സിനിമ മേഖലയിൽ നിന്ന് 50ഒാളം സാക്ഷികൾ

അങ്കമാലി: നടിയെ ആക്രമിച്ച കേസിൽ പോലീസ് സമ‍ർപ്പിച്ച കുറ്റപത്രത്തിൽ അമ്പതോളം സാക്ഷികൾ. ബുധനാഴ്ച 3.30 ഓടെയാണ് കുറ്റപത്രവുമായി അന്വേഷണ സംഘം കോടതിയില്‍ എത്തിയത്. ദിലീപിനെ എട്ടാം പ്രതിയാക്കിയാണ് കുറ്റപത്രം സമര്‍പ്പിച്ചിരിക്കുന്നത്. ഗൂഢാലോചന, കൂട്ടബലാത്സംഗം, തട്ടിക്കൊണ്ടുപോകല്‍ എന്നിവയടക്കം 17 ഓളം വകുപ്പുകളാണ് പ്രതികള്‍ക്കെതിരെ ചുമത്തിയിരിക്കുന്നത്. സിനിമയില്‍ നിന്നുള്ള 50 പേര്‍ അടക്കം 385 സാക്ഷികളും 33 രഹസ്യമൊഴികളും 450 ഓളം രേഖകളും ഉള്‍പ്പെട്ടതാണ് 650 പേജുള്ള അനുബന്ധ കുറ്റപത്രം.

ജയിലില്‍ നിന്ന് കത്തെഴുതിയ വിപിന്‍ ലാല്‍, എആര്‍ ക്യാമ്പിലെ പോലീസുകാരന്‍ എന്നിവരാണ് മാപ്പുസാക്ഷികള്‍. 650 പേജുള്ള കുറ്റപത്രത്തിനൊപ്പം ശാസ്ത്രീയ പരിശോധന പരിശോധനാ ഫലങ്ങളും സമര്‍പ്പിച്ചു. ആകെ 400 രേഖകളാണ് കുറ്റപത്രത്തിലുള്ളത്. സിനിമാ മേഖലയില്‍ നിന്ന് അമ്പതിലധികം ആളുകളെ സാക്ഷികളാക്കിയിട്ടുണ്ട്. മഞ്ജു വാര്യരാണ് പ്രധാന സാക്ഷികളില്‍ ഒരാള്‍. 22 പേരുടെ രഹസ്യമൊഴി രേഖപ്പെടുത്തിയിട്ടുണ്ട്. കൂട്ട ബലാത്സംഗം അടക്കമുള്ള കുറ്റങ്ങള്‍ ചുമത്തിയിട്ടുള്ളതിനാല്‍ കേസിന്റെ വിചാരണാ നടപടികള്‍ എറണാകുളം സെഷന്‍സ് കോടതിയിലായിരിക്കും നടക്കുക.