നായികയായി മാത്രമേ അഭിനയിക്കൂ എന്ന് വാശിപിടിച്ചാൽ ഞാൻ വീട്ടിൽ ഇരിക്കേണ്ടി വരുമെന്ന് ഷീലു എബ്രഹാം

" നായികയായി മാത്രമേ ഞാൻ അഭിനയിക്കുന്നു എന്ന് പറയാൻ മാത്രം ഞാൻ അത്ര ലെവൽ ഉള്ള നടിയല്ല. നല്ല കാമ്പുള്ള കഥാപാത്രങ്ങൾ കിട്ടിയാൽ ഞാൻ അഭിനയിക്കും .പട്ടാഭിരാമൻ സിനിമയിൽ ജയറാമിന്റെ നായികയായിരുന്നതു കൊണ്ട് ഇനിയും നായികയായി മാത്രമേ അഭിനയിക്കൂ എന്ന വാശിയൊന്നും എനിക്കില്ല. എനിക്ക് എല്ലാ റോളുകളും ചെയ്യാൻ സാധിക്കുമെന്ന ഉറച്ച വിശ്വാസം ഉണ്ട്."

" ഒരു സ്ത്രീയ്ക്ക് ഏതു പ്രായത്തിലും ചെയ്യാനുള്ള കഥാപാത്രവും ഒരു സിനിമയിൽ ഉണ്ട്. അതിപ്പോ അമ്പതു വയസ്സുള്ള ഒരു നടിയ്ക്ക് വേണമെങ്കിലും അഭിനയിക്കാം. ഞാൻ വളരെ ജെനുവിൻ ആയി സംസാരിക്കുന്ന പ്രവർത്തിക്കുന്ന ഒരു വ്യക്തിയാണ്, എന്നാൽ നടിയായ ശേഷം ചില സമയങ്ങളിൽ ഈ ജനുവിനിറ്റി വേണം എന്ന് തോനുന്നില്ല അതിനുദാഹരണമാണ് ഞാൻ നേരിട്ട മുലയൂട്ടൽ വിവാദം. എന്താണോ നമ്മൾക്ക് തോനുന്ന സത്യങ്ങൾ അത് നമ്മൾ പറയാൻ വെമ്പുന്നുണ്ടെങ്കിൽ മിതത്വം പാലിക്കുന്നതാണ് നല്ലത്. ഒരു വ്യക്തി എന്ന നിലയില്‍ പ്രശ്‌നങ്ങള്‍ കൈകാര്യം ചെയ്യാന്‍ പ്രത്യേകം ഒരു സംഘടന വേണമെന്ന് തോന്നിയിട്ടില്ല. ഒരുസംഘടനയുടെയും ഭാഗമാകാൻ താൻ ആഗ്രഹിക്കുന്നുമില്ല. ഒരു പ്രശ്നം ഉണ്ടാകുമ്പോൾ പോയി ഒരു സംഘടന രൂപീകരിക്കുകയോ അതിന്റെ ഭാഗമാകുന്നതിലോ എനിക്കിഷ്ട്ടം പ്രശ്‌നം ഉണ്ടാകാതെ നോക്കുക എന്നതാണ്. " ഈറ്റ് ആൻഡ് ടോക്ക് വിത്ത് സന്ദീപ് പരിപാടിയിലൂടെ സംസാരിക്കുകയായിരുന്നു ഷീലു.


നിര്‍മ്മാതാവ് എബ്രഹാം മാത്യുവിന്റെ ഭാര്യയായ ഷീലു വിവാഹത്തിന് ശേഷമാണ് സിനിമയില്‍ നിറഞ്ഞത്. കഴിഞ്ഞ ആറ് വര്‍ഷങ്ങളായി മലയാള സിനിമയില്‍ ചെറുതും വലുതുമായ വേഷങ്ങളിൽ ഇവർ സജീവമാണ് . പോലീസ് വേഷങ്ങള്‍ നന്നായി ഇണങ്ങുന്ന അപൂര്‍വം നടിമാരില്‍ ഒരാളാണ് ഷീലുവെന്നും പ്രേക്ഷകർക്ക് അഭിപ്രായമുണ്ട്.