പൂമരം കൊണ്ട് പൂക്കളം തീർത്ത് കാളിദാസ്

ജയറാമിന്‍റെ മകൻ കാളിദാസ് നായകനാകുന്ന പൂമരം എന്ന ചിത്രത്തിനുവേണ്ടിയുള്ള കാത്തിരിപ്പിലാണ് മലയാളികൾ ഒന്നടങ്കം. ഞാനും ഞാനുമെന്‍റെ ആളും എന്ന് തുടങ്ങുന്ന ചിത്രത്തിലെ ആദ്യ പാട്ടിന് വൻ സ്വീകാര്യത ലഭിച്ചിരുന്നു. മറ്റൊരു പാട്ട് കൂടി പുറത്തിറങ്ങി എന്നതല്ലാതെ ചിത്രത്തിന്‍റെ പുതിയ വിശേഷങ്ങളൊന്നും പുറത്തുവന്നില്ല. കഴിഞ്ഞ സെപ്തംബറിലായിരുന്നു പൂമരത്തിന്‍റെ ചിത്രീകരണമാരംഭിച്ചത്. പൂമരത്തിന്‍റെ ചിത്രീകരണം ഇപ്പോഴും പുരോഗമിച്ച് കൊണ്ടിരിക്കുകയാണ്. ഉടൻ തന്നെ ചിത്രം തിയേറ്ററുകളിൽ എത്തിക്കാനുള്ള ഒരുക്കങ്ങളാണ് അണിയറയിൽ നടക്കുന്നത്.



അതിനിടെ പൂമരം അണിയറ പ്രവർത്തകരുടെ കൂടെയുള്ള കാളിദാസിന്‍റെ സെല്‍ഫി വൈറലാവുകയാണ്. പൂമരം കൊണ്ട് കപ്പല്‍ ഉണ്ടാക്കിയാണ് സിനിമ ഏറെ ശ്രദ്ധിക്കപ്പെട്ടതെങ്കില്‍ പൂമരം കൊണ്ട് പൂക്കളമൊരുക്കിയാണ് ടീമംഗങ്ങൾ ഈ ഓണം ശ്രദ്ധേയമാക്കിയത്. കാളിദാസ് ജയറാം തന്‍റെ ഫേസ്ബുക്ക് പേജിൽ പങ്കുവച്ചിരിക്കുന്ന ചിത്രങ്ങളാണിപ്പോൾ വൈറലാകുന്നത്.



എബ്രിഡ് ഷൈനാണ് ചിത്രം സംവിധാനം ചെയ്യുന്നത്. 1983, ആക്ഷന്‍ ഹീറോ ബിജു എന്നീ ചിത്രങ്ങള്‍ക്ക് ശേഷം എബ്രിഡ് ഷൈന്‍ സംവിധാനം ചെയ്യുന്ന ചിത്രമാണ് പൂമരം. വലിയ കാന്‍വാസിലുള്ള ചിത്രമായതിനാല്‍ ചിത്രീകരണം പൂര്‍ത്തിയായിട്ടില്ലെന്നും, അതിനാലാണ് റിലീസ് വൈകുന്നത് എന്നുമാണ് പുതിയ റിപ്പോർട്ടുകൾ.



കാളിദാസിന് പുറമെ കുഞ്ചാക്കോ ബോബന്‍, മഞ്ജു വാര്യര്‍, മീര ജാസ്മിന്‍ തുടങ്ങിയവർ ചിത്രത്തില്‍ അഭിനയിക്കുന്നുണ്ടെന്നായിരുന്നു ആദ്യം വന്ന വാർത്ത. എന്നാല്‍ അതെപ്പറ്റിയുള്ള കൂടുതല്‍ വിവരങ്ങളൊന്നും പുറത്ത് വന്നില്ല.



Kalidas Jayaram's Onam celebration

Kalidas Jayaram's Onam celebration with Poomaram Team goes viral on social media.