നഷ്ടങ്ങളുടെ വർഷത്തിൽ നികത്താനാവാത്ത ഒന്നുകൂടി; ഒത്തിരി നേരത്തേയാണ് ഈ യാത്ര: സച്ചിയുടെ വിയോഗത്തിൽ വിതുമ്പി താരങ്ങൾ!

നഷ്ടങ്ങളുടെ വർഷത്തിൽ നികത്താനാകാത്ത ഒരു നഷ്ടം കൂടി. മലയാള സിനിമയുടെ അതുല്യ കലാകാരൻ്റെ അകാല വിയോഗത്തിൽ വിതുമ്പുകയാണ് താരങ്ങൾ. ആരും ഒട്ടും പ്രതീക്ഷിച്ചിരുന്നില്ല. മരണം രംഗബോധമില്ലാത്തൊരു കോമാളിയാണെന്ന് പറയുന്നതെത്ര പച്ചയായ പരമാർത്ഥമാണ്. മലയാളികളുടെ പ്രിയപ്പെട്ട കലാകാരൻ സച്ചിയുടെ അപ്രതീക്ഷിത വിയോഗം സിനിമാ താരങ്ങളിൽ ഏൽപ്പിച്ച മുറിവ് എത്ര ആഴമുള്ളതാണെന്ന് അവരുടെ സച്ചിയേട്ടാ എന്ന വിളിയിൽ നിന്ന് തന്നെ വ്യക്തമാണ്. സംവിധായകനും തിരക്കഥാകൃത്തുമായ സച്ചിയുടെ വിയോഗവാർത്ത പുറത്തു വന്നതോടെ പ്രിയ താരങ്ങൾ തങ്ങളുടെ പ്രിയപ്പെട്ടവന് ആദരാഞ്ജലികൾ അർപ്പിച്ച് രംഗത്തെത്തിയിരിക്കുകയാണ് ഇപ്പോൾ.

Also Read: ആ കാത്തിരുപ്പ് വിഫലമായി; ഹിറ്റുകൾ സമ്മാനിച്ച് ഒടുവിൽ കണ്ണീരിലാഴ്ത്തി സച്ചിയും!

നിരവധി താരങ്ങളാണ് തങ്ങളുടെ സോഷ്യൽ മീഡിയകളിലൂടെ പ്രിയപ്പെട്ട സംവിധായകന് അന്ത്യാഞ്ജലി അർപ്പിച്ചിരിക്കുന്നത്. നടന്മാരായ സുരാജ് വെഞ്ഞാറമ്മൂട്, മമ്മൂട്ടി, മോഹന്‍ലാല്‍, ദിലീപ്, പാര്‍വ്വതി, നിവിൻ പോളി, ടൊവിനോ തോമസ്, ദുൽഖർ സൽമാൻ, പൃഥ്വിരാജ് സുകുമാരൻ അജു വർഗ്ഗീസ്, കൃഷ്ണശങ്കർ, നീരജ് മാധവ്, കുഞ്ചാക്കോ ബോബൻ, സണ്ണി വെയ്ൻ, ഇന്ദ്രജിത്ത് സുകുമാരൻ, ശങ്കർ, നടിമാരായ മാളവിക മേനോൻ, ശിവദ, നസ്രിയ ഫഹദ്, ഐമ റോസ്മി, അപർണ നായർ, മഞ്ജു വാര്യർ ഗായികയും അവതാരകയുമായ റിമി ടോമി തുടങ്ങി നിരവധി പേരാണ് സച്ചിയുടെ വിയോഗത്തെ തുടർന്ന് നെഞ്ചു പൊട്ടി ഹൃദയത്തിൽ നിന്നുള്ള വാക്കുകളോടെ ഫേസ്ബുക്കിലൂടെ ആദരാഞ്ജലികൾ കുറിച്ചിരിക്കുന്നത്.





സംവിധായകൻ്റെ ചിത്രം പങ്കുവെച്ചുകൊണ്ട് പൃഥ്വിരാജ് കുറിച്ചിരിക്കുന്നത് പോയി എന്നാണ്. കുഞ്ചാക്കോ ബോബൻ പ്രൊഫൈൽ പിക്ചർ കറുപ്പാക്കിമാറ്റിയാണ് തൻ്റെ സങ്കടം അറിയിച്ചത്. നഷ്ടങ്ങളുടെ വർഷത്തിൽ നികത്താനാവാത്ത ഒരു നഷ്ടം കൂടി.. പ്രിയ സച്ചിയ്ക്ക്‌ ആദരാഞ്ജലികൾ. സച്ചിയുടെ വിയോഗത്തിലെ സങ്കടം അറിയിച്ച് മഞ്ജു വാര്യർ കുറിച്ചത് ഇങ്ങനെയാണ്. അതേസമയം ഹൃദയം നുറുങ്ങുന്ന വേദനയിലാണ് നടൻ സുരാജ് വെഞ്ഞാറമ്മൂട് വാക്കുകൾ കുറിച്ചിരിക്കുന്നത്. അതിങ്ങനെയാണ്.





നഷ്ടപ്പെടരുതെന്ന് ഒരുപാട് ആഗ്രഹിച്ച, പ്രാർത്ഥിച്ച ഒരു നഷ്ടം കൂടി... ഒത്തിരി നേരത്തെയാണ് ഈ യാത്ര...ഒരുപാട് കാതലും കഴമ്പുമുള്ള കഥകൾ മനസ്സിലുള്ള ഒരു എഴുത്തുകാരൻ. പ്രതിഭയാർന്ന ഒരുപാട് സിനിമകൾ ഇനിയും പ്രേക്ഷകർക്ക് നൽകാനുള്ള സംവിധായകൻ. അതിലെല്ലാം ഉപരി മലയാള സിനിമാലോകത്തിന്റെ പകരം വെക്കാനില്ലാത്ത ഒരു സമ്പത്ത്. അതായിരുന്നു സച്ചിയേട്ടൻ. നഷ്ടമായത് ഒരു സഹപ്രവർത്തകനെ മാത്രമല്ല... നല്ലൊരു സുഹൃത്തിനെയും സഹോദരനെയുമാണ്..! നഷ്ടങ്ങളുടെ നിരയിലേക്ക് ഇപ്പോഴൊന്നും ഇടം പിടിക്കരുതായിരുന്ന വിജയങ്ങളുടെ മാത്രം തോഴൻ... പകരം വെക്കാനില്ലാത്ത ആ കഥാപാത്രങ്ങളിലൂടെ തന്നെ സച്ചിയേട്ടൻ ഇനിയും ജീവിക്കും. ആദരാജ്ഞലികൾ സച്ചിയേട്ടാ. സുരാജ് വെഞ്ഞാറമ്മൂട് കുറിച്ചു.

Also Read: 'പോയി'; സച്ചിയുടെ വിയോഗത്തില്‍ ഉള്ളുരുകി പൃഥ്വിരാജ്!

അപ്രതീക്ഷിതമായ വിയോഗവാർത്ത ഞെട്ടിച്ചുവെന്നാണ് നടൻ നിവിൻ പോളി കുറിച്ചിരിക്കുന്നത്. മലയാള സിനിമയുടെ വലിയ നഷ്ടം എന്നും നിവിൻ അഭിപ്രായപ്പെട്ടു. ഇതേ അർത്ഥത്തിൽ തന്നെയാണ് മറ്റു നടന്മാരും കലാകാരൻ്റെ വിയോഗത്തെ കുറിച്ച് സോഷ്യൽ മീഡിയയിൽ കുറിച്ചിരിക്കുന്നത്. ഏത്ര പെട്ടെന്നാണ് നിൻ്റെ യാത്ര, ഒരു മുന്നറിയിപ്പുമില്ലാതെ നീ പോയി, ജീവിതത്തിൽ ഒരുപാടിഷ്ടപ്പെട്ടിരുന്നു, ഇപ്പോഴും ഇഷ്ടപ്പെടുന്നു. നിൻ്റെ കുടുംബത്തെയും സുഹൃത്തുക്കളെയും ദേവം അനുഗ്രഹിക്കട്ടെ ആദരാഞ്ജലികളർപ്പിച്ചുകൊണ്ട് നടൻ ബിജു മേനോൻ കുറിച്ചത് ഇങ്ങനെയാണ്.