​ഗൗരിക്കുട്ടിയുടെ ആദ്യത്തെ പരിപാടിയാണ്! അരുണിനൊപ്പം പൊതുപരിപാടിയിൽ പങ്കെടുത്ത് ഭാമ! വൈറലായി ചിത്രങ്ങൾ

ലോഹിതദാസ് മലയാളികള്‍ക്ക് പരിചയപ്പെടുത്തിയ അഭിനേത്രികളിലൊരാളാണ് ഭാമ. നിവേദ്യമെന്ന ചിത്രത്തിലൂടെ തുടക്കം കുറിച്ച താരത്തിന് മികച്ച അവസരങ്ങളായിരുന്നു ലഭിച്ചതും. നായികയായി തിളങ്ങിയ താരം വിവാഹത്തോടെയായിരുന്നു അഭിനയ ജീവിതത്തിന് ബ്രേക്കിട്ടത്. അഭിനയത്തില്‍ സജീവമല്ലെങ്കിലും സോഷ്യല്‍മീഡിയയിലൂടെയായി വിശേഷങ്ങള്‍ പങ്കുവെക്കാറുണ്ട് താരം. അരുണിനും ഗൗരിക്കുമൊപ്പമായി ഒരു പൊതുചടങ്ങില്‍ പങ്കെടുത്തതിനെക്കുറിച്ച് പറഞ്ഞെത്തിയിരിക്കുകയാണ് താരം.
കുടുംബസമേതമായാണ് ഭാമ പരിപാടിയില്‍ പങ്കെടുത്തത്. കുഞ്ഞുമകളായ ഗൗരിയുടെ ആദ്യത്തെ പരിപാടിയാണ് ഇതെന്നും താരം കുറിച്ചിട്ടുണ്ട്. ഭര്‍ത്താവും താനും മറ്റ് അതിഥികളോടൊപ്പം നില്‍ക്കുന്നതിന്റെയും സംസാരിക്കുന്നതിന്റെയുമൊക്കെയായുള്ള ചിത്രങ്ങളാണ് താരം പോസ്റ്റ് ചെയ്തിട്ടുള്ളത്. താരങ്ങളും ആരാധകരുമടക്കം നിരവധി പേരാണ് ഭാമയുടെ പോസ്റ്റിന് താഴെയായി കമന്റുകളുമായെത്തിയിട്ടുള്ളത്.
തന്നെക്കുറിച്ച് പ്രചരിക്കുന്ന കാര്യങ്ങളില്‍ വാസ്തവമില്ലെന്ന് വ്യക്തമാക്കി ഇടയ്ക്ക് താരമെത്തിയിരുന്നു. വ്യക്തി ജീവിതത്തില്‍ പ്രശ്‌നങ്ങളാണെന്ന തരത്തിലായിരുന്നു റിപ്പോര്‍ട്ടുകള്‍. ആരോപണങ്ങളും കെട്ടുകഥകളുമൊക്കെയാണ് സോഷ്യല്‍മീഡിയയിലൂടെ പ്രചരിച്ചത്. ഞങ്ങള്‍ ആരോഗ്യത്തോടെയും സന്തോഷത്തോടെയും ഇരിക്കുകയാണെന്നാണ് എന്നെയും എന്റെ കുടുംബത്തേയും അന്വേഷിച്ചവരോട് പറയാനുള്ളതെന്നും താരം പറഞ്ഞിരുന്നു.
എന്നാണ് സിനിമയിലേക്ക് തിരിച്ചുവരുന്നതെന്ന തരത്തിലുള്ള ചോദ്യങ്ങളും ചിലര്‍ ഭാമയോട് ചോദിച്ചിരുന്നു. അഭിനയം നിര്‍ത്തിയോ എന്ന് ചോദിച്ചപ്പോള്‍ താല്‍ക്കാലികമായി നിര്‍ത്തിയെന്നായിരുന്നു ഭാമയുടെ മറുപടി. വിവാഹജീവിതം വളരെ മനോഹരമായാണ് പോവുന്നതെന്നും താരം അന്ന് പറഞ്ഞിരുന്നു. 2020 ലായിരുന്നു ഭാമ അരുണിന്റെ ജീവിതസഖിയായത്. ചേച്ചിയുടെ ഭര്‍ത്താവിന്റെ ക്ലാസ്‌മേറ്റാണ് അരുണ്‍. അവരുടെ കുടുംബവുമായും അടുപ്പമുണ്ട്. അങ്ങനെയാണ് വിവാഹാലോചന വന്നതെന്ന് താരം പറഞ്ഞിരുന്നു. വിദേശത്തായിരുന്നുവെങ്കിലും വിവാഹത്തോടെയായി നാട്ടില്‍ സെറ്റിലാവുകയായിരുന്നു അരുണ്‍. വിക്രമിനെപ്പോലെയാണ് അരുണിന്റെ ലുക്ക് എന്നായിരുന്നു ഇടയ്ക്ക് ആരാധകര്‍ പറഞ്ഞത്. അത് താനും കേട്ടിട്ടുള്ള കമന്റാണെന്ന് അരുണും പറഞ്ഞിരുന്നു.