'കെജിഎഫ് 2' ഞാനിതുവരെ കണ്ടിട്ടില്ല, ഏത് സിനിമ കാണണമെന്നത് ഓരോരുത്തരുടേയും വ്യക്തിപരമായ താല്പര്യം; നടൻ കിഷോർ

നിരവധി സിനിമകളിൽ ചെറുതും വലുതുമായ വേഷങ്ങൾ ചെയ്ത് ശ്രദ്ധേയനായ താരമാണ് കിഷോർ കുമാർ. നെഗറ്റീവ് ഷെയ്ഡുള്ള കഥാപാത്രങ്ങളിലാണ് കിഷോർ കൂടുതലും തിളങ്ങിയത്. കന്നഡ, തമിഴ്, മലയാളം, തെലുങ്ക് ഭാഷകളിലായി ഒട്ടേറെ ഭാഷകളിൽ ഇതിനോടകം അഭിനയിച്ചു കഴിഞ്ഞു കിഷോർ. 2013 ൽ പുറത്തിറങ്ങിയ അട്ടഹാസ എന്ന ചിത്രത്തിൽ കിഷോർ അവതരിപ്പിച്ച വീരപ്പന്റെ കഥാപാത്രം ഏറെ പ്രശംസകളേറ്റ് വാങ്ങിയിരുന്നു. റിഷബ് ഷെട്ടി സംവിധാനം ചെയ്ത കാന്താര ആണ് കിഷോറിന്റേതായി ഒടുവിൽ പുറത്തിറങ്ങിയ ചിത്രം.

Also Read:
പ്രിയ സുഹൃത്തിന് പിറന്നാൾ ആശംസകൾ നേർന്ന് മമ്മൂട്ടിയും മോഹൻലാലും; മൂവരും ഒന്നിച്ച സിനിമ രംഗങ്ങൾ ഓർത്തെടുത്ത് ആരാധകർ

കാന്താരയിൽ ഫോറസ്റ്റ് ഓഫിസർ മുരളീധറിന്റെ വേഷത്തിലാണ് കിഷോർ എത്തിയത്. ചിത്രത്തിലെ താരത്തിന്റെ പ്രകടനം കൈയ്യടി നേടിയിരുന്നു. ഇപ്പോഴിത കന്നഡയിലെ കഴിഞ്ഞ വർഷം പുറത്തിറങ്ങിയ സൂപ്പർ ഹിറ്റുകളിലൊന്നായ കെജിഎഫ് 2 താൻ കണ്ടിട്ടില്ല എന്ന് പറയുകയാണ് താരം. ഇന്ത്യ ടുഡേയ്ക്ക് നൽകിയ അഭിമുഖത്തിലായിരുന്നു താരം ഇക്കാര്യം പറഞ്ഞത്. അത് ശരിയാണോ തെറ്റാണോ എന്ന് എനിക്കറിയില്ല, കെജിഎഫ് 2 ഞാനിതുവരെ കണ്ടിട്ടില്ല. അതെന്റെ അഭിരുചിയ്ക്ക് ചേരുന്ന ഒരു സിനിമയല്ല. ഏത് സിനിമ കാണണമെന്നത് ഓരോരുത്തരുടേയും വ്യക്തിപരമായ താല്പര്യമാണ്.

പൊതുവേ അധികം ബഹളങ്ങളൊന്നുമില്ലാത്ത ചെറിയ സിനിമകൾ കാണാനാണ് തനിക്ക് കൂടുതൽ താൽപര്യമെന്നും താരം പറഞ്ഞു. ചന്ദ്രശേഖർ ബന്ദിയപ്പ സംവിധാനം ചെയ്യുന്ന റെഡ് കോളർ എന്ന ചിത്രത്തിലൂടെ ഹിന്ദിയിലും സാന്നിധ്യമറിയിക്കാനൊരുങ്ങുകയാണ് കിഷോർ. മണിരത്നം ചിത്രം പൊന്നിയിൻ സെൽവനിലും കിഷോർ പ്രധാന വേഷത്തിലെത്തിയിരുന്നു. പോയ വർഷം ഒരുപിടി മികച്ച സിനിമകൾ കന്നഡ സിനിമ രംഗത്ത് നിന്നുണ്ടായിരുന്നു. കെജിഎഫും കാന്താരയുമാണ് ബോക്സോഫീസിൽ റെക്കോർഡ് സൃഷ്ടിച്ചത്.

റിഷബ് ഷെട്ടി സംവിധാനം ചെയ്ത് നായകനായെത്തിയ കാന്താര ഒരേ സമയം പ്രേക്ഷക സ്വീകാര്യതയും നിരൂപക പ്രശംസയും ഏറ്റു വാങ്ങിയിരുന്നു. കർണാടകയിലെ കാടുബട്ടു എന്ന വനപ്രദേശത്ത് താമസിക്കുന്ന ഒരു വിഭാഗത്തെ ചുറ്റിപ്പറ്റിയാണ് സിനിമയുടെ ഇതിവൃത്തം. യാഷ് നായകനായെത്തിയ കെജിഎഫിനും വൻ വരവേൽപ്പാണ് രാജ്യമൊട്ടാകെ ലഭിച്ചത്. കഴിഞ്ഞ ദിവസം താരത്തിന്റെ ട്വിറ്റർ അക്കൗണ്ട് സസ്പെൻഡ് ചെയ്തെന്ന തരത്തിൽ വാർത്തകൾ വന്നിരുന്നു. എന്നാൽ പിന്നീട് ട്വിറ്റർ തന്റെ അക്കൗണ്ട് നീക്കം ചെയ്തതല്ലെന്നും ഹാക്കിംഗ് മൂലമാണ് ഇങ്ങനെ സംഭവിച്ചതെന്നും താരം വ്യക്തമാക്കിയിരുന്നു.

Read Latest Malayalam Movie News And Malayalam News

Also Watch: