മമ്മൂക്കയാണ് റോൾമോഡലെന്ന് ആസിഫ്; കാരണം ഇതാണ്

മെഗാ സ്റ്റാര്‍ മമ്മൂട്ടിയാണ് തന്‍റെ റോള്‍ മോഡലെന്ന് യുവതാരം ആസിഫ് അലി. മമ്മൂക്ക തന്‍റെ കുടുംബത്തോട് കാട്ടുന്ന കരുതലാണ് ആസിഫലിയെ താരത്തെ പിന്തുടരാന്‍ പ്രേരിപ്പിച്ചത്. സിനിമാ തിരക്കുകള്‍ക്കിടയിലും മമ്മൂട്ടി കുടുംബത്തോട് കാണിക്കുന്ന കരുതലാണ് തന്നെ ആകര്‍ഷിച്ചെന്നും മമ്മൂക്കയുടെ ആരോഗ്യസംരക്ഷണമോ, ജീവിതശൈലിയോ അല്ല അതിന് കാരണമായതെന്നും ആസിഫ് അലി വ്യക്തമാക്കി.

സിനിമയില്‍ സജീവമായതോടെയാണ് കുടുംബത്തിന്‍റെ പ്രാധാന്യം മനസിലാക്കി തുടങ്ങിയത്. മമ്മൂട്ടിയാണ് ഇത് മനസിലാക്കി തന്നത്. കുടുംബത്തിൽ തന്‍റെ സാന്നിധ്യം നഷ്ടപ്പെടാതിരിക്കാന്‍ മമ്മൂക്ക എപ്പോഴും ശ്രദ്ധിക്കുന്നുണ്ട്. അതുകൊണ്ട് തന്നെയാണ് എനിക്ക് അദ്ദേഹത്തോട് കൂടുതല്‍ ബഹുമാനം തോന്നുന്നതെന്നും ആസിഫ് അലി പറഞ്ഞു. കൈരളി ടിവിയിലെ ജെബി ജംഗ്ഷന്‍ പരിപാടിയിൽ പങ്കെടുക്കവേയാണ് ആസിഫ് ഇക്കാര്യം വ്യക്തമാക്കിയത്.

പരിപാടിയിൽ പങ്കെടുക്കാനാവശ്യപ്പെട്ടതും മമ്മൂട്ടിയാണെന്നും ആസിഫ് പറഞ്ഞു. പലപ്പോഴും ജെബി ജങ്ഷനിൽ പങ്കെടുക്കാതെ മുങ്ങി നടന്നിട്ടുണ്ടെന്നും ആസിഫ് പരിപാടിയുടെ അവതാരകനും മുതിര്‍ന്ന മാധ്യമപ്രവര്‍ത്തകനുമായ ജോണ്‍ ബ്രിട്ടാസിനോട് പറഞ്ഞു. പിന്നാട് ഗള്‍ഫില്‍ എയര്‍പോര്‍ട്ടില്‍ വച്ച് മമ്മൂട്ടിയെയും ജോണ്‍ ബ്രിട്ടാസിനെയും ഒന്നിച്ച് കണ്ടതിന് ശേഷമാണ് ജെബി ജംഗ്ഷനിൽ പങ്കെടുക്കാൻ തീരുമാനിച്ചത്. ഇവിടെ വച്ചാണ് അടുത്ത തവണ ഷോയില്‍ പങ്കെടുക്കണമെന്ന് മമ്മൂട്ടി ആവശ്യപ്പെട്ടത്.

Mammootty is my rolemodel: Asif Ali

Actor Asif Ali told that mega star mammootty is his Rolemodel