ബുദ്ധിമുട്ട് തോന്നിയത് ഇക്കാര്യത്തിൽ! പ്രണവ് മോഹൻലാലിനൊപ്പമുള്ള റൊമാന്റിക് രംഗങ്ങളെക്കുറിച്ച് കല്യാണി പ്രിയദർശൻ പറഞ്ഞത്?

കുട്ടിക്കാലം മുതലേ തന്നെ അറിയാവുന്നവരായതിനാല്‍ ഓരോനിമിഷവും ആസ്വദിച്ചാണ് പ്രണവിനൊപ്പം ജോലി ചെയ്തത്. മോഹന്‍ലാലും പ്രിയദര്‍ശനും തമ്മിലുള്ള സൗഹൃദം ഇവരുടെ കുടുംബാംഗങ്ങളും നിലനിര്‍ത്തുന്നുണ്ട്. അപ്പുച്ചേട്ടനുമായുള്ള സൗഹൃദമാണ് ഹൃദയത്തിലെ റൊമാന്റിക് രംഗങ്ങള്‍ മികച്ചതായതിന് പിന്നിലെ കാരണമെന്നും കല്യാണി പറയുന്നു.

ഹൃദയത്തില്‍ ഞങ്ങള്‍ക്കൊരു മകനുണ്ട്. കുഞ്ഞിനൊപ്പമുള്ള രംഗങ്ങളില്‍ അഭിനയിക്കാന്‍ ഞങ്ങള്‍ കുറച്ച് ബുദ്ധിമുട്ടിയിരുന്നു. ഞങ്ങള്‍ രണ്ടാള്‍ക്കും കുഞ്ഞുങ്ങളെ കൊഞ്ചിച്ച് വലിയ പരിചയമില്ല. അതിനാല്‍ നേരത്തെ തന്നെ കുഞ്ഞിനെ കളിപ്പിക്കുന്നതും കൊഞ്ചിക്കുന്നതുമെല്ലാം പരിശീലിച്ച് ഒരു ബോണ്ട് ഉണ്ടാക്കിയെടുത്തിരുന്നു.

ഹായ് ഒക്കെ പറഞ്ഞ് വളരെ ഫോര്‍മലായാണ് അപ്പു കുഞ്ഞിനോട് ഇടപഴകിയത്. ഏതെങ്കിലും ബിസിനസ് മീറ്റിംഗിലാണോ അവന്‍ പങ്കെടുക്കുന്നതെന്നായിരുന്നു അത് കണ്ടപ്പോള്‍ തോന്നിയത്. നമ്മളൊന്നും കുഞ്ഞുങ്ങളെ കൊഞ്ചിക്കുന്ന പോലെയല്ല അവന്‍ കളിപ്പിച്ചതെന്നും കല്യാണി പറഞ്ഞിരുന്നു.

മുന്‍പരിചയമുള്ളതിനാല്‍ പ്രണവിനൊപ്പമുള്ള റൊമാന്റിക് രംഗങ്ങള്‍ ചെയ്യാനും എളുപ്പമായിരുന്നു. ഞങ്ങളുടെ കെമിസ്ട്രി നന്നായി എന്ന് വിനീതേട്ടന്റെ മുഖത്തുനിന്നും വായിച്ചെടുക്കാമായിരുന്നു. പെട്ടെന്ന് തന്നെ സീനുകളെക്കുറിച്ച് മനസിലാക്കാനും ഡയലോഗുകള്‍ പഠിക്കാനും പ്രണവിന് പ്രത്യേകമായൊരു കഴിവുണ്ടെന്ന് കല്യാണി നേരത്തെ അഭിപ്രായപ്പെട്ടിരുന്നു.