പ്രണവുമായി വളരെ അടുത്ത ബന്ധം! ദുല്‍ഖറിനെ ആദ്യമായി കണ്ടത് സെറ്റിലെന്നും കല്യാണി പ്രിയദര്‍ശന്‍!

സിനിമയ്ക്കപ്പുറത്ത് അടുത്ത സൗഹൃദമുള്ളവരാണ് മമ്മൂട്ടിയും മോഹന്‍ലാലും. ഇവരുടെ കുടുംബാംഗങ്ങള്‍ തമ്മിലും ആ സൗഹൃദമുണ്ട്. മോഹന്‍ലാലിന് പിന്നാലെയായി പ്രണവും നായകനായി അരങ്ങേറുമ്പോള്‍ ആശംസയുമായി മമ്മൂട്ടിയും ദുല്‍ഖര്‍ സല്‍മാനും എത്തിയിരുന്നു. കുടുംബസമേതമായി മോഹന്‍ലാല്‍ മമ്മൂട്ടിയെ സന്ദര്‍ശിച്ചിരുന്നു. ദുല്‍ഖര്‍ സല്‍മാനായിരുന്നു ആദ്യം സിനിമയില്‍ അരങ്ങേറിയത്. മോഹന്‍ലാലിന്റെ സിനിമയ്‌ക്കൊപ്പം മത്സരിക്കുകയും ചെയ്തിരുന്നു. അന്ന് മോഹന്‍ലാലും മമ്മൂട്ടിയുമാണ് നിറഞ്ഞുനിന്നതെങ്കില്‍ ഇനിയങ്ങോട്ട് അത് ദുല്‍ഖറും പ്രണവുമായി മാറുമെന്ന് അന്നേ ആരാധകര്‍ ഉറപ്പിച്ചിരുന്നു. ഇവര്‍ ഇരുവര്‍ക്കൊപ്പവും പ്രവര്‍ത്തിക്കാന്‍ അവസരം ലഭിച്ചൊരു താരപുത്രിയുണ്ട് മലയാളത്തില്‍. പ്രിയദര്‍ശന്റെ മകളായ കല്യാണി പ്രിയദര്‍ശനെന്ന അമ്മു.

തെലുങ്ക് സിനിമയിലൂടെയാണ് തുടക്കം കുറിച്ച താരപുത്രിക്ക് ശക്തമായ പിന്തുണയായിരുന്നു ലഭിച്ചത്. ഹലോ എന്ന സിനിമയുമായാണ് കല്യാണ് എത്തിയത്. അച്ഛന്‍ മുന്‍നിര സംവിധായകനായിട്ടും മലയാളത്തിലേക്ക് എത്താന്‍ വൈകുന്നതിനെക്കുറിച്ചുള്ള ചോദ്യങ്ങളുമായി ആരാധകരെത്തിയിരുന്നു. മരക്കാര്‍ അറബിക്കടലിന്റെ സിംഹമെന്ന ചിത്രത്തിലൂടെയായിരുന്നു ആ ചോദ്യങ്ങള്‍ അവസാനിച്ചത്. കല്യാണി മാത്രമല്ല സഹോദരന്‍ സിദ്ധാര്‍ത്ഥും പ്രണവ് മോഹന്‍ലാലും കീര്‍ത്തി സുരേഷും അനി ശശിയുമൊക്കെ ഈ ചിത്രത്തിനായി അണിനിരന്നിരുന്നു. അപ്പുച്ചേട്ടന്റെ അഭിനയത്തിന് മുന്നില്‍ അത്ഭുതത്തോടെ നിന്നുപോയതിനെക്കുറിച്ച് കല്യാണി അന്ന് തുറന്നുപറഞ്ഞിരുന്നു.

READ ALSO: ആരാധകര്‍ക്ക് മമ്മൂട്ടിയുടെ വിഷുക്കൈനീട്ടമായി വണ്‍! കടയ്ക്കല്‍ ചന്ദ്രന്‍ തിയേറ്ററുകളിലേക്കെത്തുക വിഷുവിന് ?

മരക്കാര്‍ പൂര്‍ത്തിയാക്കിയതിന് പിന്നാലെയായാണ് അനൂപ് സത്യന്‍ ചിത്രമായ വരനെ ആവശ്യമുണ്ട് സിനിമയിലെ നിക്കിയാവാനായി താരപുത്രി എത്തിയത്. ശോഭനയുടെ മകളായാണ് ഈ ചിത്രത്തില്‍ കല്യാണി അഭിനയിച്ചത്. മലയാള സിനിമയിലെ രണ്ട് തലമുറയുടെ സമാഗമത്തിന് കൂടിയാണ് ഈ സിനിമ അവസരമൊരുക്കിയത്. സുരേഷ് ഗോപിയും ശോഭനയും ഉര്‍വശിയും ദുല്‍ഖറിനും കല്യാണിക്കുമൊപ്പം പ്രവര്‍ത്തിക്കുമ്പോള്‍ അത് നിയന്ത്രിക്കുന്നത് അനൂപ് സത്യന്‍ അന്തിക്കാടാണ്.

കുട്ടിക്കാലം മുതലേ തന്നെ പ്രണവിനെ അറിയാമെന്ന് കല്യാണി പറയുന്നു. കസിനാണെന്ന് പറഞ്ഞാണ് അദ്ദേഹത്തെ പലര്‍ക്കും പരിചയപ്പെടുത്താറുള്ളത്. ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തിനിടയിലായിരുന്നു കല്യാണി പ്രണവിനെക്കുറിച്ചും ദുല്‍ഖറിനെക്കുറിച്ചും വാചാലയായത്. ഒരുമിച്ചുള്ള അഭിനയം എളുപ്പമായിരുന്നു. ഈ സിനിമയുടെ സെറ്റിലേക്കെത്തിയപ്പോഴാണ് ദുല്‍ഖര്‍ സല്‍മാനെ കണ്ടത്. ഒടുവില്‍ നമ്മള്‍ കണ്ടുമുട്ടിയല്ലേയെന്നായിരുന്നു അദ്ദേഹം ആദ്യം ചോദിച്ചത്. കുട്ടിക്കാലത്ത് ചില ചടങ്ങുകളിലൊക്കെ കണ്ടിരുന്നുവെങ്കിലും സംസാരിച്ചിട്ടില്ലായിരുന്നുവെന്നും കല്യാണി പറയുന്നു.