയായിരുന്നു അദ്ദേഹം. ആദ്യ സിനിമയായ മനസ്സിനക്കരെ പായ്ക്കപ്പായപ്പോൾ യാത്ര പറയാനെത്തിയ നയൻതാര തന്റെ ഇനിയുള്ള സിനിമാ ജീവിതത്തിന് എന്തെങ്കിലും ഉപദേശം തരാനുണ്ടോ എന്നദ്ദേഹത്തോട് ചോദിച്ചു. ഏതു സിനിമയിലായാലും, ഭാവിയിൽ എത്ര വലിയ താരമായാലും ചെയ്യുന്ന ജോലിയോട് ആത്മാർത്ഥതയുണ്ടാവണം, കൃത്യനിഷ്ഠ പാലിക്കാൻ ശ്രമിക്കണം എന്നായിരുന്നു സത്യൻ അന്തിക്കാട് അവരോടു പറഞ്ഞത്.
തെന്നിന്ത്യൻ സൂപ്പർ ലേഡി സ്റ്റാർ
വർഷങ്ങൾ പലതു കഴിഞ്ഞു. മലയാളം വിട്ട് തമിൾ , തെലുഗു എന്നിങ്ങനെ സൗത്ത് ഇന്ത്യയിലെ ഏറ്റവും വിലപിടിച്ച താരമെന്ന നിലയിലേക്ക് അവർ വളർന്നു. അങ്ങനെയിരിക്കെ എവിടെയോ വച്ച് അദ്ദേഹം വീണ്ടും നയൻതാരയെ കണ്ടുമുട്ടി . കുശലപ്രശ്നങ്ങൾക്കിടയിൽ വർഷങ്ങൾക്ക് മുമ്പ് അദ്ദേഹം കൊടുത്ത ഉപദേശം ഇപ്പോളും പാലിക്കാൻ താൻ ശ്രമിക്കുന്നുണ്ടെന്ന് അവർ പറഞ്ഞു. അതെന്താണെന്ന് അവർ വിശദീകരിച്ചപ്പോളാണ് സത്യൻ അന്തിക്കാടിന് അതോർമ്മ വന്നത് തന്നെ. സിനിമയിൽ എത്രയോ പേരെ കാണുന്നു. എത്രയോ പേർ ഇതുപോലെ തന്നോട് ഉപദേശങ്ങളും അനുഗ്രഹവും ഒക്കെ ചോദിച്ചിരുന്നു. എന്നാൽ പറയുന്നതൊക്കെ മുഖവിലയ്ക്കെടുക്കുന്നവർ അതിലൊരു ന്യൂനപക്ഷം മാത്രമാണ്.
വെറും അവകാശ വാദമായിരുന്നില്ല
താൻ അന്ന് ലളിതമായി പറഞ്ഞ ഒരു കാര്യം അതിന്റെ ഗൗരവത്തിലെടുത്തു ഇപ്പോളും അത് പാലിക്കുന്നു എന്നത് അത്ഭുതത്തോടെയാണ് അദ്ദേഹം കേട്ടത്. എന്നാൽ അതൊരു വെറും അവകാശ വാദമായിരുന്നില്ല എന്നും ജോലി സ്ഥലത്ത് അവർ പാലിക്കുന്ന ഡിസിപ്ലിൻ സിനിമയിലെ സീനിയർ താരങ്ങളിൽ പോലും കാണാനാവാത്ത ഒരു ഗുണമാണെന്ന് അവരെ വച്ച് സിനിമകൾ ചെയ്തിട്ടുള്ളവർ പലരും അദ്ദേഹത്തോട് തന്നെ പിന്നീട് പറയുകയുണ്ടായി.നടിമാർക്ക് വലിയ വിപണി മൂല്യമൊന്നുമില്ലാത്ത ഒരു ഇൻഡസ്ട്രിയിൽ കോടികൾ മൂല്യമുള്ള ഒരു വലിയ താരമായി നയൻതാര വളർന്നത് അവരുടെ പ്രൊഫഷണലിസം കൊണ്ട് മാത്രമാണ്.
ഡിമാൻഡിങ് ആയ ഒരു താരമായി മാറി
ഹേമ മാലിനിയും രേഖയും ശ്രീദേവിയും തുടങ്ങി അസിൻ, വിദ്യാബാലൻ വരെ നീളുന്ന നടിമാർ ബോളിവുഡിൽ ചരിത്രം സൃഷ്ടിച്ചതുപോലെ പലയിടത്തും പോയി ഭാഗ്യം പരീക്ഷിക്കാൻ അവർ തയ്യാറായിരുന്നില്ല. വളരെ ഫോക്കസ്ഡ് ആയി സ്വന്തം കരിയർ വളർത്തിയെടുക്കാൻ അവർക്ക് സാധിച്ചു. താൻ നായികയായി അഭിനയിക്കുന്ന ചിത്രങ്ങളിൽ തന്റെ താല്പര്യങ്ങളും കണക്കിലെടുക്കേണ്ടതുണ്ടെന്നും ഡിമാൻഡിങ് ആയ ഒരു താരമായി മാറി വേണം സിനിമയിലെ പുരുഷാധിപത്യത്തെ വെല്ലുവിളിക്കേണ്ടതെന്നും തുറന്നു പറഞ്ഞിട്ടുള്ള ഒരേയൊരു താരമായിരിക്കും ഒരുപക്ഷെ നയൻതാര. വളരെ അപൂർവ്വമായി മാത്രം ഇന്റർവ്യൂകൾ കൊടുക്കുന്ന, സിനിമ പ്രൊമോഷൻസ് ചെയ്യുന്ന ഒരു സൂപ്പർ താരമാണ് നയൻ താര. സിമ്പുവും പ്രഭുദേവയും നായകനോ വില്ലനോ ആയ അവരുടെ പ്രണയവും പരാജയവും ഒന്നും അവരുടെ കരിയറിനെ ബാധിച്ചിട്ടേയില്ല. സിനിമാ ജീവിതത്തിൽ ഇരുപതു വർഷം തികയ്ക്കാൻ പോകുന്ന നയൻതാരയ്ക്ക് സന്തോഷം നിറഞ്ഞ വിവാഹാശംസകൾ !