ടിനിക്ക് നീതി വേണം; നടനായതു കൊണ്ട് മനുഷ്യാവകാശം നിഷേധിക്കണോയെന്ന് ഹരീഷ് പേരടി!

നടി ഷംന കാസിമിനെ ഭീഷണിപ്പെടുത്തിയ കേസുമായി ബന്ധപ്പെട്ട് നടൻ ടിനി ടോമിനെതിരെ വാർത്തകൾ പടച്ചുവിടുകയും ഇത് വലിയ ചർച്ചയാകുകയും ചെയ്തിരുന്നു. ഈ സാഹചര്യത്തിൽ താനുമായി ബന്ധപ്പെട്ടുയർന്ന് വന്നിരിക്കുന്ന വാദങ്ങളില്‍ തികച്ചും നിരപരാധിയണെന്ന് വ്യക്തമാക്കി വളരെ വൈകാരികമായാണ് നടന്‍ ടിനി ടോം കഴിഞ്ഞ ദിവസം ഫേസ്ബുക്ക് ലൈവ് വീഡിയോ പങ്കുവെച്ചത്. ഇപ്പോഴിതാ സഹപ്രവര്‍ത്തകനെ പിന്തുണച്ച് നടൻ ഹരീഷ് പേരടി‌ രംഗത്തെത്തിയിരിക്കുകയാണ്. സിനിമാ നടനായതു കൊണ്ട് മാത്രം മനുഷ്യാവകാശങ്ങള്‍ നിഷേധിക്കാന്‍ പാടുണ്ടോയെന്നും, ടിനിക്ക് നീതി കിട്ടിയേ പറ്റൂവെന്നും ഹരീഷ് പേരടി തൻ്റെ ഫേസ്ബുക്ക് പോസ്റ്റിലൂടെ ആവശ്യപ്പെടുന്നു.

Also Read: 'കപ്പേള' തെലുങ്കിലേക്ക്; ജെസിയും വിഷ്ണുവും റോയിയും ആകുന്നത് ആര്?

ഹരീഷ് പേരടിയുടെ കുറിപ്പിൻ്റെ പൂർണ്ണ രൂപം ഇങ്ങനെയാണ്. പൊലീസ് വിളിച്ച് ചോദ്യം ചെയ്യുകയോ മൊഴി രേഖ പെടുത്തുകയോ ഒന്നും നടക്കാത്ത ഒരു സാഹചര്യത്തിൽ കുറച്ച് സിനിമകളിൽ അഭിനയിച്ചു പോയി എന്ന ഒറ്റ കാരണത്താൽ ഒരു ഓൺലൈൻ മാധ്യമത്തിന്റെ അതിക്രൂരമായ മാധ്യമ വിചാരണക്ക് വിധേയമാക്കപ്പെട്ട ഒരു മനുഷ്യനാണ് ടിനിയെന്ന് താരത്തിൻ്റെ ചിത്രം പങ്കുവെച്ചുകൊണ്ട് ഹരീഷ് പേരടി കുറിച്ചിരിക്കുന്നു.

Also Read: WCCക്കൊപ്പമുള്ള യാത്ര അവസാനിപ്പിച്ച് സംവിധായിക വിധു വിൻസെൻ്റ്

സിനിമാനടനയാതുകൊണ്ട് മാത്രം ഇയാൾക്കെന്താ മനുഷ്യാവകാശങ്ങൾ നിഷേധിക്കാൻ പാടുണ്ടോയെന്നും പള്ളി പറമ്പിലും അമ്പല പറമ്പിലും വെച്ച് കലയിലൂടെ ജീവിതം ഉണ്ടാക്കിയെടുത്ത ഒരു കലാകാരൻ സാസംകാരിക കേരളത്തിന്റെ മുന്നിൽ കരഞ്ഞുകൊണ്ടാണെങ്കിലും ധീരതയോടെ ഈ വിഷയം അവതരിപ്പിക്കുകയാണെന്നും ഹരീഷ് പേരടി കുറിച്ചു. ഇത് കടുത്ത മനുഷ്യാവകാശ ലംഘനമാണെന്നും ഒരു മൊബൈൽ ക്യാമറയിൽ ആർക്കും നേരെയും എന്തു വിളിച്ച് പറയാവുന്നതാണോ മാധ്യമ പ്രവർത്തനമെന്നും ഹരീഷ് ചോദിക്കുന്നു. ഇത്രയും സത്യസന്ധമായി തന്റെ നിരപരാധിത്വം ലോകത്തോട് വിളിച്ച് പറഞ്ഞ ടിനിക്ക് നീതി കിട്ടിയേ പറ്റൂവെന്നും ഹരീഷ് പേരടി കുറിച്ചിരിക്കുന്നു.