എനിക്ക് സങ്കടമൊക്കെ വന്നു! മഞ്ജു വാര്യരുടെ സിനിമ കണ്ട് അമ്മയും ചേട്ടനും പറഞ്ഞത്! വൈറലായി വീഡിയോ

മലയാളത്തിന്റെ ലേഡി സൂപ്പര്‍സ്റ്റാറായാണ് മഞ്ജു വാര്യരെ വിശേഷിപ്പിക്കുന്നത്, സാക്ഷ്യം എന്ന ചിത്രത്തിലൂടെയായാണ് മഞ്ജു തുടക്കം കുറിച്ചത്. ആയിഷയാണ് ഒടുവിലായി റിലീസ് ചെയ്തത്. പ്രഖ്യാപനം മുതല്‍ത്തന്നെ വാര്‍ത്തകളില്‍ ഇടം നേടിയ സിനിമയാണ് ആയിഷ. ആരാധകര്‍ മാത്രമല്ല കുടുംബാംഗങ്ങളും സുഹൃത്തുക്കളുമെല്ലാം മഞ്ജുവിനെ അഭിനന്ദിച്ചെത്തിയിരുന്നു. അമ്മ ഗിരിജ വാര്യരും മധു വാര്യരുമെല്ലാം സിനിമ കാണാനായെത്തിയിരുന്നു. ഈ സിനിമ കണ്ട് എനിക്ക് സങ്കടമൊക്കെ വന്നു. എല്ലാവരും കാണണം. നല്ല സിനിമയാണെന്നായിരുന്നു ഗിരിജ വാര്യര്‍ പറഞ്ഞത്. ഞാന്‍ രണ്ട് പ്രാവശ്യം സിനിമ കണ്ടിരുന്നു. ഇമോഷണലായി എനിക്കത് ഫീലായി. ജയന്‍ ചേട്ടന്റെ മ്യൂസിക്ക് ഒരുപാടിഷ്ടമായെന്നായിരുന്നു മധു വാര്യര്‍ പറഞ്ഞത്.
തന്റെ കരിയറില്‍ എല്ലാ കാര്യത്തിനും പിന്തുണ തന്നവരാണ് അച്ഛനും അമ്മയുമെന്ന് മുന്‍പ് മഞ്ജു പറഞ്ഞിരുന്നു. ഡാന്‍സ് പഠിക്കാനുള്ള സൗകര്യം ഉണ്ടോ എന്ന് നോക്കിയാണ് അച്ഛന്‍ ട്രാന്‍സ്ഫര്‍ പോലും നോക്കിയിരുന്നത്. സിനിമ വിട്ടാലും ഡാന്‍സ് കൂടെത്തന്നെ വേണമെന്ന് അച്ഛന്‍ പറഞ്ഞിരുന്നു. ആ ഉപദേശം താന്‍ അതേപോലെ ഉള്‍ക്കൊണ്ടുവെന്നും താരം പറഞ്ഞിരുന്നു. ഗുരുവായൂരിലെ നൃത്തപരിപാടിക്ക് ശേഷമായാണ് മഞ്ജു വീണ്ടും സിനിമയിലെത്തിയത്. രണ്ടാം വരവില്‍ ലഭിച്ചതെല്ലാം വൈവിധ്യമാര്‍ന്ന കഥാപാത്രങ്ങളുമായിരുന്നു.
തിരക്കുകളെല്ലാമുണ്ടാവാറുണ്ടെങ്കിലും ഡാന്‍സ് ചെയ്യാനായും മഞ്ജു സമയം കണ്ടെത്താറുണ്ട്. സൂര്യ ഫെസ്റ്റിവലിനോടനുബന്ധിച്ച് നടന്ന രാധാമാധവം മികച്ച പ്രതികരണമായിരുന്നു നേടിയത്. സിനിമയുമായി ബന്ധപ്പെട്ട പരിപാടികള്‍ക്കൊന്നും വരാറില്ലെങ്കിലും നൃത്തപരിപാടികളില്‍ അച്ഛനും അമ്മയും മുന്നില്‍ത്തന്നെയുണ്ടാവാറുണ്ട്. അമ്മയ്ക്ക് ഡാന്‍സ് പഠിക്കണമെന്നൊക്കെയുണ്ടായിരുന്നുവെങ്കിലും അന്ന് അതിന് സാധിച്ചിരുന്നില്ല. ആ മോഹമാണ് അമ്മ തന്നിലൂടെ സാധിപ്പിച്ചതെന്നും മഞ്ജു വാര്യര്‍ പറഞ്ഞിരുന്നു. ചെറുപ്രായത്തില്‍ തന്നെ ഡാന്‍സ് പഠിക്കാന്‍ തുടങ്ങിയതാണ്, ഇപ്പോഴും ഡാന്‍സ് പ്രാക്ടീസുണ്ടെന്നറിഞ്ഞാല്‍ അമ്മ വിളിച്ച് എപ്പോഴാണ് പോവുന്നതെന്ന് ചോദിക്കാറുണ്ടെന്നും മഞ്ജു പറഞ്ഞിരുന്നു.