Pradeep Sarkar:മാറുന്ന കാലത്തിനൊപ്പം സഞ്ചരിച്ച സംവിധായകൻ! 'പരിനീത'യുൾപ്പെടെയുള്ള ഹിറ്റുകൾ സമ്മാനിച്ച ഫിലിംമേക്കർ പ്രദീപ് സർക്കാർ വിടവാങ്ങി

പതിറ്റാണ്ടുകൾ നീണ്ട നിന്ന അദ്ദേഹത്തിന്റെ സിനിമ കരിയറിൽ നിരവധി റോളുകൾ അദ്ദേഹം അനായാസം കൈകാര്യം ചെയ്തു. സിനിമ, മ്യൂസിക് വീഡിയോകൾ, വെബ് സീരിസ്, പരസ്യങ്ങൾ എന്നിവയുടെ എഴുത്തുകാരൻ, നിർമ്മാതാവ്, സംവിധായകൻ എന്നീ നിലകളിൽ അദ്ദേഹം തിളങ്ങി. രാജ്യത്തെ ഏറ്റവും മികച്ച പരസ്യ-ചലച്ചിത്ര നിർമ്മാതാക്കളിൽ ഒരാളെന്നാണ് അദ്ദേഹമറിയപ്പെടുന്നത്. റാണി മുഖർജി പ്രധാന വേഷത്തിലെത്തിയ മർദാനി (mardaani -2014), സെയ്ഫ് അലി ഖാൻ, വിദ്യാ ബാലൻ എന്നിവർ നായിക നായകൻമാരായെത്തിയ പരിനീത (parineeta- 2005) എന്നീ ചിത്രങ്ങളാണ് അദ്ദേഹത്തിന്റെ മികച്ച സിനിമകൾ. കഥാകൃത്ത് എന്ന നിലയിൽ പ്രദീപ് കഴിവ് തെളിയിച്ച നിരവധി പ്രൊജക്ടുകളുണ്ട്. പരസ്യ ചിത്ര നിർമ്മാണത്തിലൂടെയായിരുന്നു അദ്ദേഹം കലാരം​ഗത്തേക്ക് പ്രവേശിച്ചത്.

പരിനീതയിലൂടെയായിരുന്നു സംവിധാന രം​ഗത്തേക്ക് അദ്ദേഹം ചുവടുവച്ചത്. സെയ്ഫ് അലി ഖാൻ, വിദ്യ ബാലൻ, സഞ്ജയ് ദത്ത്, ദിയാ മിർസ, റൈമ സെൻ, സബ്യസാചി ചക്രബർത്തി തുടങ്ങിയ പ്രതിഭകളെ അണിനിരത്തിയായിരുന്നു ചിത്രം ഒരുക്കിയത്. ചിത്രം ബോക്സോഫീസിൽ മികച്ച കളക്ഷൻ നേടുകയും ചെയ്തിരുന്നു. മികച്ച നിരൂപക പ്രശംസയും ചിത്രം നേടി. മികച്ച കഥയും സം​ഗീതവും കൊണ്ടു തന്നെ എക്കാലവും ഓർമ്മിക്കപ്പെടുന്ന ചിത്രം കൂടിയാണ് പരിനീത. വിദ്യ ബാലന്റെ ബോളിവുഡ് അരങ്ങേറ്റ ചിത്രം കൂടിയായിരുന്നു ഇത്.

പരിനീതയുടെ വിജയത്തിന് പിന്നാലെ ലാഗ ചുനാരി മേ ദാഗ് എന്ന ചിത്രം സംവിധാനം ചെയ്തു. ജയാ ബച്ചൻ, റാണി മുഖർജി, അഭിഷേക് ബച്ചൻ തുടങ്ങിയവർ അഭിനയിച്ച ചിത്രം 2007 ഒക്ടോബർ 12-ന് തിയേറ്ററുകളിൽ റിലീസ് ചെയ്തു. ഈ ചിത്രവും ബോക്സോഫീസിൽ ഹിറ്റായി. ദീപിക പദുക്കോൺ, നീൽ നിതിൻ മുകേഷ് എന്നിവരെ കേന്ദ്ര കഥാപാത്രമാക്കി 2010 ൽ അദ്ദേഹം ലഫാംഗി പരിന്ദേ എന്ന ചിത്രമൊരുക്കി. ഇതിന് ശേഷം 2014 ൽ റാണി മുഖർജിയെ നായികയാക്കിയൊരുക്കിയ മർദാനിയായിരുന്നു അദ്ദേഹത്തിന്റെ എക്കാലത്തേയും ഹിറ്റ് ചിത്രങ്ങളിലൊന്ന്. നാല് വർഷങ്ങൾക്ക് ശേഷം കജോൾ നായികയായ ഹെലികോപ്റ്റർ ഈലയുമായി സംവിധായകൻ എത്തി. അദ്ദേഹം അവസാനം സംവിധാനം ചെയ്ത ചിത്രമായിരുന്നു ഇത്.

ഹിറ്റായ പല മ്യൂസിക് വീഡിയോകളും അദ്ദേഹം സം​ഗീതാസ്വാദകർക്കായി ഒരുക്കി. യൂഫോറിയ (band euphoria) എന്ന ബാൻഡിനൊപ്പമായിരുന്നു അദ്ദേഹത്തിന്റെ മ്യൂസിക് വീഡിയോകൾ പുറം ലോകത്തെത്തിയത്. ധൂം പിച്ചക് ധൂം പോലെയുള്ള ഹിറ്റുകൾ മുതൽ മേരി വരെ പ്രദീപ് സർക്കാരിന്റേതായി പ്രേക്ഷകരിലേക്കെത്തി. സം​ഗീതവും വിഷ്വൽസും കൊണ്ട് അദ്ദേഹം പ്രേക്ഷകരെ മറ്റൊരു തലത്തിലേക്ക് എത്തിച്ചു.

സിനിമയും മ്യൂസിക് വീ‍ഡിയോയും കൂടാതെ വെബ് സീരിസുമായും അദ്ദേഹം പ്രേക്ഷകർക്ക് മുന്നിലെത്തി. 2019 ൽ പുറത്തിറങ്ങിയ കോൾഡ് ലസ്സി ഔർ ചിക്കൻ മസാലയെന്ന വെബ് സീരിസായിരുന്നു അദ്ദേഹത്തിന്റേതായി ആദ്യമായി പുറത്തിറങ്ങിയ വെബ് സീരിസ്. അറേഞ്ച്ഡ് മാര്യേജ്-
ഫോർബിഡൻ ലവ് എന്ന സീരിസുമായി 2020ലും അദ്ദേഹമെത്തി. കഴിഞ്ഞ വർഷമെത്തിയ ദുരം​ഗ (duranga) ആയിരുന്നു അദ്ദേഹത്തിന്റേതായി പുറത്തിറങ്ങിയ അവസാനത്തെ വെബ് സീരിസ്. മാറുന്ന കാലത്തിനനുസരിച്ച് നീങ്ങാൻ തനിയ്ക്ക് യാതൊരു ഭയവുമില്ല എന്നതിന്റെ തെളിവ് കൂടിയായിരുന്നു ദുരം​ഗ. തുടക്കം മുതൽ തന്നെ പ്രേക്ഷകരെ ആകർഷിക്കാൻ ദുരം​ഗയ്ക്കായി.