ആഷിഖ് അബുവും റിമയും
വിദ്യാർഥികളോടൊപ്പമാണ് ഞങ്ങൾ. അവരുടെ കൂടെ നിൽക്കുകയാണ് ഞങ്ങളും. നമുക്ക് പറയാൻ പറ്റാത്തത് അവർ കൃത്യമായി എഴുന്നേറ്റ് നിന്ന് പറയുകയാണ്. അവരുടെ കൂടെ നിൽക്കുകയല്ലാതെ ഇനി നമുക്ക് വേറെ നിർവ്വാഹമില്ല. അതിനാലാണ് തങ്ങളും ഈ നിയമഭേദഗതിക്കെതിരെ പ്രതിഷേധത്തിനിറങ്ങിയതെന്നാണ് ആഷിഖും റിമയും മാധ്യമങ്ങളോട് പറഞ്ഞത്
ഗീതു മോഹൻദാസ്
നടിയും സംവിധായികയുമായ ഗീതു മോഹൻദാസും ഭർത്താവും സംവിധായകനും ഛായാഗ്രാഹകനുമായ രാജീവ് രവിയും മകൾ ആരാധനയും പ്രതിഷേധ മാർച്ചിൽ പങ്കെടുക്കുന്നതിനായി എത്തിയിരുന്നു. ഡോ.ബി.ആർ അംബേദ്കറിന്റെ ചിത്രവുമായിട്ടായിരുന്നു ഇവർ മാർച്ചിൽ പങ്കെടുത്തത്.
ഷെയ്ൻ നിഗവും ശരൺ ജിത്തും
നമ്മളൊരു കൂട്ടായ്മയിൽ ജീവിക്കുന്നവരല്ലേ ഒറ്റയ്ക്കല്ലല്ലോ, അവിടെ കണ്ട ചില പ്രശ്നങ്ങൾ തെറ്റാണെന്ന് തോന്നിയതിനാലാണ് ഇത്തരത്തിലൊരു പ്രതിഷേധമെന്നാണ് നടൻ ഷെയ്ൻ നിഗം മാധ്യമങ്ങളോട് പറഞ്ഞത്. നമ്മുടെ നിയന്ത്രണം അവരുടെ കയ്യിലല്ലെന്നും നമ്മളുടെ നിയന്ത്രണം നമ്മുടെ കയ്യിലല്ലേ, നമ്മളൊക്കെ ഇൻഡിപെൻഡഡ് ആയ മനുഷ്യരല്ലേയെന്നുമാണ് പ്രതിഷേധത്തിൽ പങ്കെടുക്കുന്നതിനിടെ ഷെയ്ൻ പറഞ്ഞത്. അടുത്തിടെ 41 എന്ന ലാൽ ജോസ് ചിത്രത്തിലൂടെ ശ്രദ്ധ നേടിയ ശരൺ ജിത്തും പ്രതിഷേധത്തിനായെത്തിയിരുന്നു.
ബിനീഷ് ബാസ്റ്റിൻ
ടീമേ, ഇത് ഇന്ത്യയിലെ ജനങ്ങൾക്ക് വേണ്ടിയുള്ള സമരമാണ്, റിജക്ട് സിഎഎ എന്ന പ്ലക്കാർഡും കൈകളിലേന്തിക്കൊണ്ടായിരുന്നു നടൻ ബിനീഷ് ബാസ്റ്റിൻ പ്രതിഷേധറാലിയിൽ പങ്കെടുക്കാനായെത്തിയിരുന്നത്. മുമ്പും സോഷ്യൽമീഡിയയിലൂടെ താരം നിലപാട് വ്യക്തമാക്കിയിട്ടുള്ളയാളാണ്
നിമിഷ സജയനും ജോളി ചിറയത്തും
കോളേജിലൊക്കെ സംഭവിക്കുന്ന പ്രതിഷേധത്തെ ഞങ്ങൾ സപ്പോർട്ട് ചെയ്യുകയാണ്. സർക്കാർ വളരെ ഗൌരവമായി ചിന്തിക്കേണ്ട വിഷയമാണ്. നമ്മൾ ചരിത്രം രചിക്കുകയാണ്, വിദ്യാർഥി പ്രതിഷേധമൊക്കെ ഏറെ ചരിത്രമായി കഴിഞ്ഞിട്ടുണ്ട്. നമ്മുടെ പ്രതിഷേധം ഇവിടെ മാറ്റം കൊണ്ടുവരുമെന്ന് തന്നെയാണ് വിശ്വാസമെന്നാണ് പ്രതിഷേധത്തിനെത്തിയ നിമിഷ സജയൻ മാധ്യമങ്ങളോട് പറഞ്ഞത്. 'തൃശൂർ ചോദിച്ചിട്ട് കൊടുത്തിട്ടില്ല, പിന്നല്ലേ ഇന്ത്യ' എന്നൊരു ബോർഡ് കണ്ടത് ഏറെ ആവേശം നിറച്ചുവെന്നും താരം പറയുകയുണ്ടായി. നടിയും ആക്ടിവിസ്റ്റുമായ ജോളി ചിറയത്തും പ്രതിഷേധറാലിയുടെ ഭാഗമായിരുന്നു.
ഷഹബാസ് അമനും ലാലിയും
ഗായകനും സംഗിത സംവിധായകനുമായ ഷഹബാസ് അമനും കുമ്പളങ്ങി നൈറ്റ്സ് എന്ന സിനിമയിലൂടെ ശ്രദ്ധ നേടിയ ലാലി മരക്കാറും പ്രതിഷേധറാലിയുടെ ഭാഗമായി പങ്കെടുത്തു. മുദ്രാവാക്യം വിളിച്ചുകൊണ്ട് സിഎഎ നിയമം പിൻവലിക്കണമെന്ന പ്ലക്കാർഡുകളുമായിട്ടായിരുന്നു ഏവരും പ്രതിഷേധറാലിയുടെ ഭാഗമായത്.
ഗോകുലൻ
ആമേൻ എന്ന ചിത്രത്തിലെ തെങ്ങിൻ മുകളിലെ ദൈവം എന്ന കഥാപാത്രമായി ശ്രദ്ധ നേടിയ ഗോകുലനും മണികണ്ഠൻ ആചാരിയുമൊക്കെ പ്രതിഷേധറാലിയുടെ ഭാഗമായിരുന്നു. കുറച്ചുകാലങ്ങളായി എല്ലാവരും ഭീതിയിലാണ്. നമ്മളനുഭവിച്ച സ്വാതന്ത്ര്യം, സന്തോഷം, സമാധാനം തിരിച്ചുപിടിക്കാനായാണ് ഈ പ്രതിഷേധമെന്നാണ് മണികണ്ഠൻ മാധ്യമങ്ങളോട് പറഞ്ഞത്.