ഞാൻ പാകിസ്ഥാനിലേയ്ക്ക് പോയാലോ എന്നാണ് ചിന്തിക്കുന്നത്, അവിടെ കൂടുതൽ സന്തോഷവതിയായിരിക്കും: ആലിയയുടെ അമ്മ

വിവാദങ്ങൾ സൃഷ്ടിക്കുന്ന മഹേഷ് ഭട്ടിന്റെ ശീലത്തിൽ നിന്നും മക്കളായ പൂജയോ, ആലിയയോ, രണ്ടാമത്തെ പങ്കാളിയായ സോണിയോ മുക്തരല്ല. 2019 ൽ റിലീസ് ആയ നോ ഫാദേഴ്‌സ് ഇൻ കശ്മീർ എന്ന ചിത്രത്തിൽ അഭിനയിക്കുമ്പോൾ, കശ്മീർ പ്രശ്നത്തെ സംബന്ധിച്ച നടിയുടെ ചില പരാമർശങ്ങൾ ഏറെ വിവാദങ്ങൾക്ക് തിരി കൊളുത്തിയിരുന്നു. സോണി ദേശദ്രോഹിയാണ് എന്നും, പാകിസ്ഥാനിലേയ്ക്ക് പോകൂ എന്നെല്ലാമുള്ള ശാസനകളും ട്രോളുകളും കൊണ്ട് സോഷ്യൽ മീഡിയ നിറഞ്ഞു.

നവഭാരത് ടൈംസിന് നൽകിയ അഭിമുഖത്തിൽ വിവാദങ്ങളെ കുറിച്ച് നടി പ്രതികരിച്ചു. "കശ്മീർ വിഷയത്തിൽ സംസാരിക്കുമ്പോഴെല്ലാം എന്നെ പലരും ദേശദ്രോഹിയായി ചിത്രീകരിക്കാനാണ് ശ്രമിക്കുന്നത്. ഇന്ത്യ ഒരു ഹിന്ദുരാഷ്ട്രമായി മാറ്റാനുള്ള ശ്രമങ്ങളോട് എനിക്ക് യോജിപ്പില്ല. ഒരു മതരാഷ്ട്രമായതു കൊണ്ടാണ് പാകിസ്ഥാനിലെ വികസനങ്ങളും മുരടിച്ചു പോയത്.

ഇത്തരം പ്രതികരണങ്ങൾ നടത്തുമ്പോൾ എന്നോട് പാകിസ്ഥാനിലേയ്ക്ക് പോകാനാണ് ആവശ്യപ്പെടുന്നത്. പക്ഷേ എന്നെ പോലെ ചിന്തിക്കുന്ന അനവധിയാളുകൾ ഈ നാട്ടിലുണ്ട്. അതിനാൽ തന്നെ ഇത്തരം വിമർശനങ്ങളും, കുറ്റപ്പെടുത്തലുകളും തന്നെ സാരമായി ബാധിക്കാറില്ല.

ഞാൻ പാകിസ്ഥാനിലേയ്ക്ക് പോകണം എന്നാണ് ഇവരുടെയെല്ലാം ആവശ്യമെങ്കിൽ ഞാൻ തീർച്ചയായും പോകാൻ തയ്യാറാണ്. ഞാൻ പാകിസ്ഥാനിൽ കൂടുതൽ സന്തോഷവതിയായിരിക്കും. അവിടുത്തെ ഭക്ഷണം വളരെ രുചിയുള്ളതാണ്." കാശ്മീരി പണ്ഡിറ്റ് കൂടിയായ നരേന്ദ്ര റസ്ദാന്റെ മകൾ പറയുന്നു.


​

2018 ൽ ചിത്രീകരണം പൂർത്തിയായ സോണിയ അഭിനയിച്ച നോ ഫാദേഴ്‌സ് ഇൻ കശ്മീർ എന്ന ചിത്രം റിലീസ് ചെയ്യുക എന്നത് അണിയറപ്രവർത്തകർക്ക് വളരെ ബുദ്ധിമുട്ടുകൾ സൃഷ്ടിച്ച ഒരു സംഗതിയായിരുന്നു. കേന്ദ്ര സെൻസർഷിപ്പ് ബോർഡുമായി എട്ടു മാസം നീണ്ട പോരാട്ടം നടത്തിയാണ് 2019 ൽ ചിത്രം A സെർട്ടിഫിക്കറ്റോടെ റിലീസ് ചെയ്യാൻ അനുമതി ലഭിച്ചത്.