കാവ്യക്ക് ഇന്ന് നിറപ്പകിട്ടില്ലാത്ത പിറന്നാൾ

മലയാളത്തിന്‍റെ പ്രിയ നായിക കാവ്യ മാധവന് ഇന്ന് മുപ്പത്തിമൂന്നാം പിറന്നാൾ. കൊച്ചിയിൽ നടി ആക്രമിക്കപ്പെട്ടതുമായി ബന്ധപ്പെട്ട കേസന്വേഷണത്തോടനുബന്ധിച്ച് വാര്‍ത്തകളിൽ നിറഞ്ഞു നിൽക്കവേയാണ് കാവ്യയുടെ ഇത്തവണത്തെ പിറന്നാൾ എത്തിയിരിക്കുന്നത്. ഇതേ കേസുമായി ബന്ധപ്പെട്ട് ഭര്‍ത്താവ് ദിലീപ് ജയിലിൽ കഴിയുന്നതും കാവ്യയുടെ ഈ പിറന്നാളിന്‍റെ നിറം കെടുത്തുന്നു. കാവ്യയും ദിലീപും വിവാഹിതരായ ശേഷമുള്ള കാവ്യയുടെ ആദ്യ പിറന്നാളാണ് ഇത്. ഒരു പക്ഷേ കാവ്യയ്ക്ക് തന്‍റെ ജീവിതത്തിലെ നിറപ്പകിട്ടില്ലാത്ത ആദ്യ പിറന്നാളായിരിക്കുമിത്.



'പൂക്കാലം വരവായി' എന്ന ചിത്രത്തിലൂടെ മലയാള സിനിമയില്‍ അരങ്ങേറ്റം കുറിച്ച നീലേശ്വരംകാരി ലാൽ ജോസ് ഒരുക്കിയ 'ചന്ദ്രനുദിയ്ക്കുന്ന ദിക്കി'ലൂടെ ദിലീപിന്‍റെ നായികയായെത്തി മുൻനിരയിൽ സ്ഥാനമുറപ്പിച്ചു. ബാല്യവും കൗമാരവുമൊക്കെ മലയാള സിനിമയില്‍ തന്നെ ചെലവിട്ട കാവ്യ മലയാളത്തിന്‍റെ സ്വന്തമാണെന്ന് നിസംശയം പറയാൻ സാധിക്കും. കാവ്യക്കൊപ്പം മലയാളസിനിമയിലെത്തിയ പല നായികമാരും അതിര്‍ത്തി വിട്ടപ്പോള്‍ പോലും കാവ്യയിലെ മലയാളിത്തനിമ മലയാളത്തോടൊപ്പം നിന്നു. ഇടയ്ക്ക് ഒരു തമിഴ് ചിത്രം ചെയ്തെങ്കിലും കാവ്യ മലയാളികളിലേക്ക് മാത്രമായി ചുരുങ്ങി. എന്നാൽ പെരുമഴക്കാലം, ഗദ്ദാമ എന്നീ ചിത്രങ്ങളിലെ അഭിനയത്തിന് സംസ്ഥാന പുരസ്‌കാരം തേടിയെത്തിയത് അവരിലെ നടിയുടെ പ്രാവീണ്യം വിളിച്ചോതി.



1984 സെപ്റ്റമ്പർ 19നാണ് കാവ്യ ജനിച്ചത്. നീലേശ്വരം സ്വദേശികളായ പി. മാധവന്‍റെയും ശ്യാമളയുടെയും മകളായ കാവ്യ അടുത്തകാലത്ത് വിവാദ വാര്‍ത്തകളിലെ സ്ഥിരസാന്നിധ്യമാണ്. 2009ൽ നിഷാൽചന്ദ്രയെ വിവാഹം ചെയ്തശേഷം ബന്ധം വേര്‍പെടുത്തിയ കാവ്യ 2016 നവംമ്പർ 25ന് മലയാള സിനിമാ നടനായ ദിലീപിനെ പുനഃർവിവാഹം ചെയ്തു. തുടര്‍ന്നിങ്ങോട്ടുള്ള ഒട്ടുമിക്കദിവസങ്ങളിലും വാര്‍ത്തകളിലെ നിറസാന്നിധ്യമാണ് കാവ്യ.



Kavya Madhavan's Birthday today

Actress Kavya Madhavan's 33rd Birthday today; But this is a common day for Her in this Year