എൺപതുകളിലെ താരങ്ങളുടെ സംഗമം വീണ്ടും; കൂട്ടായ്മയുടെ പത്താം വാർഷികം ആഘോഷിച്ച് താരങ്ങൾ

ചെന്നൈ: എൺപതുകളിൽ സിനിമ ലോകത്തെ നിറസാന്നിദ്ധ്യമായിരുന്ന താരങ്ങള്‍ വീണ്ടും ഒന്നിച്ചപ്പോഴുള്ള ചിത്രം വൈറലാകുന്നു. എല്ലാ വർഷവും ഇവർ ഇത്തരത്തിലുള്ള ഓര്‍മ്മ പുതുക്കല്‍ നടത്താറുണ്ട്. ഇവരുടെ ഒത്തുചേരലിന്‍റെ പത്താം വർഷമായ ഇക്കുറി തെലുങ്ക് സൂപ്പർതാരം ചിരഞ്ജീവിയുടെ വീട്ടിലായിരുന്നു ഇവർ ഒത്തുചേര്‍ന്നിരുന്നത്.

ഇവരുടെ സൗഹൃദസംഗമത്തിന്‍റെ പത്താം വാര്‍ഷികം കൂടിയായിരുന്നു ഈ വര്‍ഷം. കറുപ്പും സ്വര്‍ണ്ണ നിറവും ചേര്‍ന്ന വസ്ത്ര ധാരണമായിരുന്നു ഇക്കുറി താരങ്ങളുടേത്. ഓരോ വർഷവും ഇവര്‍ ഓരോ രീതിയിലുള്ള തീം തങ്ങളുടെ വസ്ത്രധാരണത്തിൽ തിരഞ്ഞെടുക്കാറുണ്ട്.
മോഹന്‍ലാല്‍, ജയറാം, പാര്‍വതി, ശോഭന, നാദിയ മൊയ്തു, സരിത, അമല, മേനക, ജഗപതി ബാബു, ചിരഞ്ജീവി, ഭാഗ്യരാജ്, ശരത്കുമാര്‍, ജാക്കി ഷ്റോഫ്, നാഗാര്‍ജ്ജുന, പ്രഭു, റഹ്മാന്‍, രാധിക, രേവതി, സുഹാസിനി, ലിസ്സി, അംബിക, ഖുശ്ബു ഉള്‍പ്പെടെ വലിയ താരനിര തന്നെ സൗഹൃദ സംഗമത്തിനായെത്തിയിരുന്നു.

കഴിഞ്ഞ കുറെ വര്‍ഷങ്ങളായി ആരാധകരും താരങ്ങളും ഇവരുടെ ഒത്തുചേരലിന്‍റെ ചിത്രങ്ങൾക്കായി കാത്തിരിക്കാറുണ്ട്. ക്ലാസ് ഓഫ് 80’സ് എന്നാണ് ഇത്തവണത്തെ കൂട്ടായ്മയ്ക്ക് ഇവർ പേരിട്ടിരുന്നത്. സിനിമാ തിരക്കുകള്‍ കാരണം ഇവരുടെ കൂട്ടായ്മയിലെ മിന്നും സാന്നിദ്ധ്യമായ രജനികാന്ത്, കമല്‍ഹാസന്‍, മമ്മൂട്ടി തുടങ്ങിയവര്‍ക്ക് ഇക്കുറി എത്തിച്ചേരാന്‍ കഴിഞ്ഞിരുന്നില്ല. 2009 ലാണ് സുഹാസിനിയും മണിരത്നവും ലിസിയും ചേര്‍ന്ന് ഇത്തരമൊരു റീ യൂണിയന്‍ ആശയം ആരംഭിച്ചത്.

• വാർത്തകൾ ഇതുവരെ Movie Review