അന്‍പതിനായിരത്തിന്റെ ബാഗ് മേടിച്ചാല്‍ വിറയലാണ്! സ്ഥലം മേടിക്കാമായിരുന്നു എന്ന് തോന്നുമെന്ന് മല്ലിക സുകുമാരന്‍

മിനിസ്‌ക്രീനിലും ബിഗ് സ്‌ക്രീനിലുമായി സജീവമാണ് മല്ലിക സുകുമാരന്‍. തിരക്കുകളെല്ലാം ആസ്വദിച്ച് മുന്നേറുകയാണ് അവര്‍. മകന്‍ സംവിധാനം ചെയ്ത സിനിമയില്‍ മകനൊപ്പം അഭിനയിക്കാനുള്ള അവസരവും മല്ലികയ്ക്ക് ലഭിച്ചിരുന്നു. പൊതുവെ ആഡംബരം കാണിച്ച് പൈസ ചെലവാക്കുന്ന പ്രകൃതമല്ല തന്റേതെന്ന് അവര്‍ പറയുന്നു. ബിഹൈന്‍ഡ് വുഡ്‌സിന് നല്‍കിയ അഭിമുഖത്തിലായിരുന്നു അവര്‍ വിശേഷങ്ങള്‍ പങ്കുവെച്ചത്.
ആഡംബരം കാണിക്കാനായി പൈസ മുടക്കുന്ന ശീലമില്ല. അന്‍പതിനായിരം രൂപയുടെ ബാഗൊക്കെ എടുത്ത് പോവുമ്പോള്‍ എനിക്ക് വിറയല്‍ വരും. ഈശ്വരാ രണ്ട് സെന്റ് തറ മേടിക്കാമായിരുന്നു എന്നൊക്കെ തോന്നും എനിക്ക്. സുകുവേട്ടന്‍ ദുബായിലേക്കൊക്കെ പോവുമ്പോള്‍ എന്നോട് വരുന്നോ എന്ന് ചോദിക്കാറുണ്ടായിരുന്നു. അഞ്ച് ദിവസം കഴിഞ്ഞേ ഞാന്‍ വരൂ, കൂടെപ്പോര് എന്ന് പറയും അദ്ദേഹം. ഫ്‌ളൈറ്റ് ടിക്കറ്റ് ഓര്‍ത്ത് ഞാന്‍ പോവില്ല. കഴക്കൂട്ടം ബൈപ്പാസിനടുത്തുള്ള സ്ഥലങ്ങള്‍ക്കൊക്കെ അന്ന് കുറഞ്ഞ വിലയായിരുന്നു. അതൊക്കെ ചിലരുടെ ബിസിനസ് ബുദ്ധിയാണ്.
ഞാന്‍ സിനിമയും സീരിയലുമൊക്കെ തിരഞ്ഞെടുക്കുന്നത് സ്വന്തം ഇഷ്ടപ്രകാരമായാണ്. മക്കളൊന്നും അതേക്കുറിച്ച് ഒന്നും പറയാറില്ല. ആരോഗ്യമുള്ളിടത്തോളം ജോലി ചെയ്യണമെന്ന് ആഗ്രഹിക്കുന്നയാളാണ് ഞാന്‍. നമ്മളെ അഭിനയയിക്കാന്‍ വിളിക്കുമ്പോള്‍ പോയി അഭിനയിക്കാലോ. ഒന്നുമില്ലെങ്കിലും ആരേയും ആശ്രയിക്കാതെ കൊച്ചുമക്കള്‍ക്ക് എന്തെങ്കിലും വാങ്ങിച്ച് കൊടുക്കാലോ. ഞാന്‍ എന്ത് പറഞ്ഞാലും സാധിപ്പിച്ച് തരുന്നവരാണ് എന്റെ മക്കള്‍. അവരെക്കൊണ്ട് പൈസ കൊടുപ്പിച്ച് വണ്ടി എടുക്കേണ്ടതായ സാഹചര്യം ഇപ്പോഴില്ല. അങ്ങനെയൊരു സാഹചര്യം വരുമ്പോള്‍ അത് നോക്കാം.
മക്കളും മരുമക്കളും മാത്രമല്ല കൊച്ചുമക്കളും അവരവരുടേതായ തിരക്കുകളിലാണ്. അവരെപ്പോലും കാണാന്‍ കിട്ടുന്നില്ലെന്ന പരാതി ഇപ്പോഴമുണ്ടെന്നും മല്ലിക സുകുമാരന്‍ പറഞ്ഞിരുന്നു. കൊച്ചുമക്കളില്‍ മൂത്തയാളായ പ്രാര്‍ത്ഥന ലണ്ടനിലാണ്. സംഗീതത്തില്‍ ഉപരിപഠനം നടത്താനുള്ള ആഗ്രഹം അവള്‍ തന്നെയാണ് യാഥാര്‍ത്ഥ്യമാക്കിയത്. അഡ്മിഷനെക്കുറിച്ചെല്ലാം അവള്‍ തന്നെ നെറ്റില്‍ നോക്കി മനസിലാക്കിയിരുന്നു. രണ്ടാമത്തെയാളായ നച്ചുവിനാണ് തന്നോട് ഏറ്റവും സ്‌നേഹം. അത് അവരുടെ മുന്നില്‍ വെച്ചും പറയാറുണ്ട്. എപ്പോഴും അച്ഛമ്മാ എന്ന് പറഞ്ഞ് പുറകെ നടക്കും അവള്‍. അച്ഛമ്മയ്ക്ക് ഇടയ്ക്കിടയ്ക്ക് ഇങ്ങോട്ട് വന്നൂടേയെന്നാണ് കാണുമ്പോഴെല്ലാം അലംകൃത ചോദിക്കാറുള്ളത്.