ദിലീപേട്ടനൊപ്പം ഞാനല്ലാതെ വേറാര്! ആസിഫും ഞാനും അയല്‍ക്കാരാണ്! സഹപ്രവര്‍ത്തകരെക്കുറിച്ച് മംമ്ത മോഹന്‍ദാസ്‌

തെന്നിന്ത്യന്‍ സിനിമകളിലായി പ്രേക്ഷകര്‍ക്ക് പ്രിയങ്കരിയായി മാറിയ താരമാണ് മംമ്ത മോഹന്‍ദാസ്. മയൂഖമെന്ന ചിത്രത്തിലൂടെ തുടങ്ങിയ സിനിമാജീവിതം മഹേഷും മാരുതിയിലും എത്തി നില്‍ക്കുകയാണ്. ആസിഫ് അലിയാണ് ചിത്രത്തിലെ നായകന്‍. വീണ്ടും ആസിഫിനൊപ്പം ഒന്നിച്ചെത്തുന്നതിനെക്കുറിച്ചും ദിലീപിനൊപ്പമുള്ള സ്‌ക്രീന്‍കെമിസ്ട്രിയെക്കുറിച്ചും മംമ്ത സംസാരിച്ചിരുന്നു. റെഡ് എഫ്എമ്മിന് നല്‍കിയ അഭിമുഖത്തിലായിരുന്നു താരം വിശേഷങ്ങള്‍ പങ്കുവെച്ചത്.
ഞാനും ആസിഫും അയല്‍ക്കാരാണ്. സ്‌ക്രീനില്‍ ഒന്നിച്ച് വരുമ്പോള്‍ അപരിചിതത്വമില്ല. കഥ തുടരുന്നു മുതലുള്ള പരിചയമാണ്. അന്ന് ആസിഫിന് നല്ല ടെന്‍ഷനുണ്ടായിരുന്നു. പാട്ട് സീന്‍ ചെയ്യുമ്പോള്‍ എല്ലാവര്‍ക്കും ബുദ്ധിമുട്ടാണ്. ബൃന്ദ മാസ്റ്ററായത് ഭാഗ്യം. പുള്ളിക്കാരി നല്ല സപ്പോര്‍ട്ടീവാണ്. നിന്റെ കണ്ണില്‍ ഫീലിംഗ്‌സ് വരട്ടെയെന്ന് ബൃന്ദ മാസ്റ്റര്‍ പറയുമായിരുന്നു. ആ പാട്ട് ഹിറ്റായിരുന്നു. അന്ന് എന്നോട് ക്രഷുണ്ടായിരുന്നു എന്ന് ആസിഫ് പിന്നീട് അഭിമുഖങ്ങളില്‍ പറയുന്നുണ്ടായിരുന്നു. ആഹാ അത് കൊള്ളാലോ എന്നായിരുന്നു എന്റെ മറുപടി. അഭിനേതാവെന്ന നിലയില്‍ ആസിഫിന്റെ വളര്‍ച്ച എനിക്ക് നേരിട്ടറിയാവുന്നതാണ്.
മൈ ബോസ് 2ഉം റ്റു കണ്‍ട്രീസും ചെയ്യാന്‍ ഞാന്‍ റെഡിയാണ്. വേറെയാരാണ് ചെയ്യുക. വേറെ ആരെങ്കിലും ചെയ്താല്‍ അത് നില്‍ക്കില്ല. നല്ല സ്‌ക്രിപ്റ്റാണെങ്കില്‍ മാത്രമേ വിജയിക്കൂ. നമുക്ക് റിസ്‌ക്കെടുക്കാനാവില്ലെന്ന് ഞാനെപ്പോഴും ദിലീപേട്ടനോട് പറയാറുണ്ട്. ഞങ്ങളുടെ കെമിസ്ട്രിയില്‍ പ്രേക്ഷകര്‍ക്ക് വിശ്വാസമുണ്ട്. അത് നിലനിര്‍ത്തണമല്ലോ.
കുറച്ച് കിറുക്കുള്ള ക്യാരക്ടര്‍ ചെയ്യാനിഷ്ടമാണ്. ഞാന്‍ അങ്ങനെയായിരുന്നെങ്കില്‍ എങ്ങനെയായിരിക്കും പെരുമാറുക എന്നൊക്കെ ആലോചിക്കാറുണ്ട്. അതെനിക്ക് ഇഷ്ടമുള്ള കാര്യമാണ്. ഹ്യൂമര്‍ ചെയ്യാന്‍ എനിക്കിഷ്ടമാണ്, ചിരിക്കാനും ചിരിപ്പിക്കാനും ഇഷ്ടമാണ്. അത് എന്ന് നടക്കുമെന്ന് അറിയില്ലെന്നും മംമ്ത പറഞ്ഞിരുന്നു.