ആദ്യത്തെ കണ്മണി ആണായിരിക്കണം! ഇന്ദ്രന് ജന്മദിനാശംസകളുമായി മല്ലികാമ്മ

ഏത് റോൾ ലഭിച്ചാലും അത് ഗംഭീരമാക്കാൻ അസാധ്യ സിദ്ധിയുള്ള താരമായാണ് മലയാളികളുടെ സ്വന്തം ഇന്ദ്രജിത്ത് സുകുമാരൻ. മലയാളത്തിലും തമിഴിലും തെലുങ്കിലും ഹിന്ദിയിലുമുൾപ്പടെ നിരവധി ഭാഷകളിലെ സിനിമകളിൽഅഭിനയിച്ചിട്ടുള്ള നടൻ ഇന്ദ്രജിത്തിന് ഇന്ന് 42-ാം പിറന്നാളാണ്. മലയാളത്തിന്‍റെ ഇതിഹാസ ചലച്ചിത്രനടൻ സുകുമാരന്‍റേയും നടി മല്ലികയുടെയും മകനായ ഇന്ദ്രജിത്ത് 1979 ഡിസംബർ 17ന് തിരുവനന്തപുരത്താണ് ജനിച്ചത്.

താരകുടുംബത്തിൽ നിന്നാണ് ഇന്ദ്രജിത്ത് വരുന്നത് എന്നതിനാൽ തന്നെ സിനിമാപ്രേക്ഷകർക്ക് ഇവരുടെ കുടുംബത്തിലെ വിശേഷങ്ങളും ഏറെ പ്രിയപ്പെട്ടതാണ്. ജന്മദിനത്തിൽ ഇന്ദ്രന് ആശംസകൾ നേർന്നുകൊണ്ട് കുടുംബാംഗങ്ങളും ബന്ധുമിത്രാദികളും സുഹൃത്തുക്കളും ആരാധകരും എത്തിയിട്ടുണ്ട്.

മകന് മല്ലിക നൽകിയിരിക്കുന്ന പിറന്നാളാശംസ ഏറെ ശ്രദ്ധ നേടിയിരിക്കുകയാണ്. ഫേസ്ബുക്ക് പോസ്റ്റായാണ് ആശംസകൾ നേർന്നിരിക്കുന്നത്. ആദ്യത്തെ കണ്മണി ആണായിരിക്കണം, ഇന്ദ്രന് ജന്മദിനത്തിൽ അമ്മയുടെ പ്രാർത്ഥനകളും അനുഗ്രഹവും. മധുരമുള്ള ഒത്തിരി ഓർമ്മകളുമായി ഒരു ദിനം. പൊന്നുമോന് ജന്മദിനത്തിന് എല്ലാ മംഗളങ്ങളും. ദൈവം അനുഗ്രഹിക്കട്ടെ, മല്ലിക കുറിച്ചിരിക്കുകയാണ്.

മീശമാധവൻ, പട്ടാളം, മിഴിരണ്ടിലും, വേഷം, പോലീസ്, ക്ലാസ്മേറ്റ്സ്, ബാബാ കല്യാണി, ഛോട്ടാമുംബൈ, മലബാർ വെഡ്ഡിംഗ്, നമ്മൾ തമ്മിൽ, നായകൻ, സിറ്റി ഓഫ് ഗോഡ്, ഈ അടുത്ത കാലത്ത്, ആമേൻ, ലെഫ്റ്റ് റൈറ്റ് ലെഫ്റ്റ്, അമർ അക്ബർ ആൻറണി, കുറുപ്പ്, ആഹാ തുടങ്ങി നിരവധി സിനിമകളിൽ വ്യത്യസ്ത വേഷങ്ങളെ ഇതിനകം ഇന്ദ്രജിത്ത് അവതരിപ്പിച്ചിട്ടുണ്ട്. തുറമുഖം, റാം, തീർപ്പ്, 19(1)(എ), അനുരാധ ക്രൈം നമ്പർ 59,2019 തുടങ്ങിയ സിനിമകളാണ് ഇനി പുറത്തിറങ്ങാനിരിക്കുന്നത്. സഹോദരനും നടനുമായ പൃഥ്വിരാജ് സംവിധാനത്തിലേക്ക് കടന്നതുപോലെ താൻ സംവിധാനം ചെയ്യുന്ന സിനിമയും ഉടനുണ്ടാകുമെന്ന് അടുത്തിടെ ഇന്ദ്രജിത്ത് ഒരു അഭിമുഖത്തിൽ വ്യക്തമാകികിയിരുന്നു.