എല്ലാവരെയും ഒന്നിച്ച് കിട്ടുന്നത് പ്രയാസകരമായി തുടങ്ങി! കുടുംബസമേതമുള്ള ചിത്രങ്ങളുമായി കൃഷ്ണകുമാര്‍

പ്രണയിച്ച് വിവാഹിതരായവരാണ് കൃഷ്ണകുമാറും സിന്ധുവും. ദൂരദര്‍ശനില്‍ ജോലി ചെയ്തിരുന്ന കാലത്തായിരുന്നു ഇവര്‍ പരിചയത്തിലായത്. ന്യൂസ് റീഡര്‍ ജോലി ഉപേക്ഷിച്ചായിരുന്നു അദ്ദേഹം അഭിനയരംഗത്തേക്കെത്തിയത്. സിനിമയിലും സീരിയലുകളിലുമൊക്കെയായി തന്റേതായ സ്ഥാനം നേടിയെടുത്തിരുന്നു അദ്ദേഹം. നായകനും വില്ലനുമൊക്കെയായി തിളങ്ങിയ അദ്ദേഹം അടുത്തിടെയായിരുന്നു രാഷ്ട്രീയത്തിലേക്കിറങ്ങിയത്. തന്റെ രാഷ്ട്രീയ നിലപാട് വ്യക്തമാക്കിയതോടെ അദ്ദേഹത്തിനെതിരെ രൂക്ഷ വിമര്‍ശനങ്ങളായിരുന്നു ഉയര്‍ന്നത്. ട്രോളുകളും വിമര്‍ശനങ്ങളുമൊന്നും തന്നെ ബാധിക്കാറില്ലെന്നും നിലപാടില്‍ ഉറച്ച് നിന്ന് മുന്നേറുകയാണ് താനെന്നും കൃഷ്ണകുമാര്‍ വ്യക്തമാക്കിയിരുന്നു. അദ്ദേഹത്തിന്റെ മക്കള്‍ക്കെതിരെയും വിമര്‍ശനങ്ങള്‍ ഉണ്ടാവാറുണ്ട്. കൃത്യമായ മറുപടികളാണ് മക്കള്‍ നല്‍കാറുള്ളത്.
സിനിമയും ബിസിനസുമൊക്കെയായി സജീവമാണ് താരപുത്രികള്‍. യൂട്യൂബ് ചാനലിലൂടെയായി അഹാനയും ദിയയും ഇഷാനിയുമെല്ലാം പ്രേക്ഷകര്‍ക്ക് പരിചിതരാണ്. തിരക്കുകള്‍ക്കിടയില്‍ എല്ലാവരേയും ഒന്നിച്ച് കിട്ടുന്നത് കുറവാണ്. ദിവസങ്ങള്‍ക്ക് ശേഷം എല്ലാവരും ഒന്നിച്ചതിന്റെ സന്തോഷം പങ്കിട്ടെത്തിയിരിക്കുകയാണ് കൃഷ്ണകുമാര്‍.
ചുമ്മാ രസത്തിനെടുത്ത ഒരു ഗ്രൂപ്പ്ഫി. മിക്ക കുടുംബങ്ങളിളും മക്കളൊക്കെ വലുതായി അവരവരുടെ ജോലിയുമായി നീങ്ങുമ്പോൾ ഒരുമിച്ചു കാണുക വല്ലപ്പോഴുമാണ്. ഇവിടെയും അങ്ങിനെ ഒക്കെ തന്നെ. മിക്കവാറും ആരെങ്കിലുമൊക്കെ യാത്രയിലാവും. ആറുപേരേയും ഒരുമിച്ചു വീട്ടിൽ കിട്ടുക പ്രയാസമായി തുടങ്ങി. ഇന്നു എല്ലാവരും ഒരുമിച്ചു എറണാകുളത്തു കൂടിയപ്പോൾ എടുത്ത ഒരു ചിത്രം. കണ്ടപ്പോൾ ഒരു രസം തോന്നി. എന്നാപ്പിന്നെ നിങ്ങളുമായി ഒന്ന് ഷെയർ ചെയ്യാമെന്ന് കരുതിയെന്നായിരുന്നു കൃഷ്ണകുമാറിന്റെ കുറിപ്പ്. കൂടുമ്പോള്‍ ഇമ്പമുള്ളതാണ് കുടുംബം. നിങ്ങള്‍ എല്ലാവരെയും ഒന്നിച്ച് കാണാനായതില്‍ ഒരുപാട് സന്തോഷം. എന്നും ഈ സന്തോഷം നിലനില്‍ക്കട്ടെ തുടങ്ങിയ കമന്റുകളാണ് പോസ്റ്റിനെ താഴെ. സ്‌നേഹം അറിയിച്ചെത്തിയവര്‍ക്കെല്ലാം കൃഷ്ണകുമാര്‍ മറുപടി കൊടുത്തിരുന്നു.