ആനിയും ലിസിയും റിമ ക്ലലിങ്കലും മാത്രമല്ല സംവിധായകരെ വിവാഹം കഴിച്ചവര്‍ വേറെയുമുണ്ട്! ചിലര്‍ ഇടയ്ക്ക് വെച്ച് വഴിപിരിഞ്ഞു!
സ്‌ക്രീനിലെ മികച്ച ജോഡികള്‍ ജീവിതത്തിലും ഒരുമിക്കുന്നത് സ്വഭാവികമായ കാര്യമായി മാറിയിരിക്കുകയാണ് ഇപ്പോള്‍. ക്യാമറയ്ക്ക് മുന്നില്‍ നിന്ന് നോക്കിയവരും ഇത്തരത്തില്‍ നായികമാരെ വിവാഹം ചെയ്തിരുന്നു. സംവിധായകരെയാണ് വിവാഹം ചെയ്തതെങ്കിലും വിവാഹത്തോടെ അഭിനയം നിര്‍ത്തിയവര്‍ ഏറെയാണ്. കുടുംബ ജീവിതത്തിന് പ്രാധാന്യം നല്‍കുന്നതിന് വേണ്ടിയാണ് ഈ മാറ്റമെന്ന് ചിലരൊക്കെ പറഞ്ഞിരുന്നു. സംവിധായകരെ ജീവിതസഖിയാക്കിയ നായികമാരും മലയാള സിനിമയിലുണ്ട്. ലിസിയേയും പ്രിയദര്‍ശനേയും പോലെ ഇടയ്ക്ക് വെച്ച് വഴിപിരിഞ്ഞവരുമുണ്ട്.
ഗൗതമി നായരും ശ്രീനാഥ് രാജേന്ദ്രനും
സെക്കന്‍ഡ് ഷോ എന്ന സിനിമയിലൂടെയായിരുന്നു ഗൗതമി നായര്‍ തുടക്കം കുറിച്ചത്. ദുല്‍ഖര്‍ സല്‍മാനും സണ്ണി വെയ്‌നുമൊക്കെ തുടക്കം കുറിച്ചത് ഈ ചിത്രത്തിലൂടെയായിരുന്നു. ഈ പുതുമുഖങ്ങള്‍ക്കൊപ്പമായാണ് ശ്രീനാഥ് രാജേന്ദ്രന്‍ എന്ന സംവിധായകനും തുടക്കം കുറിച്ചത്. മികച്ച പ്രതികരണമായിരുന്നു ചിത്രത്തിന് ലഭിച്ചത്. ഈ സിനിമയിലൂടെ അരങ്ങേറിയവരെല്ലാം ഇന്ന് മലയാള സിനിമയുടെ അവിഭാജ്യ ഘടകമായി മാറുകയും ചെയ്തു. ആദ്യ സിനിമയുടെ സംവിധായകനെയാണ് ഗൗതമി നായര്‍ വിവാഹം ചെയ്തത്. വൃത്തമെന്ന ചിത്രത്തിലൂടെ സംവിധാനത്തിലേക്ക് കടക്കുകയാണ് താരം. 2017 ലായിരുന്നു ഇവരുടെ വിവാഹം. ഭര്‍ത്താവിന് പിന്നാലെയായി ഭാര്യയും സംവിധാനത്തിലേക്ക് കടക്കുകയാണ് ഇപ്പോള്‍. കുറുപ്പിലൂടെ ദുല്‍ഖരും ശ്രീനാഥും വീണ്ടും ഒരുമിച്ചെത്തുന്നുണ്ട്.
ഗീതുമോഹന്‍ദാസും രാജീവ് രവിയും
മലയാള സിനിമയിലെ സംവിധായക ദമ്പതികളായാണ് ഇവരെ വിശേഷിപ്പിക്കാറുള്ളത്. ബാലതാരമായാണ് ഗീതുമോഹന്‍ദാസ് സിനിമയില്‍ തുടക്കം കുറിച്ചത്. പിന്നീട് നായികാനിരയിലേക്ക് ചേക്കേറിയ താരം മികച്ചൊരു അഭിനേത്രിയാണ് താനെന്ന് തെളിയിച്ചിരുന്നു. അഭിനേത്രിയായി മുന്നേറുന്നതിനിടയിലായിരുന്നു സംവിധാനത്തിലേക്ക് തിരിഞ്ഞത്. ക്യാമറമാനും സംവിധായകനുമായ രാജീവ് രവിയാണ് ഗീതുവിനെ ജീവിതസഖിയാക്കിയത്. 2009ലായിരുന്നു ഇവരുടെ വിവാഹം. മൂത്തോനിലൂടെ ലോകത്തെ തന്നെ വിസ്മയിപ്പിച്ചിരിക്കുകയാണ് ഗീതു ഇപ്പോള്‍.
ആഷിഖ് അബുവും റിമ കല്ലിങ്കലും
പ്രണയിച്ച് വിവാഹിതരായ താരദമ്പതികളാണ് ആഷിഖ് അബുവും റിമ കല്ലിങ്കലും. താരത്തിന് കരിയര്‍ ബ്രേക്ക് സമ്മാനിച്ച സംവിധായകരിലൊരാള്‍ കൂടിയായിരുന്നു അദ്ദേഹം. 22 ഫീമെയില്‍ കോട്ടയമെന്ന ചിത്രത്തിലൂടെ റിമയുടെ കരിയര്‍ തന്നെ മാറിമറിയുകയായിരുന്നു. ഇതിന് പിന്നാലെയായാണ് ഇരുവരും പ്രണയത്തിലാണെന്ന തരത്തിലുള്ള റിപ്പോര്‍ട്ടുകളും പുറത്തുവന്നത്. അധികം വൈകാതെ അത് സത്യമാണെന്നും വിവാഹ ജീവിതത്തിലേക്ക് പ്രവേശിക്കുകയാണെന്നും പറഞ്ഞ് ഇരുവരും എത്തുകയായിരുന്നു. ആര്‍ഭാടരഹിത വിവാഹമായിരുന്നു ഇവരുടേത്.
ആനി-ഷാജി കൈലാസ്
മലയാളികളുടെ എക്കാലത്തേയും പ്രിയപ്പെട്ട നായികമാരിലൊരാളാണ് ആനി. വ്യത്യസ്തമായ സിനിമകളുമായി മുന്നേറുന്നതിനിടയിലായിരുന്നു ഷാജി കൈലാസ് ആനിയെ ജീവിതസഖിയാക്കിയത്. പ്രണയിച്ച് വിവാഹിതരായവരാണ് ഇവരും. തുടക്കത്തില്‍ എതിര്‍പ്പുകള്‍ ഏറെയായിരുന്നുവെങ്കിലും ഇവരുടെ തീരുമാനത്തിന് വീട്ടുകാരും കൂട്ടുനില്‍ക്കുകയായിരുന്നു പിന്നീട്. സിനിമയിലേക്ക് തിരിച്ചുവരാനുള്ള അവസരങ്ങള്‍ ലഭിച്ചിരുന്നുവെങ്കിലും ആനി അത് നിരസിക്കുകയായിരുന്നു. ആനീസ് കിച്ചണെന്ന പരിപാടിയിലൂടെ ടെലിവിഷനില്‍ സജീവമാണ് താരം.
ലിസി-പ്രിയദര്‍ശന്‍
മലയാളത്തിന്റെ എക്കാലത്തേയും മികച്ച സംവിധായകരിലൊരാളായ പ്രിയദര്‍ശനും അഭിനേത്രിയായ ലിസിയും പ്രണയിച്ചാണ് വിവാഹിതരായത്. താരത്തിന് കരിയര്‍ ബ്രേക്ക് ചിത്രങ്ങളായിരുന്നു ഈ സംവിധായകന്‍ സമ്മാനിച്ചത്. ലിസിയുടെ വീട്ടുകാര്‍ ഈ ബന്ധത്തെ എതിര്‍ത്ത് എത്തിയിരുന്നുവെങ്കിലും ഗത്യന്തരമില്ലാതെ മകളുടെ ആഗ്രഹത്തിന് സമ്മതം മൂളുകയായിരുന്നു. സന്തോഷകരമായ കുടുംബജീവിതം നയിച്ചുവരുന്നതിനിടയിലായിരുന്നു ഇരുവരും വിവാഹമോചനം നേടിയത്. വിവാഹമോചനത്തിന് ശേഷവും സുഹൃത്തുക്കളായി കഴിയുകയാണ് ഇരുവരും.
സീമ- ഐവി ശശി
മലയാളത്തിലെ മുന്‍നിര സംവിധായകരിലൊരാളായ ഐവി ശശി ജീവിതസഖിയാക്കിയത് അഭിനേത്രിയായ സീമയെ ആയിരുന്നു. അവളുടെ രാവുകള്‍ എന്ന ചിത്രത്തില്‍ സീമയായിരുന്നു നായിക. ഈ സിനിമ ചെയ്യുന്നതിനിടയിലായിരുന്നു സീമയെ ജീവിതസഖിയാക്കിയാലോ എന്ന കാര്യത്തെക്കുറിച്ച് സംവിധായകന്‍ ചിന്തിച്ചത്. അധികം വൈകാതെ തന്നെ ആ ബന്ധം വിവാഹത്തിലേക്ക് എത്തുകയായിരുന്നു. വിവാഹ ശേഷവും സീമ സിനിമയില്‍ സജീവമായിരുന്നു. മക്കളും സിനിമാരംഗത്ത് പ്രവര്‍ത്തിച്ചിരുന്നു.