'തല'യും 'മക്കൾ സെൽവനും' ഒന്നിക്കുന്നു; 'വിശ്വാസ'ത്തിലൂടെ

‘തല’ അജിത്തിന്‍റെ പുതിയ ചിത്രത്തില്‍ വിജയ് സേതുപതിയും. അജിത്ത് നായകനാകുന്ന 58-ാമത് ചിത്രമായ 'വിശ്വാസ'ത്തിലാണ് 'മക്കൾ സെൽവൻ' മുഖ്യ വേഷത്തിൽ എത്തുന്നത്. വിജയ് സേതുപതി തന്നെയാണ് ട്വിറ്ററിലൂടെ ഈ വിവരം ആരാധകരെ അറിയിച്ചത്. അഞ്ച് വര്‍ഷത്തെ ഇടവേളയ്ക്ക് ശേഷം തെന്നിന്ത്യൻ ലേഡി സൂപ്പര്‍ സ്റ്റാര്‍ നയന്‍താരയും അജിത്തും ഈ ചിത്രത്തിലൂടെ ഒന്നിക്കുന്നു എന്നത് ആരാധകരിൽ വൻ പ്രതീക്ഷയാണ് നൽകുന്നത്.



വിജയ് സേതുപതിയും നയന്‍താരയും ഒന്നിച്ച നാനും റൗഡി താന്‍ എന്ന സൂപ്പര്‍ഹിറ്റ് ചിത്രത്തിനു ശേഷം ഇരുവരും 'വിശ്വാസ'ത്തിലൂടെ ഒന്നിക്കുന്നു എന്ന മറ്റൊരു പ്രത്യേകതയും ചിത്രത്തിനുണ്ട്. കൂടാതെ ‘തല’യോടൊപ്പം മക്കള്‍ സെല്‍വൻ എത്തുമ്പോള്‍ പ്രേക്ഷകരും ആകാംക്ഷയോടെ കാത്തിരിക്കുന്ന ചിത്രമായി മാറുകയാണ് വിശ്വാസം. അജിത് – ശിവ കൂട്ടുകെട്ടിന്‍റെ സൂപ്പര്‍ ഹിറ്റായ ‘വിവേഗ’ത്തിനു ശേഷം തുടര്‍ച്ചയായ നാലാമത്തെ ചിത്രമാണ് വിശ്വാസം. തമിഴ് മക്കളെ ഇളക്കിമറിച്ച ചിത്രങ്ങളായ വീരം, വേതാളം, വിവേഗം എന്നിവയ്ക്ക് ശേഷമെത്തുന്ന ചിത്രം എന്ന വലിയ പ്രത്യേകതയും 'വിശ്വാസ'ത്തിനുണ്ട്.