കേരളാ പോലീസിനെ രൂക്ഷമായി വിമര്‍ശിച്ച് നടൻ ജോയ് മാത്യു

കോഴിക്കോട്: കേരളാ പോലീസിനെ രൂക്ഷമായി വിമര്‍ശിച്ച് നടനും സംവിധായകനുമായ ജോയ് മാത്യു രംഗത്ത്. ജിഷ്ണു പ്രണോയിയുടെ അമ്മ മഹിജക്കെതിരെ നടന്ന പോലീസ് അതിക്രമത്തിന്‍റെ പശ്ചാത്തലത്തിലാണ് ജോയ് മാത്യു കേരളാ പോലീസിനെ രൂക്ഷമായി വിമര്‍ശിക്കുന്നത്. ഓരോ ദിവസം കഴിയുന്തോറും നമ്മുടെ ഗവണ്‍മെന്‍റ് ഉളുപ്പില്ലായ്മയുടെ ഊരാളന്മാരാവുകയാണെന്ന് ജോയ്‍‍ മാത്യു ചൂണ്ടിക്കാട്ടി. മഹിജയെ അടിയന്തരാവസ്ഥാ കാലത്തെ രാജന്‍റെ അച്ഛന്‍ ഈച്ചരവാര്യരോട് ജോയ്‍‍ മാത്യു താരതമ്യം ചെയ്യുന്നു.

രാജനെപ്പോലുള്ള രക്തസാക്ഷികളെ വിറ്റ് അധികാരത്തിലേറിയ ഇടതുപക്ഷം ഇപ്പോൾ ജിഷ്ണുവിന്‍റെ അമ്മക്ക് നീതി നിഷേധിക്കുകയാണെന്നും താരം ആരോപിച്ചു. എകെ ശശീന്ദ്രനെ രക്ഷിക്കാന്‍ കാട്ടിയ ജാഗ്രത പോലും ജിഷ്ണുവിന്‍റെ കാര്യത്തില്‍ കാട്ടുന്നില്ലെന്നും അദ്ദേഹം പറയുന്നു.

ജോയ് മാത്യുവിന്‍റെ ഫേസ്ബുക്ക് പോസ്റ്റിന്‍റെ പൂര്‍ണരൂപം

അടിയന്തിരാവസ്ഥയിൽ പോലീസ് ഉരുട്ടിക്കൊന്ന എൻജിനീയറിംഗ് വിദ്യാർത്ഥി രാജന്‍റെ അച്ഛൻ ഈച്ചരവാര്യർ തന്‍റെ മകന് നീതി ലഭിക്കാൻ മരണംവരെ പോരാടി. രാജനെപ്പോലുള്ള രക്തസാക്ഷികളെ വിൽപ്പനക്ക് വെച്ച് അധികാരത്തിലേറിയ ഇടതുപക്ഷം ഇപ്പോഴിതാ ജിഷ്ണുവിന്‍റെ അമ്മക്ക് നീതി നിഷേധിക്കുന്നു .

തേൻകുടത്തിൽ വീണുപോയ ഒരു വൃദ്ധ മന്ത്രിയുടെ നിരപരാധിത്വം അന്വേഷിക്കാൻ ഇരുപത്തിനാലു മണിക്കൂറിനുള്ളിൽ ജുഡീഷ്യൽ അന്വേഷണം. നീതിക്കു വേണ്ടി പോരാടുന്ന മകൻ നഷ്ടപ്പെട്ട ഒരമ്മക്ക് പോലീസ് മർദ്ദനവും ജയിലും.

ഓരോ ദിവസം കഴിയുന്തോറും. ഉളുപ്പില്ലായ്മയുടെ ഊരാളന്മാരാവുകയാണ് നമ്മുടെ ഗവർമ്മെന്‍റ് .
#Justiceforjishnu



Joy Mathew criticize Kerala Police

Actor Joy Mathew Brutaly criticising Kerala Police regarding Jishnu Pranoy's Mother Issue