രജനിയുടേത് കാവി രാഷ്ട്രീയമാകില്ലെന്ന് പ്രതീക്ഷിക്കുന്നതായി കമൽ

കേംബ്രിഡ്‌ജ്: രജനീകാന്തിന്‍റെ രാഷ്ട്രീയം 'കാവി' ആണെങ്കിൽ തനിക്ക് അതുമായി യോജിക്കാനാകില്ലെന്ന് വ്യക്തമാക്കി കമലഹാസൻ. തന്‍റേത് കാവി രാഷ്ട്രീയമല്ലെന്നും കമൽ ഹാർവാർഡ് സർവകലാശാലയിൽ നടന്ന വാർഷിക ഇന്ത്യൻ കോൺഫറൻസിൽ പറഞ്ഞു. തെരഞ്ഞെടുപ്പിൽ രജനിയുടെ പാർട്ടിയുമായി സഖ്യമുണ്ടാക്കിയേക്കാം. എന്നാൽ ഇരു പാർട്ടികളുടെയും ആശയങ്ങളും നയങ്ങളും ഒന്നിച്ചു പോകാൻ കഴിയുന്നതാണെന്ന് ബോധ്യമുണ്ടാകണമെന്നും കമൽ വ്യക്തമാക്കി. ഹാർവാർഡിൽ മുഖ്യപ്രഭാഷണം നടത്തുകയായിരുന്നു കമൽ.

ജനങ്ങൾക്കൊപ്പം നിന്ന് പ്രവർത്തിക്കാനാണ് പാർട്ടി രൂപീകരിക്കുന്നത്. തെരഞ്ഞെടുപ്പിൽ പരാജയപ്പെട്ടാൽ പ്രതിപക്ഷത്ത് നിന്ന് കൊണ്ട് പ്രവർത്തിക്കുമെന്നും കമൽ പറഞ്ഞു. ഡൽഹി മുഖ്യമന്ത്രി അരവിന്ദ് കെജ്രിവാൾ സഖ്യത്തിനായി ക്ഷണിച്ചിട്ടുണ്ട്. ഈ കാര്യത്തിൽ എല്ലാവരുമായും താൻ ചർച്ചക്ക് തയ്യാറാണെന്നും കമൽ വ്യക്തമാക്കി. തമിഴ്‌നാട്ടിൽ നടത്താനിരിക്കുന്ന പ്രചാരണ യാത്രയുടെ ഔദ്യോഗിക വെബ്‌സൈറ്റ് കമൽ ഉദ്ഘാടനം ചെയ്തു. ഈ മാസം 21 നാണ് നാളൈ നാമതെ എന്ന പേരിൽ യാത്ര ആരംഭിക്കുന്നത്.