അത് ഞങ്ങളുടെ ജീവിതം തന്നെയാണ്; ഭാനുമതിയുടെ കുങ്കുമം തുടച്ചത് തെറ്റായി തോന്നി; അങ്ങനെ ചെയ്യാൻ പാടില്ലാത്തത്; ലക്ഷ്മി

ഒരുപാട് കലാകാരന്മാർ ഒരുപാട് കാലങ്ങളായി നിറയുന്ന തറവാടാണ് മുല്ലശ്ശേരി. പാട്ടുകാരെക്കൊണ്ട് പണ്ട് കാലങ്ങൾ തൊട്ടേ ഈ വീട് നിറഞ്ഞിരുന്നു എന്ന് പറയുകയാണ് ലക്ഷ്മി രാജഗോപാൽ. തങ്ങളുടെ കഥയാണ് രാവണപ്രഭു - ലക്ഷ്മി ബിഹൈൻഡ് വുഡ്സിനു നൽകിയ അഭിമുഖത്തിൽ പറയുന്നു.

ദേവാസുരവും എന്റെയും ഭർത്താവിന്റെയും ബേസിക് കഥയാണ്‌ എങ്കിലും നീലകണ്ഠനും ഭാനുമതിയുമായുള്ള ബൈൻഡിങ് വ്യക്തമായി കാണിച്ചിരിക്കുന്നത് രാവണപ്രഭുവിൽ ആണ്. അത് ഞങ്ങളുടെ ജീവിതം തന്നെയാണ് എന്ന് പല സ്ഥലത്തും ഞങ്ങൾക്ക് അത് തോന്നിയിട്ടുണ്ട്.

ഞങ്ങളുടെ ജീവിതം ഒപ്പി എടുത്തതാണ് രാവണൻ പ്രഭു എന്ന് പറയാം. കാരണം എന്നെയും രാജുവേട്ടനേയും നോക്കിയിട്ടാണ് മോഹൻലാലിനെയും രേവതിയെയും മേക്കപ്പ് ചെയ്തിരിക്കുന്നത്. ഇത് മേക്ക്അപ് ചെയ്തിട്ട് എനിക്ക് ആ ഫോട്ടോ മേക്കപ്പ് ആർട്ടിസ്റ്റ് അയച്ചിരുന്നു. എന്റെ പേരക്കുട്ടി അത് കണ്ടിട്ട് മുത്തശ്ശനും അമ്മമ്മയും എന്നാണ് പറഞ്ഞത്. ഞങ്ങളെ അതേപോലെ പകർത്തി എന്ന് രഞ്ജിത്തും പറഞ്ഞിട്ടുണ്ട്. ഒരുപക്ഷെ അതുകൊണ്ടാകാം എനിക്ക് അത്രയും രാവണപ്രഭു ഇഷ്ടപെട്ടത്. പക്ഷെ ആ കാർത്തികേയൻ എന്ന വ്യക്തി ഞങ്ങളുടെ ജീവിതത്തിലെ വരുന്നില്ല. അത് വേറെ സ്റ്റോറി ആയിരുന്നു.

അതിലെ പാട്ടുകളെ പറ്റി പറയുകയാണ് എങ്കിൽ ഗിരീഷാണ് അത് ചിട്ടപ്പെടുത്തിയത്. ഗിരീഷ് പണ്ടേ ഇവിടെ വരുന്ന വ്യക്തി അല്ലെ. ഗിരീഷ് എന്നെ എപ്പോൾ കണ്ടാലും പറയും എന്റെ പൊട്ടിനെക്കുറിച്ച് എഴുതണം എന്ന്. അന്ന് ഞാൻ വലിയ പൊട്ടാണ് ഇടാറുള്ളത്. അത് ഞാൻ എവിടെ എങ്കിലും ഉൾപ്പെടുത്തും ഉൾപ്പെടുത്തും എന്ന് പറഞ്ഞു പറഞ്ഞാണ് രാവണപ്രഭുവിലെ ആ പാട്ട് വരുന്നത്, തുടുവിരലിൻ തുമ്പാൽ നിൻ തിരുനെറ്റിയിലെന്നെ നീ സിന്ദൂരരേണുവായണിഞ്ഞിരുന്നൂ- ഇത് എന്റെ പൊട്ട് കണ്ടെഴുതിയതാണ്.

അതിൽ ഒരു ചെറിയ തെറ്റായി തോന്നിയത് പൊട്ട് മായ്ച്ചു കളഞ്ഞു എന്നുള്ളതാണ്. ബോഡി കൊണ്ട് വന്നു കിടത്തുന്നു. അത് ശരിക്കും ചെയ്യാൻ പാടില്ലാത്തത് ആണ്. സുമംഗലി ആയി ഒരു സ്ത്രീ മരിക്കുന്നത് വലിയ ഭാഗ്യമാണ്. ഒരു സ്ത്രീയെ സംബന്ധിച്ചിടത്തോളം അത് വലിയ പുണ്യമാണ്. മരിച്ചു കിടന്നാലും സുമംഗലി ആയ സ്ത്രീയെ കുങ്കുമം ഇട്ടിട്ടാണ് കിടത്തുക. പക്ഷെ അതിൽ തുടച്ചു കളഞ്ഞു. അത് തെറ്റായി തോന്നി. അത് വളരെ ഹൃദയസ്പർശിയായ ഗാനം തന്നെയാണ്. - ലക്ഷ്മി പറഞ്ഞു.