നിന്നെ കെട്ടിപ്പിടിക്കാൻ ഇനിയും കാത്തിരിക്കാനാവില്ലെന്ന് മന്യ! ചിന്നുവിന് പിറന്നാളാശംസയുമായി ഊർമിള ഉണ്ണിയും! സംയുക്ത വർമ്മയുടെ സന്തോഷനിമിഷങ്ങൾ ഏറ്റെടുത്ത് പ്രിയപ്പെട്ടവർ

മലയാളികള്‍ക്ക് പ്രിയങ്കരിയായി മാറിയ അഭിനേത്രികളിലൊരാളാണ് സംയുക്ത വര്‍മ്മ. ബിജു മേനോനുമായുള്ള പ്രണയ വിവാഹത്തിന് പിന്നാലെയായി സിനിമയില്‍ നിന്നും അപ്രത്യക്ഷയാവുകയായിരുന്നു താരം. വിവാഹ ശേഷം നിരവധി അവസരങ്ങള്‍ ലഭിച്ചിരുന്നുവെങ്കിലും താരം സ്വീകരിച്ചിരുന്നില്ല. മികച്ച അവസരം ലഭിച്ചാല്‍ താന്‍ തിരിച്ചെത്തിയേക്കുമെന്ന് താരം വ്യക്തമാക്കിയിരുന്നു. സിനിമയില്‍ സജീവമല്ലെങ്കിലും സോഷ്യല്‍ മീഡിയയിലൂടെ സംയുക്തയുടെ വിശേഷങ്ങളെല്ലാം ആരാധകര്‍ അറിയാറുണ്ട്. സംയുക്തയ്ക്ക് പിറന്നാളാശംസ അറിയിച്ചെത്തിയിരിക്കുകയാണ് പ്രിയപ്പെട്ടവരെല്ലാം.
സംയുക്തയുടെ ഫോട്ടോയ്‌ക്കൊപ്പമായാണ് പ്രിയപ്പെട്ടവരെല്ലാം ആശംസ അറിയിച്ചിട്ടുള്ളത്. ഹാപ്പി ബര്‍ത്ത് ഡേ ചിന്നൂ, മെനി മെനി ഹാപ്പി റിട്ടേണ്‍സ് ഓഫ് ദി ഡേ എന്നായിരുന്നു ഊര്‍മിള ഉണ്ണി കുറിച്ചത്. താരങ്ങളും ആരാധകരുമെല്ലാം കമന്റുകളുമായെത്തിയിട്ടുണ്ട്. താങ്ക് യൂ താതെയ് എന്നായിരുന്നു സംയുക്ത ഇന്‍സ്റ്റഗ്രാമില്‍ കുറിച്ചത്. കുടുംബസമേതമായാണ് മന്യ സംയുക്തയ്ക്ക് ആശംസ അറിയിച്ചത്.
അമ്മയ്ക്കും മകള്‍ക്കുമൊപ്പമായി ആശംസ അറിയിച്ച മന്യയുടെ വീഡിയോ സംയുക്ത പോസ്റ്റ് ചെയ്തിരുന്നു. സംയുക്തയുമായുള്ള അടുപ്പത്തെക്കുറിച്ച് വാചാലയായി നേരത്തെ മന്യ എത്തിയിരുന്നു. മന്യ തന്റെ ബെസ്റ്റ് ഫ്രണ്ടാണെന്ന് സംയുക്തയും പറഞ്ഞിരുന്നു. മന്‍ എന്നാണ് സംയുക്ത വിളിക്കുന്നത്. ദുബായില്‍ ഒരു ഷോ ചെയ്തിരുന്ന സമയത്ത് ഒരു മാസത്തോളം ഒന്നിച്ച് താമസിച്ചിട്ടുമുണ്ട്. സിനിമയിലും ഒന്നിച്ച് അഭിനയിച്ചിരുന്നു. നല്ലൊരു ബന്ധം കാത്തുസൂക്ഷിക്കുന്നയാളാണ് മന്യ. നല്ല ഓര്‍മ്മകളുണ്ട്. എല്ലാബന്ധങ്ങള്‍ക്കും നല്ല വില കല്‍പ്പിക്കുന്ന വ്യക്തിയാണ് മന്യ. അമേരിക്കയില്‍ വെച്ചാണ് ഒടുവിലായി കണ്ടത്. അന്ന് പോയപ്പോള്‍ നല്ല രീതിയില്‍ ഉച്ചഭക്ഷണം വിളമ്പിയിരുന്നുവെന്നും സംയുക്ത പറഞ്ഞിരുന്നു. എന്റെ പിറന്നാൾ ദിവസം മനോഹരവും എന്നും ഓർമയിൽ സൂക്ഷിക്കാൻ കഴിയുന്ന തരത്തിലുള്ളതും ആക്കി തീർത്തതിന് ഒരുപാട് നന്ദിയെന്നായിരുന്നു സംയുക്ത വർമ്മ മന്യയുടെ സമ്മാനത്തെക്കുറിച്ച് കുറിച്ചത്.
ഞങ്ങളുടെ പ്രിയ ചിന്നുവിന് പിറന്നാളാശംസകൾ. ഞങ്ങൾക്കേറെ പ്രിയപ്പെട്ടവളാണ് നീ. യുഎഇയിൽ ആലുക്കാസ് ഷോയുടെ റിഹേഴ്സലിനായി എത്തിയപ്പോൾ നമ്മൾ കണ്ടുമുട്ടിയ ആദ്യ ദിവസം എനിക്ക് ഒരിക്കലും മറക്കാൻ കഴിയില്ല. 2000ത്തിലെ ആ ദിവസം മുതൽ ഇന്ന് 2021 വരെ. നമ്മൾ കിലോമീറ്ററുകൾ അകലെയാണെങ്കിലും, ഞങ്ങളുടെ സ്നേഹം ശക്തമാണ്. ഞാൻ നിന്നെ മിസ് ചെയ്യുന്നു എന്റെ പ്രിയ ചിന്നു. നിന്നെ കെട്ടിപ്പിടിക്കാൻ എനിക്ക് ഇനിയും കാത്തിരിക്കാനാവില്ല. എപ്പോഴും അനുഗ്രഹിക്കപ്പെട്ടവളായിരിക്കുകയെന്നായിരുന്നു മന്യ കുറിച്ചത്. ഉമ്മയെന്നായിരുന്നു സംയുക്തയുടെ വാക്കുകൾ. ഗീതു മോഹൻദാസും സംയുക്തയ്ക്ക് പിറന്നാളാശംസ അറിയിച്ചെത്തിയിരുന്നു.