ദിലീപിന് തീയേറ്റര്‍ സംഘടനയുടെയും പിന്തുണ

തിരുവനന്തപുരം: ദിലീപിനെ തിരിച്ചെടുത്തതില്‍ പ്രതിഷേധിച്ച്‌ നാലു നടിമാര്‍ രാജിവച്ചതിനെക്കുറിച്ച്‌ പ്രതികരിക്കാതെ സിനിമ സംഘടനകൾ. അമ്മയിലേക്ക് തിരിച്ചെത്തിയെങ്കിലും തത്കാലം യോഗങ്ങളിലോ താരസംഘടനയുമായി ബന്ധപ്പെട്ട ഷോകളിലോ ദിലീപ് പങ്കെടുക്കില്ല. നടിമാര്‍ രാജിവച്ച സംഭവത്തെക്കുറിച്ച്‌ പ്രതികരിക്കാനില്ലെന്നും കോടതിയുടെ വിലക്കുള്ളതിനാല്‍ പരസ്യപ്രതികരണത്തിന് ദിലീപുണ്ടാവില്ല.

അതേസമയം കോടതി കുറ്റക്കാരനാണെന്ന് വിധിക്കുന്നത് വരെ ദിലീപിന് പൂര്‍ണ പിന്തുണ നല്‍കുമെന്ന് തിയേറ്റര്‍ സംഘടനയായ ഫിയോകിന്‍റെ പ്രസിഡന്‍റ് ആന്‍റണി പെരുന്പാവൂര്‍ ദീപികയോട് പറഞ്ഞു. ദിലീപിനെ അറസ്റ്റു ചെയ്തപ്പോള്‍ സംഘടനയില്‍ നിന്ന് സസ്പെന്‍ഡ് ചെയ്തിരുന്നു. പിന്നീട് ജാമ്യം നേടി എത്തിയപ്പോള്‍ പ്രസിഡന്‍റ് സ്ഥാനം അദ്ദേഹത്തിന് നല്‍കാന്‍ തയാറായിരുന്നു. എന്നാല്‍ അദ്ദേഹം സ്ഥാനം നിരസിക്കുകയാണ് ചെയ്തതെന്നും ആന്‍റണി പെരുമ്പാവൂ‍ർ പറഞ്ഞു.