അജയ് ദേവ്ഗണ്‍ മരിച്ചതായി വാട്ട്സാപ്പില്‍ വ്യാജ പ്രചരണം

മുംബൈ: ബോളിവുഡ് താരം അജയ് ദേവ്ഗണ്‍ മരിച്ചതായി വാട്ട്സാപ്പില്‍ വ്യാജ പ്രചരണം. താരം വിമാന അപകടത്തില്‍ മരിച്ചെന്ന വാര്‍ത്തയാണ് സോഷ്യല്‍ മീഡിയയില്‍ പരക്കുന്നത്. താരം സഞ്ചരിച്ച വിമാനം മഹാബലേശ്വറില്‍ തകര്‍ന്നു വീണ് മരിച്ചുവെന്നാണ് ച്രചരിക്കുന്നത്. വിമാനം അടിയന്തിരമായി നിലത്തിറക്കിയെന്നാണ് പ്രചരിച്ച മറ്റൊരു സന്ദേശം.

എന്നാൽ സമൂഹ മാധ്യമങ്ങളില്‍ വ്യാജ വാര്‍ത്ത പരക്കെ പടര്‍ന്നതോടെ അത്തരമൊരു സംഭവം ഉണ്ടായിട്ടില്ലെന്ന് മഹാബലേശ്വര്‍ പോലീസ് വ്യക്തമാക്കി. ഇത്തരം വ്യാജ വാര്‍ത്തകള്‍ പ്രചരിപ്പിക്കുന്നതിന്‍റെ ഉറവിടം അന്വേഷിക്കുമെന്നും പോലീസ് വ്യക്തമാക്കി.

നടന്‍ രണ്‍ബീര്‍ കപൂറുമൊത്തുള്ള പുതിയ ചിത്രത്തിന്‍റെ ഷൂട്ടിംഗ് ലൊക്കേഷനിലും മുംബൈയിലെ വീട്ടിലുമായുള്ള തിരക്കിലാണ് നടൻ ഇപ്പോൾ. രണ്‍ബീറുമൊത്തുള്ള അജയ്‌ എടുത്ത ചിത്രങ്ങളും പുറത്തുവരുന്നുണ്ട്. മുൻപ് ഷാരൂഖ് ഖാന്‍, ഫരീദ ഖാന്‍, ദിലീപ് കുമാര്‍ തുടങ്ങിയവര്‍ മരിച്ചുവെന്നുള്ള വ്യാജ വാര്‍ത്തകള്‍ പ്രചരിച്ചിരുന്നു.