റിയയും സഹോദരനും ജയിലില്‍ തന്നെ; ജുഡീഷ്യല്‍ കസ്റ്റഡി നീട്ടി മുംബെെ കോടതി

ഇന്നായിരുന്നു കസ്റ്റഡിയുടെ കാലാവധി അവസാനിക്കാനിരുന്നത്. എന്നാല്‍ കാലാവധി ഒക്ടോബര്‍ 20 വരെ നീട്ടാന്‍ മുംബെെ പ്രത്യേക കോടതി ഉത്തരവ്. സെപ്തംബര്‍ 9 നായിരുന്നു റിയ അറസ്റ്റിലാകുന്നത്. അതിന് മുമ്പ് തന്നെ ഷൊവിക്കിനെ അറസ്റ്റ് ചെയ്തിരുന്നു.

സുശാന്ത് മയക്കുമരുന്ന് വാങ്ങുന്നതിനായി തന്നേയും സഹോദരനേയും ഉപയോഗിക്കുകയായിരുന്നുവെന്നായിരുന്നു റിയ ജാമ്യാപേക്ഷയില്‍ നേരത്തെ പറഞ്ഞത്. താന്‍ ഉപയോഗിച്ചിരുന്നില്ലെന്നും താരം വ്യക്തമാക്കിയിരുന്നു. സുശാന്ത് മയക്കുമരുന്ന് ഉപയോഗിച്ചിരുന്നതായി മനേജര്‍ സാമുവല്‍ മിറാന്‍ഡയും വെളിപ്പെടുത്തിയിരുന്നു.

ദീപിക പദുക്കോണ്‍, സാറ അലി ഖാന്‍, ശ്രദ്ധ കപൂര്‍, രാകുല്‍ പ്രീത് സിങ് എന്നിവരെ ചോദ്യം ചെയ്തിരുന്നു. എന്നാല്‍ ഇവര്‍ മയക്കുമരുന്ന് ഉപയോഗിച്ചിരുന്നതിന് തെളിവ് കണ്ടെത്താനായിട്ടില്ല. അതേസമയം, സുശാന്തിന്റെ മരണം കൊലപാതകമല്ലെന്നും ആത്മഹത്യയാണെന്നും എയിംസ് ഡോക്ടര്‍മാരുടെ സംഘം സിബിഐയ്ക്ക് റിപ്പോര്‍ട്ട് കെെമാറിയിട്ടുണ്ട്.

സുശാന്തിന് മയക്കുമരുന്ന് എത്തിച്ചു നല്‍കിയെന്നാണ് റിയയ്ക്ക് എതിരായ കുറ്റം. അതേസമയം ഇരുവരും മയക്കുമരുന്ന് ഉപയോഗിച്ചിരുന്നതിന് തെളിവ് ലഭിച്ചിരുന്നില്ലെന്നും എന്‍സിബി അറിയിച്ചിരുന്നു. പക്ഷെ ലഹരിമരുന്ന് വാങ്ങുന്നത് അടക്കമുള്ള കുറ്റങ്ങള്‍ ഗുരുതരമാണെന്നും എന്‍സിബി പറയുന്നു.