തന്‍റെ ജീവിതത്തിലെ പ്രധാന സംഭവങ്ങളെല്ലാം സോഷ്യൽ മീഡിയയിൽ പങ്കുവെക്കും: ദീപിക പദുകോണ്‍

ഹൈദരാബാദ്: തന്‍റെ ജീവിതത്തിലെ പ്രധാന സംഭവങ്ങളെല്ലാം സോഷ്യൽ മീഡിയ വഴിപങ്കുവെക്കുമെന്ന് ബോളിവുഡ് നടി ദീപിക പദുകോണ്‍. തന്‍റെ ആരാധകരെല്ലാം സോഷ്യൽ മീഡിയയിലൂടെ തന്നെ പിന്തുടരുന്നവരാണെന്നും അതിനാലാണ് താൻ നവമാധ്യമങ്ങളിൽ ആക്ടീവായി തുടരുന്നതെന്നും ദീപിക വ്യക്തമാക്കി. തന്‍റെ വ്യക്തിജീവിതം ഒഴികെ തന്‍റെ സിനിമയുമായും മറ്റും ബന്ധപ്പെട്ട വിവരങ്ങളെല്ലാം സോഷ്യൽ മീഡിയ വഴി താൻ പങ്കുവെക്കാറുണ്ട്. ആരാധകര്‍ അത് ഷെയറും ലൈക്കും ചെയ്ത് ഏറ്റെടുക്കാറുമുണ്ട്. അതൊക്കെയാണ് ഇന്ന് തന്നെ ഇവിടെ അവാര്‍ഡ് വാങ്ങാൻ എത്തിച്ചതിന്‍റെ പ്രധാന ഘടകം. സോഷ്യൽ മീഡിയയിലൂടെ ഏറെ പ്രശസ്തയായ ഇന്ത്യൻ നടി എന്ന അവാര്‍ഡ് ഏറ്റുവാങ്ങിയ ശേഷം വിജയവാഡയിൽ സംസാരിക്കുകയായിരുന്നു ദീപിക പദുകോണ്‍.



ആന്ധ്രാപ്രദേശ് സര്‍ക്കാരും നവമാധ്യമങ്ങളുമായി ചേര്‍ന്ന് സംയുക്തമായി സംഘടിപ്പിച്ച സോഷ്യൻ മീഡിയ ആൻഡ് സമ്മിറ്റ് അവാര്‍ഡാണ് ദീപിക കരസ്ഥമാക്കിയത്. തെലുങ്ക് താരം റാണ ദഗ്ഗുബട്ടി സോഷ്യൽ മീഡിയയിലെ മോസ്റ്റ് ആക്ടീവ് സൗത്ത് ഇന്ത്യൻ ആക്ടര്‍ എന്ന അവാര്‍ഡിന് അര്‍ഹനായി.



സോഷ്യൽ മീഡിയയിലൂടെയാണ് താൻ ലോകത്തിന്‍റെ മുക്കിനും മൂലയിലും എത്തിയതെന്നും തന്‍റെ ചിത്രങ്ങളുടെ പ്രൊമോഷനിൽ സോഷ്യൽ മീഡിയ വലിയരീതിയിൽ പങ്കു വഹിക്കുന്നുണ്ടെന്നും റാണ ദഗ്ഗുബട്ടി വ്യക്തമാക്കി. താനായിരിക്കും സോഷ്യൽ മീഡിയയിൽ നിറഞ്ഞുനിൽക്കുകയും അതേസമയം ചിത്രങ്ങളിൽ അത്ര സജീവമല്ലാത്തതും എന്നാണ് തോന്നുന്നതെന്ന് റാണ തമാശ രൂപേണ പറഞ്ഞു.



സോഷ്യൽ മീഡിയയിൽ മ്യൂസിക് സെൻസേഷൻ സൃഷ്ടിച്ച യുവ സംഗീത സംവിധായകൻ അനിരുദ്ധ് രവീന്ദ്രനും അവാര്‍ഡിന് അര്‍ഹനായി. വൈ ദിസ് കൊലവറി എന്ന ഗാനം വൈറലാക്കിയതിനാണ് അനിരുദ്ധ് അവാര്‍ഡ് വാങ്ങിയത്. അവാര്‍ഡ് ഏറ്റുവാങ്ങിയ ശേഷം അനിരുദ്ധ് സൂപ്പര്‍സ്റ്റാര്‍ പവൻ കല്യാണ്‍ ചിത്രമായ അജ്ഞാതവാസിയിലെ ഗാനം പാടി കാണികളെ ആവേശത്തിലാക്കുകയും ചെയ്തു.