വൈക്കം വിജയലക്ഷ്മിക്ക് അഭിനന്ദനവുമായി നടി മഞ്ജു വാര്യര്‍

ഗായത്രി വീണയില്‍ അറുപത്തി ഏഴോളം ഗാനങ്ങള്‍ മീട്ടി ഗിന്നസ് റെക്കോര്‍ഡ് നേട്ടം സ്വന്തമാക്കിയ വൈക്കം വിജയലക്ഷ്മിയെ അഭിനന്ദിച്ച് നടി മഞ്ജു വാര്യര്‍. പരിമിതികൾക്ക് പ്രതിഭകളെ തോല്പിക്കാനാകില്ലെന്നും അവരുടെ സ്വപ്നങ്ങൾക്ക് പരിധി നിശ്ചയിക്കാൻ ആർക്കും സാധിക്കില്ലെന്നും തെളിയിച്ച വിജയമാണിതെന്നും മഞ്ജു ഫേസ്‍‍ബുക്കില്‍ കുറിച്ചു.

ഗിന്നസ് നേട്ടം സ്വന്തമാക്കിയ വൈക്കം വിജയലക്ഷ്മിക്ക് സിനിമാ സാംസ്കാരിക രംഗത്തു നിന്നും അഭിനന്ദനങ്ങൾ പ്രവഹിക്കുകയാണ്. കൊച്ചിയിലായിരുന്നു വിജയലക്ഷ്മിയുടെ റെക്കോര്‍ഡ് പ്രകടനം. തുടര്‍ച്ചയായി അഞ്ചിലേറെ മണിക്കൂറാണ് അവര്‍ ഗായത്രിവീണ മീട്ടിയത്. രാവിലെ പത്തു മുതല്‍ ഉച്ചക്ക് ഒരു മണി വരെ ശാസ്ത്രീയ സംഗീതവും പിന്നീട് തുടര്‍ച്ചയായി മൂന്ന് മണി വരെ ചലച്ചിത്ര ഗാനങ്ങളും വിജയലക്ഷ്മി ഗായത്രി വീണയില്‍ മീട്ടി.

51 പാട്ടുകള്‍ മീട്ടുക എന്ന ലക്ഷ്യവുമായാണ് വൈക്കം വിജയലക്ഷ്മി വീണ മീട്ടാന്‍ തുടങ്ങിയത്. എന്നാല്‍ സംഗീത പരിപാടി അവസാനിപ്പിച്ചപ്പോൾ 67 പാട്ടുകൾ പൂര്‍ത്തിയാക്കിയിരുന്നു. വിജയലക്ഷ്മിയുടെ കച്ചേരിക്ക് മൃദംഗം വായിച്ചത് എം ജയചന്ദ്രനാണ്. ഗായത്രി വീണയില്‍ അഗാധമായ കഴിവുള്ള വിജയലക്ഷ്മിയുടെ റെക്കോര്‍ഡ് നേട്ടത്തില്‍ ഭാഗമാകാന്‍ കഴിഞ്ഞതിന്‍റെ സന്തോഷം എം ജയചന്ദ്രനും സാമൂഹ്യ മാധ്യമങ്ങളിലൂടെ പങ്കുവെച്ചു.

കുട്ടിക്കാലത്ത് കളിപ്പാട്ട വീണയിലാണ് വൈക്കം വിജയലക്ഷ്മി സംഗീത യാത്ര തുടങ്ങിയത്. പിന്നീട് അത് ഒറ്റക്കമ്പി വീണയിലേക്കും ഗായത്രി വീണയിലേക്കും വളരുകയായിരുന്നു. ഗായത്രി വീണയില്‍ വിജയലക്ഷ്മി കച്ചേരി നടത്താന്‍ തുടങ്ങിയിട്ട് 18 വര്‍ഷം പിന്നിട്ടു.

വൈക്കം ഉദയനാപുരം ഉഷാനിലയത്തില്‍ വി.മുരളീധരന്‍റേയും പി.കെ വിമലയുടേയും മകളാണ് വിജയലക്ഷ്മി. കമല്‍ സംവിധാനം ചെയ്ത സെല്ലുലോയ്ഡിലെ ‘ കാറ്റേ കാറ്റേ ‘ എന്ന ഗാനത്തിലൂടെയാണ് വിജയലക്ഷ്മി സിനിമാമേഖലയില്‍ തന്‍റേതായ ഇടം ഉറപ്പിച്ചത്. ആദ്യമായി പാടിയ രണ്ടു ഗാനങ്ങള്‍ക്കു സംസ്ഥാന പുരസ്‌കാരം നേടിയ ഗായികയാണ് വൈക്കം വിജയലക്ഷ്മി. സെല്ലുലോയ്ഡിലെയും നടനിലെയും ഗാനങ്ങളിലൂടെയാണ് സംസ്ഥാന പുരസ്‌കാരങ്ങള്‍ ഗായികക്ക് സ്വന്തമായത്.




Manju Warrier appreciating Vijayalakshmi


Manju warrier appreciating Vaikkom Vijayalakshmi for her Guinnes Record