കല്യാണത്തിന് മുൻപ് ആലോചിച്ചെടുത്ത തീരുമാനമായിരുന്നു അത്! എല്ലാം വേണ്ടെന്ന് വെച്ച് ജീവിച്ച 15 വർഷം! അഭിനയം നിർത്താനുണ്ടായ കാരണത്തെക്കുറിച്ച് വിധുബാല പറഞ്ഞത്?

ജീവിതത്തില്‍ പരാജപ്പെട്ട സ്ത്രീക്ക് പിന്നില്‍ ഒരു പുരുഷനുണ്ടെന്ന് എനിക്കെപ്പോഴും തോന്നിയിട്ടുണ്ട്. ഒരു കുടുംബത്തില്‍ എന്തെങ്കിലും പ്രതിസന്ധി വന്നാല്‍ ആദ്യം വേണ്ടെന്ന് വെക്കുന്നത് സ്ത്രീകളാണ്. അതെന്തുകൊണ്ടാണെന്നറിയില്ല. ഭാര്യയ്ക്കും ഭര്‍ത്താവിനും ഒരേപോലെ ഉത്തരവാദിത്തമുള്ള കാര്യമാണ്. ഈയൊരു കാരണം കൊണ്ടാണ് ഞാന്‍ 1979 ല്‍ അഭിനയം നിര്‍ത്തിയത്. കല്യാണം കഴിക്കുന്നതിന് മുന്‍പ് എനിക്ക് വേണ്ടി ജീവിക്കണം എന്ന ആഗ്രഹമുണ്ടായിരുന്നു.

4 കൊല്ലം എനിക്കിഷ്ടമുള്ളതെല്ലാം ഞാന്‍ ചെയ്തു. അതുകഴിഞ്ഞിട്ടാണ് കല്യാണം കഴിച്ചത്. അമ്മയാവുക എന്നത് എനിക്കൊരുപാട് ആഗ്രഹമുള്ള കാര്യമായിരുന്നു. അതെനിക്ക് പൂര്‍ണമായും ആസ്വദിക്കണമെന്നുണ്ടായിരുന്നു. അതുകൊണ്ട് ആ സമയത്ത് ഒരു ജോലിക്കും പോയിട്ടില്ല. കുട്ടി വലുതായതിന് ശേഷമാണ് യാത്രകളെല്ലാം ചെയ്തത്. അവന്‍ എഞ്ചിനീയറിംഗിന് പഠിക്കുന്നത് വരെയുള്ള എന്റെ സമയം ഞാന്‍ അവന് വേണ്ടി മാറ്റിവെക്കുകയായിരുന്നു. നമ്മള്‍ ചെറുപ്പത്തില്‍ കൊടുക്കുന്ന കാര്യങ്ങളിലൂടെയായാണ് കുട്ടി നല്ലൊരു പൗരനായി വളരുക. അതുവരെ ഞാന്‍ അവന്റെ കൂടെത്തന്നെയായിരുന്നു.

മോന്‍ എഞ്ചീനിയറിംഗിന് പോയപ്പോഴാണ് എനിക്ക് എന്റേതായ സമയം കിട്ടിയത്. വളരെ സപ്പോര്‍ട്ടീവായ ഹസ്ബന്‍ഡാണ് എന്റേത്. വേറെ പ്രശ്‌നങ്ങളൊന്നുമില്ലാത്തതിനാല്‍ വീണ്ടും ജോലി ചെയ്ത് തുടങ്ങി. ഫ്രണ്ട്‌സിനൊപ്പവും ഫാമിലി ഗ്രൂപ്പിനൊപ്പവും യാത്ര ചെയ്യാറുണ്ട്. 10 വയസ് മുതല്‍ അച്ഛനൊപ്പം യാത്ര പോയിത്തുടങ്ങിയതാണ്. 15 വര്‍ഷം ഞാന്‍ എല്ലാം വേണ്ടെന്ന് വെച്ചിരുന്നു. അതുകഴിഞ്ഞ് വീണ്ടും സജീവമായി.

യാത്രകൾ കുഞ്ഞിലേ മുതൽ ഏറെയിഷ്ടമുള്ള കാര്യമാണ്. ഡാൻസറായതിരുന്നതിനാൽ ശിവൻ എന്ന് പറയുമ്പോൾ ഹസ്ബൻഡ് എന്ന കോൺസപ്റ്റാണ് മനസിലേക്ക് വരുന്നത്. കൈലാസം എന്റെ വീട് പോലെയാണ് തോന്നാറുള്ളത്. അവിടെ പോവാൻ പറ്റുമോ എന്നൊന്നും അറിയില്ലായിരുന്നു. കൈലാസയാത്ര എനിക്കൊരിക്കലും മറക്കാനാവില്ല. ദൂരേന്നേ നമുക്ക് കാണാനാവും, അതുകണ്ടപ്പോഴേ പൊട്ടിക്കരഞ്ഞ് പോയി. പ്രാഥമിക ആവശ്യങ്ങള്‍ക്ക് പോലും ബുദ്ധിമുട്ടിയിരുന്നു അവിടെ. യാതൊരുവിധ വികസനങ്ങൾക്കും അവിടെയുള്ളവർ സമ്മതിക്കുന്നുണ്ടായിരുന്നില്ല. സങ്കടം തോന്നും. ഇനിയും അവിടേക്ക് പോവാൻ ആഗ്രഹമുണ്ടെന്നും വിധുബാല പറഞ്ഞിരുന്നു.