പ്രണയം മുതല്‍ ചട്ടമ്പി വരെ! ശ്രീനാഥ് ഭാസിയുടെ സിനിമകള്‍

ചെറിയ കഥാപാത്രങ്ങളിലൂടെ തുടങ്ങി പില്‍ക്കാലത്ത് മുന്‍നിരയിലേക്കെത്തിയ താരങ്ങളേറെയാണ്. ആര്‍ജെയും വിജെയുമായി പ്രവര്‍ത്തിച്ചതിന് ശേഷമായാണ് ശ്രീനാഥ് ഭാസി സിനിമയിലെത്തിയത്. ബ്ലസി സംവിധാനം ചെയ്ത പ്രണയത്തിലൂടെയായിരുന്നു ശ്രീനാഥിന്റെ അരങ്ങേറ്റം. സിനിമയുടെ കഥ കേട്ടപ്പോള്‍ത്തന്നെ ത്രില്ലടിച്ചിരുന്നുവെന്നും ആശങ്കയോടെയാണ് അഭിനയിച്ചതെന്നും അദ്ദേഹം പറഞ്ഞിരുന്നു. നിന്നെ വെച്ച് ഞാനൊരു പരീക്ഷണം ചെയ്യുകയാണെന്നായിരുന്നു ശ്രീനാഥിനോട് അന്ന് ബ്ലസി പറഞ്ഞത്. ആ പരീക്ഷണം വിജയിച്ചെങ്കിലും അത്ര മികച്ച അവസരങ്ങളൊന്നും ആദ്യം ലഭിച്ചിരുന്നില്ല.
22 ഫീമെയില്‍ കോട്ടയം, അരികെ, ഉസ്താദ് ഹോട്ടല്‍, അയാളും ഞാനും തമ്മില്‍ തുടങ്ങിയ സിനിമകളിലായിരുന്നു പിന്നീട് ശ്രീനാഥിനെ കണ്ടത്. ഡാ തടിയ എന്ന സിനിമയിലെ ക്യാരക്ടര്‍ ശ്രദ്ധിക്കപ്പെട്ടതോടെയാണ് ശ്രീനാഥിന്റെ കരിയര്‍ മാറിമറിഞ്ഞത്. നായകനായ തടിയന്റെ കൂടെ നടന്നിരുന്ന മെലിഞ്ഞ പയ്യനെ അവതരിപ്പിച്ചത് ശ്രീനാഥായിരുന്നു. ഹണിബീ ആദ്യഭാഗം മുതല്‍ ശ്രീയ്ക്ക് മികച്ച വേഷങ്ങളായിരുന്നു ലഭിച്ചത്. ബ്രോ എന്ന വിളിയിലൂടെയായി ശ്രീനാഥ് ആരാധകരുടെ സ്വന്തമായി മാറുകയായിരുന്നു.
ജേക്കബിന്റെ സ്വര്‍ഗരാജ്യം, ബിടെക്ക്, കുമ്പളങ്ങി നൈറ്റ്‌സ്, വൈറസ്, കപ്പേള, ഹോം, ഭീഷ്മപര്‍വ്വം തുടങ്ങി പ്രേക്ഷകര്‍ ഓര്‍ത്തിരിക്കുന്ന നിരവധി കഥാപാത്രങ്ങളെയാണ് ശ്രീനാഥ് അവതരിപ്പിച്ചിട്ടുള്ളത്. പോസിറ്റീവായി മാത്രമല്ല നെഗറ്റീവ് ടച്ചുള്ള ക്യാരക്ടറുകളും തന്നില്‍ ഭദ്രമാണെന്ന് ശ്രീനാഥ് തെളിയിച്ചിരുന്നു. ചട്ടമ്പിയാണ് ഒടുവിലായി അഭിനയിച്ച സിനിമ. അഭിനയത്തിന് പുറമെ നല്ലൊരു ഗായകന്‍ കൂടിയാണ് താനെന്നും ശ്രീനാഥ് തെളിയിച്ചിരുന്നു. തന്റെ സിനിമകളിലും അല്ലാതെയുമായും അദ്ദേഹം ഗാനങ്ങള്‍ ആലപിച്ചിരുന്നു. അനിയനും പാട്ടുകാരനാണെന്നും സ്വന്തമായി മ്യൂസിക് ബാന്‍ഡുണ്ടെന്നും വിദേശത്തൊക്കെ ഷോ ചെയ്യാറുണ്ടെന്നും ശ്രീനാഥ് ഭാസി പറഞ്ഞിരുന്നു.
Latest Malayalam Movie News