'ഹംസക്കാടെ മോന്‍'... ആരാധകന് മറുപടി കൊടുത്ത് മുകേഷ്, ഏറ്റെടുത്ത് സോഷ്യല്‍ മീഡിയ!

മലയാളികളുടെ എല്ലാക്കാലത്തെയും പ്രിയപ്പെട്ട നടന്മാരിലൊരാളാണ് നടനും എം എല്‍ എയുമായ മുകേഷ്. സിനിമയില്‍ മാത്രമല്ല, ഉരുളക്കുപ്പേരി പോലെയുള്ള മറുപടികളിലൂടെ പ്രേക്ഷകരെ പൊട്ടിച്ചിരിപ്പിക്കുന്ന മുകേഷിനെ നമ്മള്‍ ഒരുപാട് ഇടങ്ങളില്‍ മുന്നേയും കണ്ടിട്ടുണ്ട്. അത്തരത്തിലൊരു മറുപടിയാണ് ഇപ്പോള്‍ചിരി പടര്‍ത്തുന്നത്! ടി വി ഷോയിലല്ല, മുകേഷിന്‍റെ ഫേസ്ബുക്ക് പേജിലാണെന്ന് മാത്രം!

മമ്മൂട്ടിയും മുകേഷും കൂടി നില്‍ക്കുന്ന സെല്‍ഫി മുകേഷ് തന്‍റെ ഒഫീഷ്യല്‍ പേജില്‍ ഷെയര്‍ ചെയ്തിരുന്നു. ഇത് കണ്ട് സിറാജ് ബിന്‍ ഹംസ എന്നൊരാള്‍ അതിനടിയില്‍ 'കിളവന്മാര്‍ എങ്ങോട്ടാ' എന്ന് കമന്റ് ചെയ്തു. ഉടന്‍ വന്നു, നടന്റെ കിടിലം മറുപടി! 'ഞങ്ങളുടെ പഴയ കൂട്ടുകാരന്‍ ഹംസക്കയെ കാണാന്‍ പോവുകയാ'

ഇതോടെ ആരാധകര്‍ക്ക് ആവേശമായി. 'ഹംസക്കയുടെ മോന്‍' എന്നത് സോഷ്യല്‍ മീഡിയയിലെ പുതിയ പ്രയോഗമായി മാറുകയാണ്! നടന്‍റെ കമന്‍റിനെ തുടര്‍ന്ന് ആരാധകന്‍ കണ്ടം വഴി ഓടി എന്നാണ് കമന്റുകള്‍.

'ഹംസക്കയെ തിരക്കി വന്നവർക്ക്.... ഹംസക്ക ഇല്ല.. പകരം ഹംസക്കോയ വച്ചു അഡ്ജസ്റ്റ് ചെയ്.. ' എന്നു പറഞ്ഞ് മാമുക്കോയയുടെ ചിത്രവും 'ഇത്രയും മാന്യമായ തന്തക്കുവിളി സ്വപ്നങ്ങളിൽ മാത്രം.... ' എന്നുമൊക്കെയുള്ള കമന്‍റുകള്‍ താഴെ വരുന്നുണ്ട്.