ഇന്ദ്രൻസേട്ടനേയും നല്ലൊരു സിനിമയേയും കാണാതെ പോയതിൽ വിഷമം! ജനങ്ങൾ സ്നേഹിച്ച സിനിമയായിരുന്നു 'ഹോം'; മഞ്ജു പിള്ള

നല്ലൊരു സിനിമ ജൂറി കാണാതെ പോയതിൽ വിഷമമുണ്ടെന്ന് മഞ്ജു പറഞ്ഞു. യോഗമില്ലാത്തതിനാലാകാം സംസ്ഥാന ചലച്ചിത്ര പുരസ്കാരത്തിന് തന്നെ പരിഗണിക്കാതെ പോയത്. എന്തെങ്കിലും ഒരു കാരണം കൊണ്ട് ബാക്കിയുള്ളവരുടെ കഠിനാധ്വാനം കണ്ടില്ലെന്ന് നടിക്കരുതെന്നും മഞ്ജു ഒരു സ്വകാര്യ ചാനലിന് നൽകിയ അഭിമുഖത്തിൽ പറഞ്ഞു.

സോഷ്യൽ മീഡിയയിൽ അത്ര സജീവമല്ലാത്ത ആളാണ് ഞാൻ. ഫോണിൽ പലരും വാർത്തകൾ അയച്ചു തന്നിരുന്നു. അവാർഡ് കിട്ടാൻ യോഗമില്ലെന്ന് തോന്നുന്നു. കൃത്യമായി ഇപ്പോഴും ഹോം സിനിമയെ ചുറ്റിപറ്റി എന്ത് വിവാദമാണ് നടക്കുന്നതെന്ന് അറിയില്ല. പക്ഷേ എന്തെങ്കിലും കാരണം കൊണ്ട് ഒരു ചിത്രവും മാറ്റി നിർത്തപ്പെടരുത്.

ഈ അടുത്തക്കാലത്ത് പുറത്തിറങ്ങിയ ചിത്രങ്ങളിൽ ഒലിവർ ട്വിസ്റ്റിനെയും, കുട്ടിയമ്മയേയും പോലെ മലയാളികൾ നെഞ്ചേറ്റിയ മറ്റു കഥാപാത്രങ്ങൾ ഇല്ല എന്ന് തന്നെ പറയാം. കഥാപാത്രങ്ങളായി മഞ്ജുവും ഇന്ദ്രൻസും ജീവിക്കുകയായിരുന്നു. ഇത്രയും ഗംഭീരമായൊരു കഥാപാത്രം തനിയ്ക്ക് മുൻപ് ലഭിച്ചിട്ടില്ലായെന്നും മഞ്ജു മുൻപ് ഒരു അഭിമുഖത്തിൽ പറഞ്ഞിരുന്നു.