കഠ്‍‍വ വിവാദം: പ്രതിഷേധമറിയിച്ച് ചാക്കോച്ചൻ; പിന്തുണയുമായി അഹാന

കശ്‍‍മീരിലെ കഠ്വയില്‍ എട്ട് വയസുകാരിയെ പീഡിപ്പിച്ച് അതിക്രൂരമായി കൊന്ന സംഭവത്തില്‍ പ്രതിഷേധം അറിയിച്ച് നടൻ കുഞ്ചാക്കോ ബോബൻ രംഗത്ത്. താൻ എല്ലാ വിധത്തിലും സന്തോഷവാനായിരിക്കേണ്ട ഈ വേളയിൽ തന്‍റെ മനസ് അസ്വസ്ഥമാണെന്ന് കുഞ്ചാക്കോ ബോബൻ ഫേസ്ബുക്കിൽ കുറിച്ചു. അതിന് കാരണം രാജ്യത്ത് നടക്കുന്ന ഹീരകരമായ പ്രവൃത്തികളാണെന്നും എല്ലാം ഭീതിപ്പെടുത്തുന്നെന്നും ചാക്കോച്ചൻ കുറിച്ചു.


ഫേസ്ബുക്കിൽ കുറിച്ച കുറിപ്പിന്‍റെ സ്ക്രീൻ ഷോട്ട് താരം ഇൻസ്റ്റാഗ്രാമിൽ പോസ്റ്റ് ചെയ്തതോടെ ചാക്കോച്ചന് പിന്തുണയുമായി നടി അഹാന കൃഷ്ണയും രംഗത്തെത്തി. ചാക്കോച്ചന്‍റെ ഇൻസ്റ്റാഗ്രാം ചിത്രത്തിന് കമന്‍റായി അഹാന ഇങ്ങനെ കുറിച്ചു. തീര്‍ച്ചയായും, മനുഷ്യനെന്ന ഘടകത്തിനാണ് പ്രഥമ പരിഗണന നൽകേണ്ടത്. ബാക്കിയെല്ലാം പിന്നീടു നോക്കേണ്ട കാര്യങ്ങളാണ്. മനുശ്യത്വമാകണം നമ്മുടെ മതം. അഹാനയുടെയും ചാക്കോച്ചന്‍റെയും ഈ പരാമര്‍ശത്തോട് അനുകൂലിച്ചും പ്രതികൂലിച്ചും ഒട്ടേറെ പേരാണ് പരസ്യമായി രംഗത്തെത്തുന്നത്. ചാക്കോച്ചൻ സംഘിയാണെന്നും അതിനാലാണ് ഇപ്പോൾ മാത്രം ഇങ്ങനെ പറയുന്നതെന്ന കമന്‍റുമായും പലരും രംഗത്തെത്തിയിട്ടുണ്ട്.

ചാക്കോച്ചന്‍റെ കുറിപ്പിന്‍റെ പൂർണ രൂപം കാണാം

ഈ പുതുവർഷം എനിക്ക് സന്തോഷിക്കാൻ ഒരുപാട് കാര്യങ്ങൾ സമ്മാനിച്ചു. രണ്ട് സൂപ്പര്‍ഹിറ്റ് ചിത്രങ്ങളോടെയാണ് തുടങ്ങിയത്, ഇപ്പോൾ മൂന്നാമത്ത ചിത്രം റിലീസ് ചെയ്യുന്നു. എല്ലായിടത്തു നിന്നും നല്ല റിപ്പോര്‍ട്ടുകൾ ലഭിക്കുന്നു. തീര്‍ച്ചയായും ഞാൻ ഹര്‍ഷോന്മാദത്തിലാറാടി നിൽക്കേണ്ട സമയം. പക്ഷേ ഇപ്പോൾ അതല്ല എന്‍റെ മാനസികാവസ്ഥ.

എന്നാൽ എന്താണ് മനസറിഞ്ഞ് സന്തോഷിക്കാൻ സാധിക്കാത്തത് എന്ന് ഞൊൻ പലകുറി ആലോചിച്ചു. അതിന്‍റെ കാരണമെന്താണെന്നും എനിക്കറിയാം. നമ്മുടെ രാജ്യത്ത് നടക്കുന്ന ഇത്തരം ഹീനകരമായ പ്രവൃത്തികൾ എന്നിൽ ഭീതിയുളവാക്കുന്നു, നാണക്കേട് തോന്നുന്നു.

ഒന്നോര്‍ക്കുക, നമ്മൾ വ്യത്യസ്ത മത വിഭാഗങ്ങളിൽ പെട്ടവരോ. വിവിധ രാഷ്ട്രീയ ചിന്തയുള്ളവരോ വേറിട്ട പ്രത്യയശാസ്ത്രം പുലര്‍ത്തുന്നവരോ ഒക്കെയാകാം... ഇതിലെല്ലാമുപരി നാം ഭാരതീയരാണ്, അതിലുമപ്പുറം നാമെല്ലാം മനുഷ്യരാണ്.